ដោយៈម៉ាណេត
ភ្នំពេញៈ ពលករចំណាកស្រុកមកពីប្រទេសមីយ៉ាន់ម៉ា ឡាវ និងកម្ពុជា ដែលមានលិខិតអនុញ្ញាតការងារផុតសុពលភាពនៅឆ្នាំក្រោយ នឹងត្រូវបានអនុញ្ញាតឱ្យបន្តធ្វើការនៅក្នុងប្រទេសថៃរហូតដល់២ឆ្នាំទៀត។ នេះបើយោងតាមការចុះផ្សាយរបស់កាសែតបាងកកប៉ុស្តិ៍ នៅថ្ងៃទី១១ ខែវិច្ឆិកា ឆ្នាំ២០២០។
យោងតាមអ្នកនាំពាក្យរដ្ឋាភិបាលថៃ លោកស្រី Rachada Dhnadirek បានឱ្យដឹងថា ការអនុញ្ញាតឱ្យពលករចំណាកស្រុក ដែលបានចុះឈ្មោះស្របច្បាប់ ស្នាក់នៅបានយូរ ត្រូវបានអនុម័ត នៅក្នុងកិច្ចប្រជុំគណៈរដ្ឋមន្រ្តីប្រចាំសប្តាហ៍កាលពីម្សិលមិញ។
លោកស្រីបាននិយាយថា “ការសម្រេចនេះ នឹងផ្តល់ផលប្រយោជន៍ ដល់ពលករចំណាកស្រុកបែបនេះ ចំនួន១៣ម៉ឺននាក់នៅទូទាំងប្រទេសថៃ ប៉ុន្តែវាទាក់ទងនឹងអ្នក ដែលត្រូវបានជ្រើសរើស ក្រោមកិច្ចព្រមព្រៀងការងារ ដែលបានចុះហត្ថលេខាដោយប្រទេសនីមួយៗ”។
ពលករចំណាកស្រុក ដែលបញ្ចប់ការងារ៤ឆ្នាំនៅទីនេះ ក្នុងខែធ្នូឆ្នាំក្រោយ ជាធម្មតា ត្រូវបានតម្រូវឱ្យវិលត្រឡប់ទៅប្រទេសកំណើតវិញ មុនពេលពួកគេត្រូវបានអនុញ្ញាតឱ្យដាក់ពាក្យសុំការអនុញ្ញាតការងារថ្មី។
ទោះយ៉ាងណា កង្វះកម្លាំងពលកម្មបច្ចុប្បន្ននៅក្នុងប្រទេសថៃ ដែលបណ្តាលមកពីជំងឺរាតត្បាត Covid-19 បានជំរុញឱ្យរដ្ឋាភិបាល អនុញ្ញាតឱ្យពលករចំណាកស្រុក នៅតែបន្តផ្តល់ឱ្យពួកគេបន្តការអនុញ្ញាតការងាររបស់ពួកគេ នៅពេលដែលច្បាប់ចាស់ផុតកំណត់។
លោកស្រី Rachada បានមានប្រសាសន៍ថា “នេះមានន័យថា ពួកគេអាចនៅទីនេះ ដើម្បីធ្វើការរយៈពេល២ឆ្នាំទៀតចាប់ពីខែធ្នូឆ្នាំ២០២១”។
លោកស្រីបានបន្ថែមទៀតថា ជំងឺរាតត្បាតកំពុងរាតត្បាតខ្លាំង នៅក្នុងប្រទេសមីយ៉ាន់ម៉ា ដែលរារាំងពលករចំណាកស្រុកមួយចំនួនធំ ពីការវិលត្រឡប់ទៅប្រទេសថៃវិញ ដូច្នេះវិធានការចុងក្រោយនឹងជួយកាត់បន្ថយកង្វះខាតនេះ។
ពលករចំណាកស្រុក ដែលមានបំណងដាក់ពាក្យសុំពន្យារពេលលិខិតឆ្លងដែន នឹងត្រូវឆ្លងកាត់ការត្រួតពិនិត្យសុខភាព លិខិតបញ្ជាក់ការងាររបស់ពួកគេ ត្រូវបានផ្ទៀងផ្ទាត់ជាផ្លូវការ ស្វែងរកការពន្យារពេលការងារ ជាមួយការិយាល័យការងារដោយបង់ថ្លៃ ១.៩០០បាត និងចុះបញ្ជីការងារឡើងវិញ៕
