ដោយៈ គង់ សូរិយា
ភ្នំពេញៈ គំរោងសាងសង់ស្ពានមិត្តភាពកម្ពុជា អរិយក្សត្រ ដែលប្រជាពលរដ្ឋទន្ទឹងរង់ចាំជាយូរមកហើយ បាននិងកំពុងសិក្សានិតិវិធីនានា។
លោក ផន រីម អ្នកនាំពាក្យក្រសួងសាធារណការ និងដឹកជញ្ជូនបានបញ្ជាក់ឲ្យដឹងកាលពីព្រឹកថ្ងៃទី ២២ ខែមករាកន្លងមកថា គម្រោងសាងសង់ស្ពានមិត្តភាពកម្ពុជា-កូរ៉េ ភ្ជាប់ពីចំណុចផ្សាររាត្រី ឆ្ពោះទៅតំបន់អរិយក្សត្រឆ្លងកាត់ទន្លេសាប និងទន្លេមេគង្គ នឹងបញ្ចប់នីតិវិធីនានានៅអំឡុងត្រីមាសទី១ ឆ្នាំ២០២៤ នេះ។
លោកបញ្ជាក់ថា “នីតិវិធីនានានឹងបញ្ចប់ នៅអំឡុងត្រីមាសទី១ ឆ្នាំ២០២៤ ខណៈការជ្រើសរើសក្រុមហ៊ុនសាងសង់ នឹងត្រូវអនុម័តនៅចុងឆ្នាំ២០២៤”។
ស្ពានមិត្តភាពកម្ពុជា-កូរ៉េ ដែលមានតម្លៃជិត៣០០ លានដុល្លារអាមេរិកភ្ជាប់ពីចំណុចផ្សាររាត្រី ឆ្ពោះទៅតំបន់អរិយក្សត្រត្រូវបានចុះហត្ថលេខារវាងរាជរដ្ឋាភិបាលនៃកម្ពុជា និងរដ្ឋាភិបាលនៃសាធារណរដ្ឋកូរ៉េកាលពីថ្ងៃទី០៩ ខែធ្នូ ឆ្នាំ២០២២ កន្លងទៅ។
យ៉ាងណាម៉ិញ បើតាមអ្នកនាំពាក្យក្រសួងសាធារណការ និងដឹកជញ្ជូន ពាក់ព័ន្ធគម្រោងបើកការដ្ឋានស្ថាបនាផ្លូវការ នៅពុំទាន់កំណត់ពេលវេលាជាក់លាក់នៅឡើយទេ។ បន្ទាប់ពីបញ្ចប់នីតិវិធីរៀបចំប្លង់លម្អិតរួច នឹងអនុម័តលើការជ្រើសរើស ក្រុមហ៊ុនសាងសង់នៅចុងឆ្នាំ២០២៤ ។
តាមរយៈគម្រោងសាងសង់ស្ពានមិត្តភាពកម្ពុជា- សាធារណរដ្ឋកូរ៉េ (ផ្សារចាស់-ជ្រោយចង្វារ ជ្រោយចង្វារ-អរិយក្សត្រ) នឹងជួយជំរុញឲ្យតម្លៃអចលនទ្រព្យ នៅតំបន់នោះហក់ឡើង ជាពិសេសនឹងប្រែក្លាយតំបន់ម្ខាង នៃដងទន្លេនៃតំបន់អរិយក្សត្រ ជាទីក្រុងរណបថ្មី ខណៈទីនោះ កំពុងមានការអភិវឌ្ឍ លើហេដ្ឋារចនាសម្ព័ន្ធរួមទាំងគម្រោងបុរីជាច្រើន។
អតីតរដ្ឋមន្រ្តីក្រសួងសាធារណៈការ និងដឹកជញ្ជូន លោកស៊ុន ចាន់ថុល ធ្លាប់បានបញ្ជាក់ម្តងហើយម្តងទៀតថា គំរោងសាងសង់ស្ពានដ៏មានសារៈសំខាន់នេះ នឹងចាប់ផ្តើមនៅឆ្នាំ២០២៤នេះ។
ទោះជាយ៉ាងណា អ្នកតាមដានការវិវត្ត នៃវិស័យហេដ្ឋារចនាសម្ព័ន្ឋនៅកម្ពុជាបានលើកឡើងថា ភាពជាក់លាក់នៃគំរោងដ៏ធំនេះ មិនអាចកំណត់ពេលជាក់លាក់នៅឡើយទេ ពិសេសគំរោងក្រោមហិរញ្ញប្បទានរបស់សាធារណៈរដ្ឋកូរ៉េ តែងតែមានភាពយឺតយ៉ាវជាធម្មតា ដូចករណីស្ថាបនាផ្លូវជាតិលេខ២ជាដើម ប៉ុន្តែការណ៍នេះជារឿងធម្មតា សម្រាប់ការសាងសង់អ្វីមួយ ដែលមានទឹកប្រាក់ច្រើន និងនិតិវិធីស្មុគ្រស្មាញបែបនេះ៕