ដោយៈ គង់ ម៉ាលីនណា
ភ្នំពេញៈ សាជីវកម្មធានាឥណទានកម្ពុជា(CGCC) ត្រូវបានទទួលស្គាល់ ដោយនិយ័តករមូលបត្រកម្ពុជា (SERC) ជាស្ថាប័នធានាសញ្ញាបណ្ណដំបូងគេនៅកម្ពុជា ដែលអនុញ្ញាតឱ្យពួកគេគាំទ្រដល់ក្រុមហ៊ុនក្នុងស្រុក ដើម្បីបោះផ្សាយមូលបត្របំណុល ដើម្បីបង្កើនសន្ធនីយភាពប្រាក់រៀលនៅលើទីផ្សារ និងធ្វើឱ្យប្រសើរឡើងនូវចំណាត់ថ្នាក់ឥណទាននៃសញ្ញាបណ្ណសាជីវកម្ម។
CGCC ក៏ត្រូវបានទទួលចំណាត់ថ្នាក់ khAAAby ពីទីភ្នាក់ងារវាយតម្លៃកម្ពុជា (RAC) និងRAC គឺជាភ្នាក់ងារផ្ដល់ចំណាត់ថ្នាក់ឥណទានមួយ ដែលបានទទួលស្គាល់ ដោយនិយ័តករមូលបត្រកម្ពុជា (SERC) ។
លោក Wong KeetLoong អគ្គនាយក CGCC បានឱ្យដឹងថា ជាមួយនឹងចំណាត់ថ្នាក់នេះ វាអនុញ្ញាតឱ្យក្រុមហ៊ុនលោកជួយដល់សហគ្រាសធុនតូច និងមធ្យមដើម្បីរកមូលនិធិបន្ថែម តាមរយៈការបោះផ្សាយមូលបត្របំណុល។
លោកបានបញ្ជាក់ថា “ការផ្ដល់ចំណាត់ថ្នាក់នេះ ឆ្លុះបញ្ចាំងពីសមត្ថភាពហិរញ្ញវត្ថុរបស់ក្រុមហ៊ុន ក្នុងការជួយដល់សហគ្រាសធុនតូច និងមធ្យមធំៗ ដែលអាចបោះផ្សាយមូលបត្របំណុល ដែលជាប្រភពទុន សម្រាប់ផ្តល់មូលនិធិពង្រីកអាជីវកម្មរបស់ពួកគេ”។ លោកបន្ថែមថា “CGCC បន្តដើរតួនាទីយ៉ាងសំខាន់ ក្នុងការគាំទ្រដល់ការអភិវឌ្ឍសេដ្ឋកិច្ច និងពង្រឹងទំនុកចិត្ត និងការជឿជាក់បន្ថែមទៀតដល់ដៃគូរបស់យើង”។
ជាមួយគ្នានេះ លោក ស៊ូ សុជាតិ អគ្គនាយក SERC បានឱ្យដឹងថា ជាមួយនឹងការផ្ដល់ចំណាត់ថ្នាក់នេះ CGCC អាចចូលរួមចំណែកជួយដល់ក្រុមហ៊ុនផ្សេងទៀត ក្នុងការចេញមូលបត្របំណុលនៅលើទីផ្សារភាគហ៊ុន។
លោកបញ្ជាក់ថា “ស្ថាប័នCGCC គឺជាក្រុមហ៊ុនធានានៅក្នុងទីផ្សារមូលបត្រកម្ពុជា ហើយការផ្ដល់ចំណាត់ថ្នាក់ខ្លួន បង្ហាញពីភាពរឹងមាំរបស់ក្រុមហ៊ុនមួយនេះ។ លើសពីនេះ ការផ្ដល់ចំណាត់ថ្នាក់របស់ CGCC បង្ហាញ និងចាប់ផ្តើមវប្បធម៌នៃការផ្ដល់ចំណាត់ថ្នាក់ ដើម្បីបង្កើនទំនុកចិត្តពីសាធារណជន ហើយវាក៏បង្ហាញពីការប្តេជ្ញាចិត្ត និងឆន្ទៈរបស់ក្រុមហ៊ុន ក្នុងការចូលរួមយ៉ាងសកម្មនៅក្នុងទីផ្សារមូលបត្របំណុលរបស់យើងផងដែរ។
CGCC បានបង្កើត “ក្របខ័ណ្ឌគោលនយោបាយស្តីពី ការធានាមូលបត្របំណុល” ហើយបានទទួលការយល់ព្រម ពីលោករដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ កាលពីថ្ងៃទី១៧ ខែឧសភា ឆ្នាំ ២០២៣។ កាលពីថ្ងៃទី២២ ខែសីហា ឆ្នាំ២០២៣ និយ័តករមូលបត្រកម្ពុជា (SERC) បានចេញលិខិតទទួលស្គាល់មួយដល់ CGCC ជាក្រុមហ៊ុនធានា សម្រាប់ការចេញមូលបត្របំណុល ដើម្បីគាំទ្រដល់ក្រុមហ៊ុន ក្នុងស្រុកដែលប្រមូលមូលនិធិ និងការអភិវឌ្ឍវិស័យមូលបត្រនៅកម្ពុជា។
CGCC ត្រូវបានបង្កើតឡើងដោយអនុក្រឹត្យលេខ ១៤០/អនក្រ/បក ចុះថ្ងៃទី១ ខែកញ្ញា ឆ្នាំ២០២០ ហើយផែនការធានាការស្ទុះងើបឡើងរបស់អាជីវកម្ម(BRGS) ដែលមានទឹកប្រាក់ចំនួន២០០ លានដុល្លាររបស់ខ្លួន បានចាប់ផ្តើមដំណើរការ កាលពីថ្ងៃទី២៩ ខែមីនា ឆ្នាំ២០២១ ក្នុងគោលបំណងពង្រីកលទ្ធភាព ទទួលបានប្រាក់កម្ចីជាផ្លូវការពីគ្រឹះស្ថានហិរញ្ញវត្ថុដែលចូលរួម (PFI) សម្រាប់ទុនបង្វិល ការវិនិយោគ និងការពង្រីកអាជីវកម្ម។
យោងតាមទិន្នន័យ ដែលបានចេញផ្សាយកាលពីថ្ងៃទី២២ ខែធ្នូ CGCC មានប្រាក់កម្ចីសរុបមានចំនួន១១៣,៩៦ លានដុល្លារ ជាមួយនឹងកម្ចីមិនដំណើរការ (NPL) មានចំនួនប្រមាណ៥,៤១ភាគរយ៕
