ដោយៈ គង់ និស្ស័យ
បាត់ដំបងៈ មន្ទីរវប្បធម៌ និងវិចិត្រសិល្បៈខេត្តបាត់ដំបង នឹងធ្វើការលក់សំបុត្រចូលទស្សនា សារមន្ទីរខេត្ត ចាប់ពីថ្ងៃទី ១ ខែមករា ឆ្នាំ ២០២៤ខាងមុខតទៅ។
ការលក់សំបុត្រនេះ ធ្វើឡើងដើម្បីប្រមូលចំណូល ស្របតាមប្រកាសអន្តរក្រសួង ចុះថ្ងៃទី១៨ ខែសីហា ឆ្នាំ២០២៣ របស់ក្រសួងសេដ្ឋកិច្ច និងហិរញ្ញវត្ថុ និងក្រសួងវប្បធម៌ និងវិចិត្រសិល្បៈ ស្តីពីការប្រមូលចំណូលពីការផ្តល់សេវាចូលទស្សនា សារមន្ទីរខេត្តបាត់ដំបង។
យោងតាមសេចក្តីជូនដំណឹងរបស់មន្ទីរវប្បធម៌ និងវិចិត្រសិល្បៈ ខេត្តបាត់ដំបង ដែលចុះហត្ថលេខាដោយលោក គឹម សោភ័ណ ប្រធានមន្ទីរវប្បធម៌ខេត្តនេះ ដែលបានផ្សព្វផ្សាយ កាលពីថ្ងៃទី៦ ខែធ្នូ ឆ្នាំ២០២៣ បានឱ្យដឹងថា មន្ទីរវប្បធម៌ខេត្ត នឹងធ្វើការលក់សំបុត្រចូលទស្សនាសារមន្ទីរខេត្ត ចាប់ពីថ្ងៃទី១ ខែមករា ឆ្នាំ២០២៤ តទៅ ដែលសម្រាប់ភ្ញៀវជាជនជាតិខ្មែរនឹងមិនគិតថ្លៃនោះទេ។
លោកបានបញ្ជាក់ថា សម្រាប់ភ្ញៀវបរទេស ដែលមានអាយុក្រោម១០ឆ្នាំ អាចចូលទស្សនាដោយឥតគិតថ្លៃ រីឯជនបរទេសដែលមានអាយុចាប់ពី១០ ឆ្នាំឡើងទៅយកថ្លៃសំបុត្រ១តម្លៃ១២,០០០ រៀល ដោយមានសុពលភាពត្រឹមតែ១ថ្ងៃប៉ុណ្ណោះ។
តាមរយៈសេចក្តីជូនដំណឹងដដែលបានឲ្យដឹងទៀតថា ចំពោះភ្ញៀវបរទេស ដែលមានអាយុក្រោម១០ឆ្នាំ ត្រូវបង្ហាញឯកសារដែលពាក់ព័ន្ធ ឬលិខិតឆ្លងដែនទៅកាន់បញ្ជរលក់សំបុត្រ ឬមន្ត្រីឆែកសំបុត្រ។ ករណីពុំមានឯកសារបញ្ជាក់ច្បាស់លាស់ ភ្ញៀវត្រូវបង់ថ្លៃចូលទស្សនាតាមការកំណត់។
សារមន្ទីរខេត្តបាត់ដំបង បានសម្ពោធដាក់ឱ្យប្រើប្រាស់ នាខែតុលា ឆ្នាំ១៩៦៨ ដោយស្ថាបត្យករ យាង (Yieng) ដែលជាស្ថាបត្យករ ប្រចាំខេត្តបាត់ដំបង និងធ្វើការនៅមន្ទីរសាធារណការ និងដឹកជញ្ជូន នាសម័យនោះ។ សារមន្ទីរខេត្តបាត់ដំបង មានផ្នែកទស្សនាជាច្រើនផ្សេងៗគ្នា ក្នុងនោះរួមមាន វប្បធម៌ សិល្បៈ ចម្លាក់ និងសំណង់ស្ថាបត្យកម្មជាច្រើនទៀត។
អភិបាលនៃគណៈអភិបាលខេត្តបាត់ដំបង លោក សុខ លូបានមានប្រសាសន៍ឲ្យដឹងនៅថ្ងៃទី៦ ខែធ្នូថា ការបើកដំណើរការរលក់សំបុត្រឱ្យចូលទស្សនាសារមន្ទីរខេត្តនេះ នឹងរួមចំណែកទាក់ទាញភ្ញៀវទេសចរជាតិ និងអន្តរជាកាន់តែច្រើន ចូលមកទស្សនាខេត្តបាត់ដំបង។
លោកមានប្រសាសន៍ថា សារមន្ទីរខេត្តបាត់ដំបង ត្រូវបានបិទមួយរយៈ ដោយសារតែមិនមានភ្ញៀវទេសចរ និងដើម្បីធ្វើការជួសជុលនៅទីតាំងមួយចំនួន។ តាមផែនការរបស់ខេត្តយើង នឹងប្រែក្លាយសារមន្ទីរនេះ ទៅជាសារមន្ទីរឆ្លាតវៃ (Smart Museum)នៅពេលអនាគត ប៉ុន្តែពេលនេះមិនទាន់បានធ្វើទេ តែយើងដាក់ឱ្យភ្ញៀវចូលទស្សនាសិន៕