ដោយ: គង់ លាងហួរ
អន្តរជាតិ: ផ្សារហ៊ុននៅតំបន់អាស៊ីបានធ្លាក់ថ្លៃចុះនៅថ្ងៃព្រហស្បតិ៍នេះ ខណៈដែលការធ្លាក់ចុះយ៉ាងគំហុកនៃតម្លៃប្រេងកាលពីថ្ងៃពុធ នឹងជួយកាត់បន្ថយសម្ពាធអតិផរណាបន្ថែមទៀត និងជួយជំរុញដល់ទីផ្សារមូលបត្របំណុលសកលលោក។
ជាមួយគ្នានេះ ក្រុមវិនិយោគិនកំពុងរង់ចាំមើលទិន្នន័យការងារសំខាន់ៗរបស់សហរដ្ឋអាមេរិក ដែលអាចផ្តល់ភាពច្បាស់លាស់បន្ថែមទៀតលើគោលនយោបាយអត្រាការប្រាក់របស់ធនាគារកណ្តាលអាមេរិក(Fed)។
ជាក់ស្តែងសន្ទស្សន៍ភាគហ៊ុនអាស៊ីប៉ាស៊ីហ្វិក របស់ក្រុមហ៊ុនអាមេរិក MSCI នៅ ក្រៅ ប្រទេស ជប៉ុន បាន ធ្លាក់ ថ្លៃចុះ០,៥ភាគរយ ក្នុងការជួញដូរដំបូងនៅព្រឹកថ្ងៃព្រហស្បតិ៍នេះ។
ផ្សារហ៊ុន Nikkei របស់ប្រទេសជប៉ុនបានធ្លាក់ថ្លៃចុះ១,៣ភាគរយ ខណៈដែលសន្ទស្សន៍ផ្សារហ៊ុន Hang Seng របស់ទីក្រុងហុងកុងបានធ្លាក់ថ្លៃចុះ០,៧ភាគរយ។
សន្ទស្សន៍ផ្សារហ៊ុនបន្ទះឈីបពណ៌ខៀវ CSI 300 របស់ប្រទេសចិនបានធ្លាក់ថ្លៃចុះ០,៤ភាគរយ ខណៈសន្ទស្សន៍ផ្សារហ៊ុន Shanghai Composite បានធ្លាក់ថ្លៃចុះ០,៤៧ភាគរយ។
ផ្សារហ៊ុនរបស់ប្រទេសអូស្ត្រាលី S&P/ASX 200 បានធ្លាក់ថ្លៃចុះ០,២៥ភាគរយ ខណៈដែលសន្ទស្សន៍ផ្សារហ៊ុន KOSPI របស់ប្រទេសកូរ៉េខាងត្បូងបានធ្លាក់ថ្លៃចុះ០,៤៣ភាគរយ។
នៅពេលនេះ ក្រុមពាណិជ្ជករមើលឃើញឱកាសខ្ពស់បំផុត ដែលធនាគារ Fed នឹងរក្សាទុកអត្រាការប្រាក់ឱ្យនៅថេរ ក្នុងកិច្ចប្រជុំនៅសប្តាហ៍ក្រោយ និងមើលឃើញឱកាសចំនួន៦០ភាគរយ ដែលធនាគារ Fed អាចនឹងបញ្ចុះអត្រាការប្រាក់ នៅក្នុងខែមីនា ឆ្នាំ២០២៤។
សន្ទស្សន៍ប្រាក់ដុល្លារ ដែលវាស់វែងរូបិយប័ណ្ណដុល្លារអាមេរិកធៀបនឹងរូបិយប័ណ្ណគូប្រជែងសំខាន់ៗចំនួន៦ បានប្រែប្រួលតិចតួចមកនៅត្រឹម១០៤,១២ពិន្ទុ ដោយបានងើបឡើងថ្លៃ០,១៧ភាគរយពេញមួយយប់។
ចំណែក តម្លៃប្រេងបានងើបឡើងបន្តិចវិញនៅថ្ងៃព្រហស្បតិ៍នេះ បន្ទាប់ពីបានធ្លាក់ចុះអស់ជិត៤ភាគរយ កាលពីថ្ងៃពុធ។ ការព្រួយបារម្ភអំពីតម្រូវការប្រេងឥន្ធនៈសកលបានធ្វើឱ្យតម្លៃប្រេងដាំក្បាលចុះ បើទោះបីជាអង្គការ OPEC+ ប្តេជ្ញាថាពួកគេនឹងរឹតបន្តឹងលើការផ្គត់ផ្គង់តាមរយៈការកាត់បន្ថយការផលិតប្រេងយ៉ាងណាក្តី។
តម្លៃប្រេងឆៅ Brent futures បានងើបឡើង០,៤% ដល់៧៤,៦០ដុល្លារ ក្នុងមួយបារ៉ែល ខណៈដែលតម្លៃប្រេងឆៅអាមេរិក US West Texas Intermediate futures បានងើបឡើង០,៥% ដល់៦៩,៧៣ដុល្លារក្នុងមួយបារ៉ែល៕