ដោយ: គង់ លាងហួរ
អន្តរជាតិ: តម្លៃហាងឆេងមាសបានស្ថិតក្នុងសភាពទ្រឹងនៅថ្ងៃច័ន្ទនេះ ខណៈទិន្នន័យសេដ្ឋកិច្ចអាមេរិកមានភាពចម្រុះគ្នា ដែលអាចជះឥទ្ធិពលទៅលើគោលនយោបាយអត្រាការប្រាក់របស់ធនាគារ Federal Reserve។
តួយ៉ាង តម្លៃមាស Spot Gold បានងើបឡើង០,១%ដល់២០៤៤,២១ដុល្លារ ក្នុងមួយអោន ខណៈតម្លៃហាងឆេងមាសរបស់សហរដ្ឋអាមេរិក U.S. gold futures បានស្ថិតនៅទ្រឹងត្រឹម២០៤៩,៨០ដុល្លារ ក្នុងមួយអោន។
បើគិតពេញមួយឆ្នាំ២០២៣ តម្លៃហាងឆេងមាសបានហក់ឡើង១៣% ដែលជាកំណើនប្រចាំឆ្នាំលើកដំបូង គិតចាប់តាំងពីឆ្នាំ២០២០ ហើយតម្លៃមាសត្រូវបានគេព្យាករណ៍ថា នឹងឈានដល់កម្រិតខ្ពស់បំផុតនៅឆ្នាំ២០២៤នេះ ដោយសារការរំពឹងទុកនៃការបញ្ចុះអត្រាការប្រាក់ដោយធនាគារFed។
ប៉ុន្តែ នៅពេលនេះ ទីផ្សារមើលឃើញឱកាសត្រឹមតែ៦៤ភាគរយប៉ុណ្ណោះ នៃការកាត់បន្ថយអត្រាការប្រាក់នៅខែមីនា ដោយធនាគារកណ្តាលអាមេរិក(Fed) បើធៀបនឹងឱកាសជិត៩០ភាគរយ កាលពីមួយសប្តាហ៍មុន។ នេះបើយោងតាមឧបករណ៍ CME FedWatch។
សន្ទស្សន៍ប្រាក់ដុល្លារ ដែលវាស់វែងរូបិយប័ណ្ណអាមេរិកធៀបនឹងគូប្រជែងចំនួន៦ ដូចជាប្រាក់អឺរ៉ូ និងប្រាក់យ៉េន បានស្ថិតនៅទ្រឹងត្រឹម១០២,៣៨ពិន្ទុ នៅព្រឹកថ្ងៃច័ន្ទនេះ។
តម្លៃលោហៈធាតុប្រាក់ Spot silver បានងើបឡើង០,៨ភាគរយ ដល់២៣,១៧ដុល្លារ ក្នុងមួយអោន ខណៈតម្លៃផ្លាទីនបានងើបឡើង០,៥% ដល់៩៦១,៥៣ដុល្លារក្នុងមួយអោន ខណៈដែលតម្លៃ palladium ធ្លាក់ចុះ០,៩% មកនៅត្រឹម១០២៧,១១ដុល្លារក្នុងមួយអោន៕