ដោយៈ គង់ ម៉ាលីនណា
ភ្នំពេញៈ ទំហំពាណិជ្ជកម្មទ្វេរភាគីរវាងកម្ពុជា-ចិន ក្នុងខែដំបូងឆ្នាំ ២០២៤ នេះ សម្រេចបានទឹកប្រាក់ជាង១១៥០ លានដុល្លារអាមេរិក កើនឡើងជាង១៨ភាគរយ ធៀបនឹងរយៈពេលដូចគ្នាកាលពីឆ្នាំមុន។
ជុំវិញការធ្វើការធ្វើពាណិជ្ជកម្មទ្វេរភាគីរវាងកម្ពុជា និងចិនពីមួយឆ្នាំទៅមួយឆ្នាំឃើញថា មានកំណើនកើនឡើងជាលំដាប់ ទោះបី ជញ្ជីងពាណិជ្ជកម្មរវាងប្រទេសទាំងពីរ មិនមានសមតុល្យក៏ដោយ តែជាការចូលរួមចំណែកផ្គត់ផ្គង់ ដល់វត្ថុធាតុដើមក្នុងស្រុក ជាពិសេសការ បង្កើនចំណូលជាតិ តាមរយៈការអនុវត្តពន្ធនាំចូលរបស់កម្ពុជា។
ជាក់ស្តែងការធ្វើការធ្វើពាណិជ្ជកម្មទ្វេរភាគី រវាងប្រទេសទាំងពីរ ក្នុងខែដំបូងឆ្នាំ២០២៤ នេះ បើតាមរបាយការណ៍អគ្គនាយកដ្ឋានគយ និងរដ្ឋាករកម្ពុជា នៃក្រសួងសេដ្ឋកិច្ច និងហិរញ្ញវត្ថុ បានបង្ហាញឲ្យដឹងថា ទំហំពាណិជ្ជកម្មទ្វេភាគីប្រទេសទាំងពីរ មានចំនួនទឹកប្រាក់ជាង ១១៥០លានដុល្លារអាមេរិក ក្នុងនោះការនាំចេញរបស់កម្ពុជា មានទឹកប្រាក់ជាង១២១លានដុល្លារអាមេរិក កើនឡើងប្រមាណ៥០ភាគរយ, ខណៈការនាំចូលពីប្រទេសចិន មកកម្ពុជាមានទឹកប្រាក់ជាង១ ពាន់លានដុល្លារអាមេរិក កើនឡើងជាង១៥ភាគរយ បើធៀបរយៈពេលដូចគ្នានឹងឆ្នំា២០២៣ ។
ជុំវិញកាធ្វើពាណិជ្ជកម្មរវាងកម្ពុជា-ចិន, ថ្មីៗនេះ អ្នកឧកញ៉ា លឹម ហេង អនុប្រធានសភាពាណិជ្ជកម្មកម្ពុជារំពឹងថា ការធ្វើពាណិជ្ជកម្ម រវាងកម្ពុជា-ចិន នឹងមានកំណើនកើនឡើងបន្តបន្ទាប់ទៀត។ មិនតែប៉ុណ្ណោះ កម្ពុជាអាចទាក់ទាញវិនិយោគិនចិន បានកាន់តែច្រើន ដើម្បីផលិត និងកែច្នៃ នាំចេញទៅកាន់ប្រទេសរបស់ខ្លួន និងប្រទេសដ៏ទៃទៀតស្របពេលប្រទេសទាំងពីរ កំពុងក្លាយជាមិត្តត្បូងពេជ្រ ជាពិសេសក្នុងឆ្នាំ២០២៤នេះ គឺជាការផ្លាស់ប្តូរនូវរបត់គោលនយោបាយថ្មីមួយទៀត នៃការផ្លាស់ប្តូររវាងប្រជាជន និងប្រជាជនប្រទេសទាំងពីរ ដែលនឹងធ្វើឲ្យ មានទាំងកំណើនទេសចរណ៍ និងការនាំចេញមានការកើនឡើងជាដើម៕
