ដោយៈ គង់ ម៉ាលីនណា
ភ្នំពេញៈ ប្រាក់កម្ចីសរុបនៅក្នុងវិស័យមីក្រូហិរញ្ញវត្ថុ នៅកម្ពុជាមានទំហំ៥.១៣ ពាន់លានដុល្លារអាមេរិក ក្នុងកំឡុងចុងត្រីមាសទី៣ នៃឆ្នាំមុន។ នេះបើយោងតាមទិន្នន័យចុងក្រោយ ដែលបានចេញផ្សាយដោយសមាគមមីក្រូហិរញ្ញវត្ថុកម្ពុជា (CMA)។
របាយការណ៍ដដែលបានឲ្យដឹងទៀតថា ចំនួនអ្នកខ្ចីបានដល់១.៦ លាននាក់ ដែលមាន៥៥ភាគរយជាស្ត្រី ហើយចំនួនអ្នកដាក់ប្រាក់បញ្ញើមានចំនួន១,៩២លាននាក់។
សមតុល្យប្រាក់បញ្ញើនៅទូទាំង ស្ថាប័នមីក្រូហិរញ្ញវត្ថុទាំងអស់ក្នុងប្រទេស ត្រូវបានប៉ាន់ប្រមាណថាមានចំនួន២.២៤ ពាន់លានដុល្លារ។
យោងតាមCMAបានឲ្យដឹងផងដែរថា វិស័យនេះមានបុគ្គលិកចំនួន២១,៤០៦នាក់ ដែលកំពុងធ្វើការនៅក្នុងស្ថាប័ន មីក្រូហិរញ្ញវត្ថុទូទាំងប្រទេស គិតត្រឹមត្រីមាសទី៣ ឆ្នាំ ២០២៣ និងមានការិយាល័យចំនួន ៩០៨ នៅទូទាំងប្រទេស។
លោក សុខ វឿន ប្រធានសមាគមមីក្រូហិរញ្ញវត្ថុកម្ពុជាបានមានប្រសាសន៍ឲ្យដឹងថា វិស័យមីក្រូហិរញ្ញវត្ថុរបស់កម្ពុជាបានផ្លាស់ប្តូរទៅជាមូលដ្ឋានគ្រឹះ នៃកំណើនសេដ្ឋកិច្ចរបស់ប្រទេស និងកិច្ចខិតខំប្រឹងប្រែងកាត់បន្ថយភាពក្រីក្រ ក្នុងរយៈពេល៣០ឆ្នាំចុងក្រោយនេះ។
លោកលើកឡើងថា “បង្កើតឡើងដោយសាស្រ្តាចារ្យ Muhammad Yunus នៅប្រទេសបង់ក្លាដែស មីក្រូហិរញ្ញវត្ថុបានផ្លាស់ប្តូរទម្រង់ផ្សេងៗគ្នានៅទូទាំងពិភពលោក ប៉ុន្តែដំណើរតែមួយគត់របស់កម្ពុជាបានក្លាយជាមូលដ្ឋានគ្រឹះនៃវិស័យធនាគារ និងហិរញ្ញវត្ថុរបស់ប្រទេស។
លោកបញ្ជាក់ថា “នៅជួរមុខនៃការរីកចម្រើន និងទិសដៅនៃវិស័យនេះគឺសមាគមមីក្រូហិរញ្ញវត្ថុកម្ពុជា (CMA) ដែលធ្វើការសហការជាមួយធនាគារជាតិនៃកម្ពុជា សមាជិក និងដៃគូនានា”។
លោកបន្តថា ជាមួយគ្នានេះ បណ្តាស្ថាប័នកំពុងធ្វើការរួមគ្នាដើម្បីធានាការ រួមបញ្ចូលផ្នែកហិរញ្ញវត្ថុនៅក្នុងប្រទេសកម្ពុជា ក្នុងគោលបំណងកាត់បន្ថយភាពក្រីក្រ និងបង្កើនលទ្ធភាពទទួលបានសេវាហិរញ្ញវត្ថុផ្លូវការសម្រាប់ប្រជាជន និងសហគ្រាសទាំងអស់ ដោយមិនគិតពីអាយុ ភេទ ពូជសាសន៍ ឬពិការភាពរាងកាយ ដោយហេតុនេះធ្វើឲ្យប្រសើរឡើងនូវសុខុមាលភាពទូទៅរបស់ប្រជាជន។
វិស័យមីក្រូហិរញ្ញវត្ថុរបស់កម្ពុជា បានកត់ត្រាកំណើនជាង២០ ភាគរយទាំងផ្នែកកម្ចី និងប្រាក់បញ្ញើនៅចុងឆ្នាំ២០២២។ ផលប័ត្រប្រាក់កម្ចីបានកើនឡើងដល់ ៩.១៣៥ ពាន់លានដុល្លារ (កើនឡើង ២៣.៨ ភាគរយ) ជាមួយនឹងគណនីអតិថិជនជាង២លាននាក់៕
