ដោយៈ គង់ ម៉ាលីនណា
ព្រះសីហនុៈ របាយការណ៍បានឲ្យដឹងថា ទំហំនៃការនាំចូល និងនាំចេញឆ្លងកាត់ តំបន់សេដ្ឋកិច្ចពិសេសក្រុងព្រះសីហនុ (SSEZ) បានកើនឡើងដល់៣,៣៦ប៊ីលានដុល្លារ កាលពីឆ្នាំ២០២៣ កើនឡើង៣៤,៨ ភាគរយ ធៀបនឹងរយៈពេលមួយឆ្នាំ។
ដោយមានការបណ្តាក់ទុនរួមគ្នាដោយវិនិយោគិនចិន និងកម្ពុជា SSEZ គឺជាគម្រោងលេចធ្លោមួយ ក្រោមគំនិតផ្តួចផ្តើមខ្សែក្រវ៉ាត់និងផ្លូវ (BRI)។
យោងតាមប្រភពដដែល “ទំហំពាណិជ្ជកម្មនៅតំបន់សេដ្ឋកិច្ចពិសេសក្រុងព្រះសីហនុ មានចំនួនប្រហែល៧,១៨ ភាគរយ នៃទំហំពាណិជ្ជកម្មសរុបរបស់ប្រទេសកម្ពុជា” ។
តំបន់សេដ្ឋកិច្ចដែលមានទំហំ១១គីឡូម៉ែត្រការ៉េ បានទាក់ទាញការវិនិយោគសរុបចំនួន២,២៧ប៊ីលានដុល្លារ ដោយមានសហគ្រាសសរុបចំនួន១៨០ មកពីប្រទេសចិន អឺរ៉ុប សហរដ្ឋអាមេរិក អាស៊ីអាគ្នេយ៍ ព្រមទាំងប្រទេស និងតំបន់ផ្សេងទៀត ដោយបង្កើតការងារប្រហែល៣០,០០០កន្លែង សម្រាប់ប្រជាពលរដ្ឋក្នុងស្រុក។
លោកបណ្ឌិតសុខ ស៊ីផាន់ណា ទេសរដ្ឋមន្ត្រី និងជាប្រធានក្រុមប្រឹក្សាភិបាល នៃវិទ្យាស្ថានចក្ខុវិស័យអាស៊ី បានមានប្រសាសន៍ថា SSEZ រួមជាមួយនឹងគម្រោងBRIធំៗផ្សេងទៀត បានជំរុញយ៉ាងខ្លាំងដល់ការអភិវឌ្ឍន៍ និងការតភ្ជាប់សេដ្ឋកិច្ចរបស់កម្ពុជា។
លោកបានប្រាប់សារព័ត៌មាន Xinhua នៅក្នុងបទសម្ភាសន៍ថ្មីៗនេះថា ការសាងសង់សួនឧស្សាហកម្មជាច្រើន ដូចជា តំបន់សេដ្ឋកិច្ចពិសេសក្រុងព្រះសីហនុ និងការពង្រីកការផលិតសំបកកង់រថយន្ត និងរោងចក្រស៊ីម៉ងត៍ បានធ្វើឱ្យកម្រិតឧស្សាហូបនីយកម្មនៅកម្ពុជាកាន់តែប្រសើរឡើង និងបង្កើតការងារ និងចំណូលពន្ធយ៉ាងច្រើនសម្រាប់ប្រទេសកម្ពុជា។
ជាមួយគ្នានេះលោក នាក់ ចិន្តារិទ្ធិ ប្រធានមជ្ឈមណ្ឌលកម្ពុជាដើម្បីស្រាវជ្រាវផ្លូវសូត្រសមុទ្រសតវត្សរ៍ទី២១ បាននិយាយថា SSEZ មានទីតាំងនៅជិតកំពង់ផែស្វយ័តក្រុងព្រះសីហនុ ដែលផ្តល់ភាពងាយស្រួលសម្រាប់ពាណិជ្ជកម្មរវាងកម្ពុជា និងពិភពលោក។
លោកបានប្រាប់សារព័ត៌មាន Xinhua កាលពីថ្ងៃចន្ទថា “តំបន់សេដ្ឋកិច្ចពិសេសបានរួមចំណែក ក្នុងការជំរុញកំណើនសេដ្ឋកិច្ចរបស់ប្រទេសកម្ពុជា”។
លោកបន្តថា តំបន់ឧស្សាហកម្មនេះ រួមជាមួយនឹងគម្រោង BRI ផ្សេងទៀតបាន និងកំពុងដើរតួនាទីយ៉ាងសំខាន់ ក្នុងការជួយកម្ពុជាសម្រេចបាននូវគោលដៅ ប្រកបដោយមហិច្ឆិតារបស់ខ្លួន ក្នុងការក្លាយជាប្រទេស ដែលមានចំណូលមធ្យមកម្រិតខ្ពស់ នៅឆ្នាំ២០៣០ និងជាប្រទេសដែលមានចំណូលខ្ពស់ នៅឆ្នាំ២០៥០”៕
