ដោយៈ គង់ ម៉ាលីនណា
សៀមរាបៈ អភិបាលរងខេត្តសៀមរាប លោក យុន លីនណេ បានចូលរួមបើកកិច្ចប្រជុំពិនិត្យទីតាំង និងត្រៀមរៀបចំព្រឹត្តិការណ៍បុណ្យទន្លេលើកទី៨ ក្នុងខែមិនាខាងមុខនេះ។
កិច្ចប្រជុំនវដឹកនាំដោយ លោកសូ ម៉ារ៉ា រដ្ឋលេខាធិការក្រសួងទេសចរណ៍ និងមន្រ្តីពាក់ព័ន្ឋ។
ព្រឹត្តិការណ៍បុណ្យទន្លេលើកទី៨នេះ គ្រោងនឹងរៀបចំសកម្មភាពកម្សាន្តជាច្រើន ដូចជា ទស្សនីយភាពសិល្បៈ ការតាំងពិព័រណ៍ ការប្រណាំងកង់ ការរត់កម្សាន្ត ការប្រណាំងទូក ការប្រកួតវាយកូនគោលជាដើម។ល។
ថ្លែងនៅក្នុងកិច្ចប្រជុំពិភាក្សាការងារ និងពិនិត្យទីតាំងត្រៀមរៀបចំព្រឹត្តិការណ៍បុណ្យទន្លេលើកទី៨ បានឱ្យដឹងថា កម្មវិធីបុណ្យទន្លេលើកទី៨នោះ គ្រោងនឹងប្រព្រឹត្តិទៅនៅថ្ងៃទី១៦ -១៨ ខែមីនា ឆ្នាំ២០២៤ ខាងមុខនេះ។ ជាមួយគ្នានេះផងដែរ ពិធីបុណ្យទន្លេត្រូវបានរៀបចំឡើង ក្នុងគោលបំណងបំផុសចលនាមហាជន ឱ្យចូលរួមក្នុងការងារអភិវឌ្ឍធនធានទន្លេ ប្រកបដោយនិរន្តភាព និងចូលរួមសម្រេចយុទ្ធនាការពិពិធកម្មទេសចរណ៍ តាមរយៈការបង្កើតព្រឹត្តិការណ៍ទេសចរណ៍ថ្មីៗ សម្រាប់ខេត្ត ជាប់តាមដងទន្លេនៃកម្ពុជា និងដើម្បីទាក់ទាញភ្ញៀវទេសចរណ៍ជាតិ និង អន្តរជាតិឲ្យបានច្រើន មកចូលរួមទស្សនាកម្សាន្ត ក្នុងអំឡុងព្រឹត្តិការណ៍នេះ។
លោកបន្ថែមថា ក្រៅពីមានបំណងទាក់ទាញភ្ញៀវទេសចរចូលរួមបុណ្យទន្លេ នេះក៏ជាឱកាសបំផុសចលនាមហាជន ឲ្យចូលរួមក្នុងការងារអភិវឌ្ឍន៍ ធនធានទន្លេប្រកបដោយនិរន្តភាព និងចូលរួមសម្រេចយុទ្ធនាការពិពិធកម្មទេសចរណ៍ តាមរយៈការបង្កើតព្រឹត្តិការណ៍ទេសចរណ៍ថ្មីៗ នៅតាមបណ្ដាខេត្ត ជាប់តាមដងទន្លេ របស់កម្ពុជាផងដែរ៕
