ដោយៈ គង់ ម៉ាលីនណា
ភ្នំពេញៈ ធនាគារអភិវឌ្ឍន៍ជនបទ និងកសិកម្ម (ARDB) បានបម្រុងទុន១០០លានដុល្លារ ជាកម្មវិធីហិរញ្ញប្បទានពិសេសរបស់រដ្ឋាភិបាល ដើម្បីជួយរក្សាស្ថិរភាពតម្លៃទំនិញកសិកម្ម នៅក្នុងរដូវប្រមូលផលសម្រាប់ឆ្នាំនេះ។ នេះបើយោងតាមមន្ត្រីជាន់ខ្ពស់ARDB។
អគ្គនាយកនៃ ARDB លោក កៅ ថាច បានមានប្រសាសន៍ឲ្យដឹងកាលពីថ្ងៃទី ៧ ខែកុម្ភៈថា លោកបានដឹកនាំកិច្ចប្រជុំផ្ទៃក្នុង លើការរៀបចំគោលការណ៍ ហិរញ្ញប្បទានពិសេស ក្រោមកម្មវិធីហិរញ្ញប្បទាន១០០លានដុល្លារ ដើម្បីលើកស្ទួយផលិតកម្មកសិកម្ម រកទីផ្សារ និងរក្សាលំនឹងថ្លៃកសិផល កាលពីថ្ងៃទី៥ ខែកុម្ភៈ ឆ្នាំ ២០២៤ នៅទីស្នាក់ការកណ្តាលARDB។
លោកថ្លែងថា “កម្មវិធីហិរញ្ញប្បទាននេះ ជាវិធានការអន្តរាគមន៍ពិសេសរបស់រាជរដ្ឋាភិបាល ក្នុងការផ្តល់ជាទុនបង្វិលដល់អតិថិជនគោលដៅ”។
សម្រាប់វិស័យស្រូវអង្ករ ហិរញ្ញប្បទានពិសេសនេះ មានគោលដៅផ្តល់ជូន រោងម៉ាស៊ីនកិនស្រូវ និងក្រុមហ៊ុននាំចេញអង្ករក្នុងការប្រមូលទិញស្រូវ ដើម្បីរក្សាលំនឹង និងសិ្ថរភាពថ្លៃសំដៅបង្កើនបរិមាណសន្និធិផ្គត់ផ្គង់ ដល់ការកែច្នៃប្រើប្រាស់ក្នុងស្រុក សន្តិសុខស្បៀង និងការនាំចេញ។
លោកកៅ ថាចបានពន្យល់ថា មូលនិធិនេះគឺបានត្រៀមទុកនៅឆ្នាំនេះក្នុងអាណត្តិទី៧ របស់រដ្ឋាភិបាល។ មូលនិធិនេះ ត្រូវបានបម្រុងទុក ដើម្បីបញ្ចេញនៅពេលមានការប្រែប្រួលតម្លៃ ក្នុងរដូវប្រមូលផល។ រហូតមកដល់ពេលនេះ យើងមិនទាន់បញ្ចេញនៅឡើយទេ។
លោកឧកញ៉ាសុង សារ៉ន អគ្គនាយកក្រុមហ៊ុន Amru Rice (Cambodia) Co., Ltd មានទំនុកចិត្តថា ក្រុមហ៊ុននាំចេញជាច្រើនដែលតែងរាយការណ៍ ពីការខ្វះខាតដើមទុន ក្នុងរដូវប្រមូលផលស្រូវនឹងអាចបង្កើនការទិញស្រូវពីកសិករ ដើម្បីកិនស្រូវសម្រាប់នាំចេញក៏ដូចជាស្តុកទុក។
លោកបន្ថែមថា “រដ្ឋាភិបាលយកចិត្តទុកដាក់ជានិច្ច ក្នុងការលើកស្ទួយវិស័យស្រូវអង្ករ ដោយសារយើងធ្លាប់ជួបប្រទះ នឹងការខ្វះខាតដើមទុនក្នុងការទិញស្រូវពីកសិករ ដែលនាំឱ្យមានឧបសគ្គ និងការធ្លាក់ចុះតម្លៃ”។
ក្រសួងពាណិជ្ជកម្ម កាលពីថ្ងៃទី ២៥ ខែមករា បានបើកកិច្ចប្រជុំផ្ទៃក្នុង ដោយគ្រោងបង្កើតទីផ្សារលក់ដុំ នៅទូទាំងប្រទេសជាវិធានការមួយ ដែលធ្វើឱ្យតម្លៃមានស្ថិរភាព និងពង្រីកឱកាសទីផ្សារសម្រាប់កសិករ ដែលជាអ្នកងាយទទួលរងគ្រោះបំផុត ដោយសារការទម្លាក់តម្លៃដោយឈ្មួញកណ្តាល៕
