ដោយ: គង់ លាងហួរ
អន្តរជាតិ: ប្រទេសវៀតណាម ឥណ្ឌូនេស៊ី និងម៉ាឡេស៊ី បានជាប់ឈ្មោះជាប្រទេសចំនួន៣ នៅក្នុងតំបន់អាស៊ាន ដែលបញ្ជូនសិស្ស និស្សិត ទៅសិក្សានៅបរទេសច្រើនជាងគេ ខណៈដែលវៀតណាមជាប្រទេសឈរនៅលំដាប់លេខរៀងទី១ ។
យោងតាមរបាយការណ៍ស្រាវជ្រាវ អំពីតំបន់អាស៊ានប្រចាំឆ្នាំ២០២៤ ដែលចេញផ្សាយដោយអង្គការយូណេស្កូ (UNESCO) បានបង្ហាញថា សិស្សនិស្សិតវៀតណាមសិក្សា នៅបរទេសមានចំនួនជាង២០ម៉ឺននាក់ តាមពីក្រោយដោយប្រទេសម៉ាឡេស៊ី និងឥណ្ឌូនេស៊ី ដែលមានសិស្ស និស្សិតនៅបរទេសជាង១៣២.០០០នាក់ ខណៈសិស្សនិស្សិតថៃសិក្សា នៅបរទេសមានចំនួន៥៦.០០០នាក់ ។
បណ្តាប្រទេសគោលដៅធំៗចំនួន២ របស់និស្សិតវៀតណាម រួមមាន ប្រទេសជប៉ុន ដែលមាននិស្សិតវៀតណាម ជាង៤៤.១០០នាក់ និងប្រទេសកូរ៉េខាងត្បូង ដែលមាននិស្សិតវៀតណាមជិត២៥.០០០នាក់ ។ ចំណែកសហរដ្ឋអាមេរិក មានចំនួននិស្សិតវៀតណាមប្រហែ ល២៣.១០០នាក់ អូស្ត្រាលីមាន១៤.១០០នាក់ និងកាណាដាមានជិត៩.០០០ នាក់។
យោងតាមរបាយការណ៍ដាច់ដោយឡែក របស់ស្ថាប័នស្រាវ ជ្រាវអំពីការអប់រំអន្តរជាតិ (ICEF) ក៏បានបង្ហាញផងដែរថា ប្រទេសវៀតណាម គឺជាប្រទេសជាប់ចំណាត់ថ្នាក់លេខ១០ នៅទូទាំងពិភពលោក ដែលបានបញ្ជូននិស្សិត ទៅសិក្សានៅបរទេសច្រើនជាងគេ។
ក្នុងចំណោមនោះ គេសង្កេតឃើញថា និស្សិតវៀតណាម មានចំនួនច្រើនជាងគេបំផុត លំដាប់លេខរៀងទី៥ នៅសហរដ្ឋអាមេរិក លេខរៀងទី២ នៅជប៉ុន លេខ៦ នៅប្រទេសអូស្រ្តាលី និងលេខ១នៅកោះតៃវ៉ាន់។
កត្តាប្រជាសាស្រ្ត កំណើនប្រាក់ចំណូល ក៏ដូចជា តម្រូវការឥតឈប់ឈរពីឪពុកម្តាយ ដែលចង់ឱ្យកូនៗរបស់ពួកគេ ទទួលបានការអប់រំ ដែលមានគុណភាពខ្ពស់ គឺជាមូលហេតុសំខាន់ៗ ដែលជំរុញឱ្យប្រទេសវៀតណាមឈានមុខគេ ក្នុងការបញ្ជូនសិស្សនិស្សិតទៅសិក្សានៅបរទេស៕ប្រភព៖VOV៕
