ដោយ: គង់ លាងហួរ
អន្តរជាតិ: យោងតាមសារព័ត៌មាន Bloomberg បានចុះផ្សាយថា សហរដ្ឋអាមេរិកបាននាំមុខប្រទេសអូស្ត្រាលី និងប្រទេសកាតា ដោយក្លាយជាប្រទេសនាំចេញឧស្ម័នធម្មជាតិរាវ (LNG) ដ៏ធំបំផុតនៅលើពិភពលោកកាលពីឆ្នាំមុន។
ជាក់ស្តែង ក្នុងឆ្នាំ២០២៣ សហរដ្ឋអាមេរិកបាននាំចេញឧស្ម័នធម្មជាតិរាវ (LNG) ចំនួន៩១,២លានតោន។ ការនាំចេញបានកើនឡើង ខណៈក្រុមហ៊ុននាំចេញឧស្ម័នធម្មជាតិរាវ Freeport LNG បានបើកដំណើរការឡើងវិញ បន្ទាប់ពីផ្អាកអស់រយៈពេល ៨ខែ ដោយសារគ្រោះថ្នាក់អគ្គិភ័យកាលពីខែមិថុនា ឆ្នាំ២០២២កន្លងទៅ។
ជាមួយគ្នានេះ បណ្តាប្រទេសដែលជាសមាជិករបស់សហភាពអឺរ៉ុប (EU) កំពុងបង្កើនការនាំចូលថាមពល ដើម្បីកាត់បន្ថយការពឹងផ្អែកលើការនាំចូលឧស្ម័នពីប្រទេសរុស្ស៊ី។
ចំណែកឯ ប្រទេសអូស្ត្រាលីជាប្រទេសនាំចេញឧស្ម័នធម្មជាតិរាវ (LNG) ធំជាងគេទី២ កាលពីឆ្នាំមុន ខណៈប្រទេសកាតាដែលជាអ្នកនាំមុខគេក្នុងការនាំចេញ LNG ក្នុងឆ្នាំ២០២២ បានធ្លាក់មកនៅចំណាត់ថ្នាក់លេខ៣ ដោយការផ្គត់ផ្គង់ឧស្ម័នរបស់ប្រទេសនេះទៅកាន់ទីផ្សារពិភពលោកបានធ្លាក់ចុះ១,៩ភាគរយ។
ក្នុងឆ្នាំ២០២៤នេះ គម្រោងឧស្ម័នធម្មជាតិរាវ (LNG) ថ្មីចំនួន២ របស់សហរដ្ឋអាមេរិក នឹងចាប់ផ្តើមបើកប្រតិបត្តិការ។ គម្រោងទាំង២នោះ រួមមាន រោងចក្រ Venture Global LNG ដែលស្ថិតនៅទីក្រុង Plaquemines រដ្ឋ Louisiana និងមួយទៀត ស្ថិតនៅមជ្ឈមណ្ឌល Gloden Pass ក្នុងរដ្ឋតិចសាស់ ដែលជាគម្រោងបណ្តាក់ទុនរួមគ្នារវាងក្រុមហ៊ុន Exxon Mobil និងក្រុមហ៊ុន QatarEnergy។
នៅពេលបើកដាក់ឱ្យដំណើរការពេញលេញ គម្រោងទាំងពីរនេះនឹងជួយបង្កើនទិន្នផលឧស្ម័នធម្មជាតិរាវ (LNG) របស់អាមេរិកឱ្យបាន៣៨លានតោនក្នុងមួយឆ្នាំ៕
