ដោយ៖ សាវុធ
ភ្នំពេញ៖ កម្ពុជាទទួលបានគម្រោងវិនិយោគឯកជនចំនួន១១៣ ដែលមានតម្លៃ ២ ៣២៩ លានដុល្លារ ក្នុងរយៈពេល ៨ ខែឆ្នាំ ២០២០ ធ្លាក់ចុះជាង ១៦ ភាគរយ បើប្រៀបធៀបនឹងរយៈពេលដូចគ្នាឆ្នាំ ២០១៩ ដោយសារការជះឥទ្ធិពលការឆ្លងរាលដាលកូវីដ១៩។ នេះបើយោងតាមរបាយការណ៍ក្រសួងសេដ្ឋកិច្ច និងហិរញ្ញវត្ថុ។
ជាមួយគ្នានេះ គម្រោងទាំងនេះ បានបង្កើតឱកាសការងារ ៨៤ ៤៣២ កន្លែង ក្នុងរយៈពេល ៨ខែ ឆ្នាំនេះ។
ទុនវិនិយោគ ដែលបានមកពីគម្រោងវិនិយោគឯកជនសរុប ១១៣ គម្រោងនេះ មានចំនួន ២ ៣២៩ លានដុល្លារ ថយចុះ ៥៧,១ ភាគរយ។
យ៉ាងណាក៏ដោយរបាយការណ៍ខាងលើបានឱ្យដឹងថា ទោះបីគម្រោងវិនិយោគជារួមធ្លាក់ចុះ ប៉ុន្តែសម្រាប់គម្រោងវិនិយោគវិស័យឧស្សាហកម្មបានកើនឡើង ៨គម្រោង។
គម្រោងវិនិយោគឯកជនសំដៅដល់គម្រោងវិនិយោគក្រៅតំបន់សេដ្ឋកិច្ចពិសេសដែលទទួលបានការអនុញ្ញាតដោយក្រុមប្រឹក្សាអភិវឌ្ឍន៍កម្ពុជា។
អ្នកជំនាញ បានលើកឡើងថា ការធ្លាក់ចុះនេះពិតណាស់គឺដោយសារការឆ្លងរាលដាលជំងឺកូវីដ ១៩ ដែលបានរាំងខ្ទប់មិនឱ្យវិនិយោគិនបរទេសចូលមកប្រទេសកម្ពុជាបាន។
ទោះយ៉ាងណាក្នុងអំឡុងពេលនេះរដ្ឋាភិបាលក៏បានដាក់ចេញនូវប្រព័ន្ធចុះបញ្ជីពាណិជ្ជកម្មតាមប្រព័ន្ធអនឡាញដើម្បីជួយសម្រួលដល់វិនិយោគិនដែលចង់បើកក្រុមហ៊ុនផងដែរ៕
