ដោយ: គង់ លាងហួរ
អន្តរជាតិ: សារពត៌មាន Korea Times បានចុះផ្សាយថា ចំនួនប្រជាជនរស់នៅក្នុងទីក្រុងសេអ៊ូល បានធ្លាក់ចុះ ក្នុងរយៈពេលមួយទសវត្សរ៍កន្លងមកនេះ ដោយសារតែកត្តាតម្លៃលំនៅដ្ឋាន ហក់ឡើងខ្ពស់កប់ពពក។
យោងតាមទិន្នន័យដែលចងក្រង ដោយការិយាល័យស្ថិតិ Statistics Korea បង្ហាញថា ចំនួនប្រជាជន ដែលបានចាកចេញពីទីក្រុងសេអ៊ូល ក្នុងរយៈពេល១០ឆ្នាំចុងក្រោយនេះ ទៅកាន់ទីក្រុង ឬខេត្តផ្សេងទៀត ដូចជាខេត្ត Busan ខេត្ត Incheon និងខេត្ត Gyeonggi មានចំនួនប្រមាណ៥,៤៧លាននាក់។
ស្របពេលចំនួនប្រជាជន ដែលផ្លាស់ទីលំនៅទៅកាន់រដ្ឋធានីសេអ៊ូលមានចំនួន៤,៦១លាននាក់ ក្នុងអំឡុងពេលដូចគ្នានោះ ដូច្នេះ បើយោងតាមការគណនាបានរកឃើញថា ទីក្រុងសេអ៊ូលបានជួបប្រទះលំហូរចេញសុទ្ធនៃប្រជាជន(Net outflow)ចំនួន៨៦១.០០០នាក់ក្នុងរយៈពេល១ទសវត្សរ៍ចុងក្រោយនេះ។
ប្រជាជនកូរ៉េខាងត្បូងប្រហែល១,៧៤លាននាក់ បានលើកឡើងថា ហេតុផលចម្បងដែលស្ថិត នៅពីក្រោយការធ្វើចំណាកស្រុករបស់ពួកគេចេញពីទីក្រុងសេអ៊ូល គឺកត្តាតម្លៃលំនៅដ្ឋានហក់ឡើងខ្ពស់កប់ពពក។
ប្រជាជនទាំងនោះអះអាងថា ពួកគេបានសម្រេចចិត្តចាកចេញពីទីក្រុងសេអ៊ូល បន្ទាប់ពីបានទិញលំនៅដ្ឋាននៅកន្លែងផ្សេង ឬកិច្ចសន្យាជួលរបស់ពួកគេផុតកំណត់ ហើយពួកគេបានរកឃើញកន្លែងរស់នៅថ្មីនៅខាងក្រៅទីក្រុង។
យោងតាមក្រុមប្រឹក្សាអចលនទ្រព្យកូរ៉េ (REB) បានឱ្យដឹងថា តម្លៃអាផាតម៉ិនជាមធ្យម នៅទីក្រុងសេអ៊ូល គិតចាប់ពីខែមករាដល់ខែវិច្ឆិកា ឆ្នាំមុន មានចំនួន១០.៤៩៣ដុល្លារ ក្នុងមួយម៉ែត្រការ៉េ ដែលមានន័យថា ប្រជាជនកូរ៉េត្រូវមានប្រាក់៨៦៥.១១០ដុល្លារ ទើបអាចទិញបានអាផាតម៉ិនទំហំ៨២ម៉ែត្រការ៉េ។
តម្លៃអាផាតម៉ិន ជាមធ្យមនៅក្នុងទីក្រុងសេអ៊ូល គឺមានកម្រិតខ្ពស់ជាងតម្លៃអាផាតម៉ិន ដែលមានទំហំដូចគ្នានៅក្នុងខេត្ត Gyeonggi ឬខេត្ត Incheon ចំនួន២ដង ។
យោងតាមទិន្នន័យពី វិបផតថលអចលនទ្រព្យR114 បានបង្ហាញថា តម្លៃអាផាតម៉ិនជាមធ្យម នៅក្នុងទីក្រុងសេអ៊ូលបានកើនឡើង១៤៤ភាគរយ ក្នុងរយៈពេល១០ឆ្នាំកន្លងមកនេះ។
ទន្ទឹមនឹងនេះ ប្រជាជនភាគច្រើន ដែលចាកចេញពីទីក្រុងសេអ៊ូលបានផ្លាស់ប្តូរទីលំនៅ ទៅកាន់តំបន់ជុំវិញ ដូចជា ខេត្ត Gyeonggi និងខេត្ត Incheon ជាដើម៕
