ដោយៈ គង់ សូរិយា
ភ្នំពេញៈ ប្រជាជនកម្ពុជាអាចបើកបររថយន្ត ដែលមានគុណភាព និងតម្លៃសមរម្យ ហើយក៏ជាម៉ាករថយន្តរបស់កម្ពុជាផ្ទាល់ ដែលផលិតដោយក្រុមហ៊ុន GTV MOTOR។
អ្នកជំនាញសេដ្ឋកិច្ចបានបង្ហាញសុទិដ្ឋិនិយមថា ឧស្សាហកម្មរថយន្តនៅកម្ពុជា នឹងមានភាពល្អប្រសើរ ជាពិសេសកម្ពុជា នឹងក្លាយជាប្រទេសនាំចេញរថយន្តនាថ្ងៃអនាគត។
លោកបណ្ឌិត គី សេរីវឌ្ឍន៍ អ្នកសេដ្ឋកិច្ចនៃរាជបណ្ឌិត្យសភាកម្ពុជាបានមានប្រសាសន៍ថា ក្រុមហ៊ុន GTV MOTOR គឺជាក្រុមហ៊ុនដែលមានលក្ខណៈសម្បត្តិល្អ បានបង្កើតកេរ្តិ៍ឈ្មោះឱ្យកម្ពុជា ដោយបានផលិតរថយន្តនៅកម្ពុជា។ ក្រុមហ៊ុននេះ នឹងឈានទៅផលិតរថយន្តអេឡិចត្រូនិកបន្ថែមទៀត។
លោកបង្ហាញការយល់ឃើញរបស់ខ្លួនថា ក្រុមហ៊ុន នឹងបង្កើតការងារ ដល់ប្រជាពលរដ្ឋក្នុងស្រុក ជាពិសេសកម្លាំងពលកម្មជំនាញ ដែលចេញពីការបណ្តុះបណ្តាលវិជ្ជាជីវៈ ដោយដើរស្របនឹងគោលនយោបាយរបស់រាជរដ្ឋាភិបាល ដែលជំរុញការបណ្តុះបណ្តាលរហូតដល់១,៥លាននាក់។
លោកបញ្ជាក់ថា “កម្ពុជា គឺជាប្រទេសស្ថិតនៅក្នុងតំបន់អាស៊ាន ដូច្នេះរថយន្តដែលផលិតនៅកម្ពុជា មិនមែនសម្រាប់តែទីផ្សារកម្ពុជានោះទេ”។ លោកបន្តថា “ក្រុមហ៊ុននេះ អាចធ្វើការនាំចេញរថយន្ត ទៅក្នុងប្រទេសតំបន់អាស៊ាន ដោយមិនជាប់ពន្ធផងដែរ”។
លោកគី សេរីវឌ្ឍន៍បានពន្យល់ថា ការផលិតនៅក្នុងស្រុកច្បាស់ណាស់ថា នឹងបាត់ចំណូលពន្ធគយមួយផ្នែក ប៉ុន្តែត្រឡប់មកវិញអាចនឹងកើនចំណូលពន្ធដារនៅក្នុងស្រុក។ ដូច្នេះចំណូលថវិកាជាតិ នឹងមិនមានផលប៉ះពាល់នោះទេ។ ផ្ទុយទៅវិញ នឹងមានភាពកាន់តែប្រសើរឡើង ដោយសារបង្កើនសកម្មភាព និងសមត្ថភាពផលិត បង្កើតប្រាក់ចំណូលពន្ធដារ បង្កើតការងារដល់ពលរដ្ឋ នឹងធ្វើឱ្យសកម្មភាពសេដ្ឋកិច្ចមានដំណើរការល្អ៕
