ដោយៈ គង់ ហ្វីអូណា
ភ្នំពេញៈ ក្រុមហ៊ុន Pharma Foods International Co., Ltd. (PFI) និងក្រុមហ៊ុន Ehime Package គ្រោងឈានជើងចូលមកកាន់ទីផ្សារកម្ពុជានាពេលខាងមុខ។
លោកលើកឡើងបែបនេះ នៅក្នុងជំនួបជាមួយសម្តេច ហ៊ុន ម៉ាណែត នាយករដ្ឋមន្រ្តីកម្ពុជា កាលពីព្រឹកថ្ងៃទី ១៦ ធ្នូ ឆ្នាំ ២០២៣ នៅប្រទេសជប៉ុន។
ជាការឆ្លើយតប សម្តេចនាយករដ្ឋមន្រ្តីកម្ពុជា បានសម្តែងនូវកិច្ចស្វាគមន៍ ចំពោះវត្តមានរបស់ថ្នាក់ដឹកនាំក្រុមហ៊ុន Ehime Package និងអរគុណចំពោះបទពិសោធន៍ និងការយល់ឃើញប្រកបដោយសុទិដ្ឋិនិយមចំពោះសក្តានុពលរបស់ប្រទេសកម្ពុជា ។
សម្តេចធិបតីក៏បានបន្ថែមថា ស្របពេលដែលឆ្នាំ២០២៣ នេះ គឺជាខួប ៧០ នៃចំណងការទូតកម្ពុជា-ជប៉ុន និងក៏ជាឆ្នាំដ៏ពិសេសនៃការដំឡើងកម្រិត នៃទំនាក់ទំនងរវាងប្រទេសទាំងពីរ ទៅជា “ភាពជាដៃគូយុទ្ធសាស្ត្រគ្រប់ជ្រុងជ្រោយ” សម្តេចធិបតី ក៏បានលើកឡើងអំពីគម្រោងនៃជំនួបទ្វេភាគីជាមួយ លោកនាយករដ្ឋមន្ត្រីជប៉ុន ដើម្បីពិភាក្សាអំពីការពង្រឹង និងពង្រីកកិច្ចសហប្រតិបត្តិការ រវាងប្រទេសទាំងពីរ។
កិច្ចសហប្រតិបត្តិការនេះ នឹងផ្តោតលើប្រធានបទសំខាន់ៗមួយចំនួន ដូចជា ទិសដៅនៃការលើកកម្ពស់ទំនាក់ទំនងផ្នែកសេដ្ឋកិច្ច និងវិស័យឯកជន ។
ជាមួយគ្នានេះ លោកKim Mujo ប្រធានក្រុមហ៊ុន Pharma Foods International Co., Ltd. (PFI) បានថ្លែងអំណរគុណចំពោះ សម្តេចធិបតី ដែលបានឆ្លៀតពេលវេលាដ៏មមាញឹក អនុញ្ញាតឱ្យរូបលោក និងសហការី ចូលជួបសម្តែងការគួរសម ព្រមទាំងបានជម្រាបអំពីសកម្មភាព នៃខ្សែច្រវាក់ផលិតកម្មជាច្រើនរបស់ក្រុមហ៊ុន ជាអាទិ៍៖សម្លៀកបំពាក់ គ្រឿងសំអាង គ្រឿងឧបភោគ-បរិភោគ ជាដើម ។
ជាមួយគ្នានេះ លោកនាយកក្រុមហ៊ុន ក៏បានជម្រាបជូន សម្តេចធិបតីនាយករដ្ឋមន្ត្រីថា ដោយសម្លឹងមើលឃើញសក្តានុពលអាជីវកម្មនៅក្នុងប្រទេសកម្ពុជា ក្រុមហ៊ុន Pharma Foods International Co., Ltd. (PFI) មានបំណងពង្រីកការវិនិយោគរបស់ខ្លួន មកកាន់ប្រទេសកម្ពុជា ជាពិសេស លើវិស័យកសិកម្ម ។
សម្តេចធិបតី បានស្វាគមន៍ចំពោះថ្នាក់ដឹកនាំក្រុមហ៊ុនទាំងពីរនព្រមទាំងសហការី និងបានបង្ហាញក្តីរីករាយចំពោះគម្រោងរបស់ក្រុមហ៊ុន ក្នុងការបោះទុនវិនិយោគនៅកម្ពុជា នាពេលខាងមុខ។
ក្នុងជំនួបជាមួយប្រជាពលរដ្ឋខ្មែររស់នៅ និងសិក្សានៅប្រទេសជប៉ុនសម្តេចធិបតីបានបង្ហើបថា សម្តេចនឹងជួបជាមួយថ្នាក់ដឹកនាំក្រុមហ៊ុនជប៉ុនចំនួន៦០០ ដើម្បីទាក់ទាញពួកគេមកវិនិយោគនៅកម្ពុជា ស្របពេលទំនាក់ទំនងរវាងប្រទេសទាំងពីរ បានឈានដល់កម្រិតភាពជាដៃគូយុទ្ឋសាស្រ្តគ្រប់ជ្រុងជ្រោយ៕
