ដោយ: គង់ លាងហួរ
អន្តរជាតិ: នាយករដ្ឋមន្ត្រីថៃលោក សេដ្ឋា ថាវីស៊ីន បានថ្លែងថា ប្រទេសថៃ មិនគួរបន្តប្រើប្រាស់តម្លៃពលកម្មទាប ជាការលើកទឹកចិត្តដើម្បីទាក់ទាញការវិនិយោគពីបរទេសនោះទេ ដោយលោកជំរុញឱ្យបណ្តាប្រទេសអាស៊ានធ្វើការរួមគ្នា ដើម្បីបង្កើនប្រាក់ឈ្នួលអប្បបរមា។
លោកលើកឡើងថា តម្លៃពលកម្មថោក គឺជាបញ្ហារារាំងដល់កំណើនសេដ្ឋកិច្ចក្នុងតំបន់។ នេះបើយោងតាមការចុះផ្សាយដោយសារពត៌មាន Thai PBS កាលពីថ្ងៃទី១៩ ខែមករា ឆ្នាំ២០២៤។
លោកសេដ្ឋា គ្រោងជួបជាមួយសម្តេចធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា និងនាយករដ្ឋមន្ត្រីម៉ាឡេស៊ី លោក Anwar Ibrahim ដើម្បីពិភាក្សាអំពីរបៀប ដែលបណ្តាប្រទេសអាស៊ានគួរពិចារណា ដំឡើងប្រាក់ឈ្នួលអប្បបរមារបស់ពួកគេ។
លោក សេដ្ឋា ថាវីស៊ីន បានថ្លែងនៅខាងក្រៅវេទិកាសេដ្ឋកិច្ចពិភពលោក នៅឯទីក្រុង Davos ថា “តម្លៃពលកម្មថោកមិនគួរយកមកធ្វើជាចំណុចទាក់ទាញ អ្នកវិនិយោគនោះទេ។ ប៉ុន្តែចំណុចដែលទាក់ទាញគួរតែជាថាមពលស្អាត សាលារៀនអន្តរជាតិល្អ ប្រព័ន្ធថែទាំសុខភាពសាធារណៈល្អ ទីផ្សារមូលធនត្រឹមត្រូវ គ្មានអំពើពុករលួយ និងភាពងាយស្រួលនៃការធ្វើអាជីវកម្ម”។
លោកគូសបញ្ជាក់ថា ថ្នាក់ដឹកនាំរបស់បណ្តាប្រទេសអាស៊ានគួរតែសហការគ្នា ដើម្បីដំឡើងប្រាក់ឈ្នួលអប្បបរមា ឲ្យឡើងដល់កម្រិតសមរម្យសម្រាប់កម្មករ និងនិយោជិត។
លោកបានបន្ថែមទៀតថា “ការលើកទឹកចិត្តផ្សេងទៀត គួរតែត្រូវបានប្រើប្រាស់ ដើម្បីទាក់ទាញការវិនិយោគ ពីសហរដ្ឋអាមេរិក អឺរ៉ុប និងប្រទេសចិន”៕
