ដោយ: គង់ លាងហួរ
អន្តរជាតិ: ផ្សារហ៊ុននៅតំបន់អាស៊ីបានងើបឡើងថ្លៃ នៅថ្ងៃច័ន្ទនេះ ដែលជំរុញដោយការជួញដូរផ្សារហ៊ុនរបស់ប្រទេសចិន បន្ទាប់ពីក្រុមនិយតករចិនបានចាត់វិធានការថ្មីកាលពីចុងសប្តាហ៍ ដើម្បីគាំទ្រដល់ទីផ្សារ។
សន្ទស្សន៍ ភាគហ៊ុន អាស៊ី ប៉ាស៊ីហ្វិក របស់ក្រុមហ៊ុនអាមេរិក MSCI នៅ ក្រៅប្រទេសជប៉ុន បានងើបឡើងថ្លៃ០,៤៨ភាគរយ ក្នុងការជួញដូរនៅព្រឹកថ្ងៃច័ន្ទដើមសប្តាហ៍នេះ។
ផ្សារហ៊ុន Nikkei របស់ប្រទេសជប៉ុនបានងើបឡើងថ្លៃ០,៩៣ភាគរយ ខណៈដែលសន្ទស្សន៍ផ្សារហ៊ុន Hang Seng របស់ទីក្រុងហុងកុងបានងើបឡើងថ្លៃ១,១៤ភាគរយនៅពេលបើក។
សន្ទស្សន៍ផ្សារហ៊ុនបន្ទះឈីបពណ៌ខៀវ CSI300 របស់ប្រទេសចិន បានធ្លាក់ថ្លៃចុះ០,២៥ភាគរយ ខណៈសន្ទស្សន៍ផ្សារហ៊ុន Shanghai Composite បានធ្លាក់ថ្លៃចុះ០,៣៥ភាគរយ។
ផ្សារហ៊ុនរបស់ប្រទេសអូស្ត្រាលី S&P /ASX 200 បានងើបឡើងថ្លៃ០,១៥ភាគរយ ខណៈដែលសន្ទស្សន៍ផ្សារហ៊ុន KOSPI របស់ប្រទេសកូរ៉េខាងត្បូងបានងើបឡើងថ្លៃ១,២២ភាគរយ។
យោងតាមការស្ទង់មតិរបស់ក្រុមហ៊ុន S&P Global បានបង្ហាញថា សកម្មភាពអាជីវកម្មរបស់សហរដ្ឋអាមេរិកបានកើនឡើងនៅក្នុងខែមករានេះ ហើយអតិផរណាកំពុងមានការធ្លាក់ចុះ។
សេដ្ឋកិច្ចអាមេរិកដ៏រឹងមាំ និងការឆ្លើយតបអវិជ្ជមានពីក្រុមមន្ត្រីធនាគារកណ្តាលកំពុងជំរុញឱ្យអ្នកវិនិយោគមួយចំនួនគិតពិចារណាឡើងវិញនូវការភ្នាល់របស់ពួកគេថា តើធនាគារ Fed នឹងកាត់បន្ថយអត្រាការប្រាក់លឿនប៉ុណ្ណានៅឆ្នាំនេះ។
នៅពេលនេះ ទីផ្សារមើលឃើញឱកាសត្រឹមតែ៤៨ភាគរយប៉ុណ្ណោះ នៃការកាត់បន្ថយអត្រាការប្រាក់ ដោយធនាគារកណ្តាលអាមេរិក(Fed) នៅខែមីនាខាងមុខ បើធៀបនឹងឱកាស៨៦ភាគរយកាលពីចុងខែធ្នូ។ នេះបើយោងតាមឧបករណ៍ CME FedWatch។
សន្ទស្សន៍ប្រាក់ដុល្លារ ដែលវាស់វែងរូបិយប័ណ្ណដុល្លារអាមេរិក ធៀបនឹងរូបិយប័ណ្ណគូប្រជែងចំនួន៦ ដូចជាប្រាក់អឺរ៉ូ និងប្រាក់យ៉េន បានងើបឡើងថ្លៃ០,០១ភាគរយ ដល់១០៣,៥៥ពិន្ទុនៅថ្ងៃច័ន្ទនេះ។
ចំណែក តម្លៃប្រេងបានកើនឡើង១ភាគរយនៅថ្ងៃច័ន្ទនេះ ដោយសារការព្រួយបារម្ភអំពីការផ្គត់ផ្គង់ប្រេងឥន្ធនៈ បន្ទាប់ពីកាំជ្រួចមួយបានវាយប្រហារលើនាវាដឹកប្រេងដែលដំណើរការដោយក្រុមហ៊ុន Trafigura នៅសមុទ្រក្រហម។
តួយ៉ាង តម្លៃប្រេងឆៅ Brent futures បានកើនឡើង៨៣សេនដល់៨៤,៣៨ដុល្លារក្នុងមួយបារ៉ែល គិតត្រឹមម៉ោងសកល 2341 GMT ខណៈតម្លៃប្រេងឆៅ West Texas Intermediate របស់អាមេរិកបានកើនឡើង៧៨សេនដល់៧៨,៧៩ដុល្លារក្នុងមួយបារ៉ែល៕