ដោយៈ និស្ស័យ
ភ្នំពេញៈ ការវិនិយោគពីប្រទេសចិន លើការបង្កើតរោងចក្រផលិតសម្បកកង់យានយន្ត បាននិងកំពុងជួយដល់ដំណាំកសិ ឧស្សាហកម្មកៅស៊ូនៅកម្ពុជា។
ក្នុងដំណើរបំពេញទស្សនកិច្ចទៅកាន់ប្រទេសចិន ចាប់ពីថ្ងៃទី ៥ដល់៨ ខែមករាកន្លងមកនេះ លោក ស៊ុន ចាន់ថុល អនុប្រធានទី១ ក្រុមប្រឹក្សាអភិវឌ្ឍន៍កម្ពុជា (CDC) បានដឹកនាំគណៈប្រតិភូមកពីវិស័យឯកជន ទៅជួបជាមួយក្រុមហ៊ុនចិនជាច្រើន ពិសេសឧស្សាហកម្មផលិតសម្បកកង់រថយន្ត។
ជាមួយគ្នានេះ លោកក៏បានចុះហត្ថលេខា លើអនុស្សរណៈនៃការយោគយល់គ្នា (MoU) ជាមួយ NERCRAT ដើម្បីជំរុញឧស្សាហកម្មកៅស៊ូនៅកម្ពុជាផងដែរ។ ទន្ទឹមនឹងនេះ NERCRAT បានបង្ហាញពីឆន្ទៈក្នុងការបោះទុនវិនិយោគ១០០០លានដុល្លារ លើគម្រោងអាទិភាពមួយចំនួនក្នុងឧស្សាហកម្មនេះ។ នេះបើតាមសេចក្តីប្រកាសព័ត៌មាន CDC។
យោងតាម CDC ក្រុមហ៊ុន Cart Tire Co Ltd កំពុងវិនិយោគលើរោងចក្រមួយនៅខេត្តស្វាយរៀង ដោយគ្រោងបង្កើនដើមទុនដល់ ៧០០លានដុល្លារ លើផ្ទៃដីប្រមាណ១២០ហិកតា ដើម្បីជំរុញការនាំចេញទៅទីផ្សារសំខាន់ៗដូចជា អាមេរិក កាណាដា និងកូរ៉េខាងត្បូង។
លោក ម៉ែន សុភ័ក្ត្រ ប្រធានក្រុមហ៊ុន Sopheak Nika Investment Agro-Industrial Plants Co., Ltd ដែលជាក្រុមហ៊ុនដាំដុះ និងនាំចេញកៅស៊ូធំមួយនៅកម្ពុជាបានមានប្រសាសន៍ឲ្យដឹងថា កិច្ចសហប្រតិបត្តិការជាមួយ NERCRAT នឹងក្លាយជាព្រឹត្តិការណ៍ថ្មីដោយមិនត្រឹមតែការផលិតប៉ុណ្ណោះទេ ប៉ុន្តែក៏ដើម្បីកែលម្អគុណភាពជ័រកៅស៊ូ និងការផ្គត់ផ្គង់ដល់រោងចក្រ ផលិតសម្បកកង់ក្នុងស្រុកដែរ។
លោកបញ្ជាក់ថា “នេះជាជំហានវិជ្ជមាន សម្រាប់ឧស្សាហកម្មមួយនេះ ព្រោះមកដល់ពេលនេះ យើងមានរោងចក្រកែច្នៃកៅស៊ូចំនួន៣”។លោកបន្ថែមថា “កិច្ចសហការពី NERCRAT ពួកគេនឹងនាំយកអ្នកជំនាញ និងបច្ចេកវិទ្យាបន្ថែមទៀត ដើម្បីកែលម្អឧស្សាហកម្មរបស់យើង”។
លោក សុភ័ក្ត្របានបង្ហើបឲ្យដឹងទៀតថា បច្ចុប្បន្នក្រុមហ៊ុនរបស់លោកកំពុងផ្គត់ផ្គង់ ដល់រោងចក្រកែច្នៃសម្បកកង់នៅ ខេត្តស្វាយរៀង ប៉ុន្តែចំនួនមានកំណត់ ដោយសារភាគីទាំង២ ត្រូវការចរចាបន្ថែមទៀត។
លោកបញ្ជាក់ឡើងថា បច្ចុប្បន្នយើងកំពុងផ្គត់ផ្គង់កៅស៊ូប្រភេទ CSR-10 ឱ្យដល់រោងចក្រផលិតសម្បក កង់នៅខេត្តស្វាយរៀង ប៉ុន្តែមានបរិមាណតិចតួចនៅឡើយ។ ជាធម្មតាយើងផលិតកៅស៊ូគុណភាពខ្ពស់សម្រាប់ការនាំចេញ ប៉ុន្តែសម្រាប់កៅស៊ូប្រភេទ CSR-10 គឺកម្រិត៣ ខណៈយើងនាំចេញភាគច្រើន កៅស៊ូប្រភេទកម្រិត១ និង ២។
លោកបានឲ្យដឹងទៀតថា នៅពេលនេះ ក៏មានរោងចក្រកែច្នៃកៅស៊ូមួយចំនួន កំពុងចរចាជាមួយរោងចក្រកែច្នៃ សម្បកកង់រថយន្តដើម្បីផ្គត់ផ្គង់ផងដែរ។
ជាមួយគ្នានេះ លោក ហ៊ឹម អូន អគ្គនាយកនៃអគ្គនាយកដ្ឋានកៅស៊ូ បច្ចុប្បន្នកម្ពុជាមានរោងចក្រ កែច្នៃសម្បកកង់រថយន្តចំនួន៣ គឺក្រុមហ៊ុន Newbustar(Cambodia)Tire Co Ltd ដែលជាសមាជិកនៃក្រុមហ៊ុន Doublestar Group គ្រប់គ្រងដោយរដ្ឋចិន មានទុនវិនិយោគប្រមាណ១៣៨លានដុល្លារ នៅក្នុងខេត្តក្រចេះ។ ក្រុមហ៊ុន General Tires Technology (Cambodia) Co., Ltd មានទុនវិនិយោគ៣០០លានដុល្លារនៅខេត្តព្រះសីហនុ និងក្រុមហ៊ុន Cart Tire Co.,Ltd បានវិនិយោគចំនួន៣៥០លានដុល្លារ លើរោងចក្រនៅខេត្តស្វាយរៀង។
កាលពីថ្ងៃទី ២៣ ខែវិច្ឆិកា រដ្ឋាភិបាលបានសម្រេចផ្តល់ការលើកទឹកចិត្តពន្ធក្នុងរយៈពេល២ឆ្នាំបន្តទៀត លើការនាំចេញកៅស៊ូ ចាប់ពីថ្ងៃទី ១ ខែមករា ឆ្នាំ ២០២៤ ក្នុងគោលបំណងលើកទឹកចិត្ត ដល់ការដាំដុះ និងក្រុមហ៊ុននាំចេញ ក្នុងគ្រាការធ្លាក់ចុះតម្លៃដោយសារការធ្លាក់ចុះតម្រូវការអន្តរជាតិ។
អនុប្រធានសភាពាណិជ្ជកម្មកម្ពុជា លោក លឹម ហេង បានលើកឡើងអំពីសារៈសំខាន់ ការលើកទឹកចិត្តផ្នែកពន្ធដារ សម្រាប់វិស័យកសិកម្ម ជាពិសេសឧស្សាហកម្មកៅស៊ូ ព្រោះវាអាចជួយរក្សាស្ថិរភាពនៃការផ្គត់ផ្គង់បាន ដោយសារចម្ការកៅស៊ូ របស់ប្រទេសមានផ្ទៃដីជា ង៤០០,០០០ហិកតា។
ទិន្នន័យថ្មីៗពីអគ្គនាយកដ្ឋានកៅស៊ូ បានបង្ហាញថា ចាប់ពីខែមករាដល់ខែវិច្ឆិកា ឆ្នាំ ២០២៣ ប្រទេសកម្ពុជារកចំណូលបាន ៤៤៥,៥លានដុល្លារ ពីការនាំចេញជ័រកៅស៊ូ និងរកបាន១,៥លានដុល្លារបន្ថែមទៀតពីការនាំចេញឈើកៅស៊ូ៕
