កម្ពុជា និងជប៉ុន គ្រោងនឹងពិភាក្សាអំពីការផ្តល់សេវាទូទាត់សាច់ប្រាក់តាមប្រព័ន្ធQRCodeរវាងប្រទេសទាំងពីរ។ក្នុងគោលបំណងលើកកម្ពស់ប្រព័ន្ធទូទាត់សាច់ប្រាក់QR codeនៅក្រៅប្រទេស រដ្ឋាភិបាលជប៉ុនមានគោលបំណងពង្រីកកិច្ចសហប្រតិបត្តិការជាមួយរដ្ឋសមាជិកអាស៊ាន។ គំនិតផ្តួចផ្តើមបែបនេះត្រូវបានគេរំពឹងថានឹងជំរុញអោយមានការកើនឡើងនៃតម្រូវការប្រើប្រាស់របស់ភ្ញៀវបរទេសដែលមកលេងកម្សាន្តប្រទេសជប៉ុន និងបង្កើនភាពងាយស្រួលសម្រាប់ការធ្វើដំណើររបស់ជនជាតិជប៉ុននៅក្រៅប្រទេស។
ក្រសួងសេដ្ឋកិច្ច ពាណិជ្ជកម្ម និងឧស្សាហកម្ម និងធនាគារជាតិនៃកម្ពុជា នឹងចុះហត្ថលេខាលើអនុស្សរណៈនៃកិច្ចសហប្រតិបត្តិការនាពេលឆាប់ៗនេះ ហើយនឹងចាប់ផ្តើមកិច្ចសហប្រតិបត្តិការផ្លាស់ប្តូរព័ត៌មាន លើផ្នែកបច្ចេកទេស ត្រួសត្រាយផ្លូវសម្រាប់អន្តរប្រតិបត្តិការនៃប្រព័ន្ធទូទាត់ប្រាក់QR code របស់ប្រទេសទាំងពីរ។ ប្រទេសទាំងពីរមានបំណងដាក់អោយប្រើប្រាស់សេវាកម្មនេះនៅខែមេសា ឆ្នាំ ២០២៥ នៅពេលដែលពិធីតាំងពិព័រណ៍ Osaka-Kansai ឆ្នាំ២០២៥ ត្រូវបានរៀបចំឡើង។
គម្រោងនេះតម្រូវឱ្យប្រទេសទាំងពីរប្រើប្រាស់ប្រព័ន្ធទូទាត់ប្រាក់QR codeរបស់ពួកគេ។ ប្រទេសជប៉ុននឹងប្រើប្រាស់ប្រព័ន្ធទូទាត់ QR code ដែលមានឈ្មោះថា JPQR ដែលបានដាក់ឱ្យដំណើរការក្នុងឆ្នាំ២០២០ ដែលអនុញ្ញាតឱ្យសេវាកម្មទូទាត់ច្រើនដំណើរកាទៅបានដោយប្រើ QR code តែមួយ រួមទាំង PayPay, Rakuten Pay និង D Payment ។ គំនិតផ្តួចផ្តើមនេះនឹងអនុញ្ញាតឱ្យសេវាកម្មទូទាត់ QR Code របស់ជប៉ុនអាចប្រើប្រាស់បាននៅបរទេស ខណៈដែលភ្ញៀវបរទេសមកប្រទេសជប៉ុននឹងទទួលបានអត្ថប្រយោជន៍ពីការប្រើប្រាស់សេវាទូទាត់ដោយគ្មានសាច់ប្រាក់ពីប្រទេសរបស់ពួកគេ។
មានតែការទូទាត់ដោយគ្មានសាច់ប្រាក់ប៉ុណ្ណោះនឹងត្រូវបានទទួលយកនៅក្នុងពិធីតាំងពិព័រណ៍។ ដូច្នេះហើយ គំនិតផ្តួចផ្តើមនេះក៏មានគោលបំណងបង្កើតប្រព័ន្ធប្រតិបត្តិការដែលផ្តល់ភាពងាយស្រួលសម្រាប់ភ្ញៀវបរទេសមកទស្សនាពិព័រណ៍នេះ។
ការទូទាត់តាមប្រព័ន្ធអេឡិចត្រូនិកមានភាពរីកដុះដាលនៅក្នុងតំបន់អាស៊ាន ប្រហែល ២០% នៃប្រតិបត្តិការទាំងអស់ បើធៀបនឹងប្រហែល ១០% នៅក្នុងប្រទេសជប៉ុន។
ក្នុងឆ្នាំ២០២២ធនាគារជាតិនៃកម្ពុជា បានដាក់អោយប្រើប្រាស់KHQR ។ ការស្ទង់មតិនាពេលថ្មីៗនេះបង្ហាញថា ប្រជាជនកម្ពុជាជាង៣០%ប្រើប្រាស់ការទូទាត់សាច់ប្រាក់តាម QR code។
ជប៉ុន និងឥណ្ឌូនេស៊ីបានចុះហត្ថលេខាលើអនុស្សរណៈនៃការយោគយល់គ្នាសម្រាប់គំនិតផ្តួចផ្តើមស្រដៀងគ្នានេះផងដែរកាលពីខែធ្នូឆ្នាំមុន និងបានចាប់ផ្តើមពិភាក្សារួចហើយលើបញ្ហានេះ។The Japan News
