ដោយៈ គង់ ម៉ាលីនណា
ភ្នំពេញៈ សម្តេចធិបតីហ៊ុន ម៉ាណែតនាយករដ្ឋមន្រ្តីនៃកម្ពុជាបានថ្លែងថា អគ្គិសនី គឺជាវិស័យអាទិភាពមួយ ក្នុងចំណោមវិស័យអាទិភាពនានា ដែលរាជរដ្ឋាភិបាលត្រូវយកចិត្តទុកដាក់ ក្នុងការជំរុញការអភិវឌ្ឍ។
សម្តេចបានថ្លែងបែបនេះ ក្នុងពិធីបិទស្ទឹងសាងសង់ទំនប់វារីអគ្គិសនីស្ទឹងតាតៃលើ អានុភាព១៥០មេហ្គាវ៉ាត់ នៅស្រុកថ្មបាំង ខេត្តកោះកុង។
សម្តេចបានបន្តថា “ខ្ញុំសូមបញ្ជាក់ថាការអភិវឌ្ឍ វិស័យអគ្គិសនី នៅតែជារបៀបវារៈដ៏សំខាន់ នៃនយោបាយសេដ្ឋកិច្ចរបស់រាជរដ្ឋាភិបាលកម្ពុជា សម្រាប់នីតិកាលទី៧ នៃរដ្ឋសភា ព្រោះថាមពលមិនត្រឹមតែជាផលិតផលមួយ ដែលជាតម្រូវការសម្រាប់ប្រជាជន បច្ចុប្បន្នទេ ប៉ុន្តែជាផលិតផលមួយ ដែលចាំបាច់ជំរុញការអភិវឌ្ឍវិស័យផ្សេងៗ”។
សម្តេចធិបតីបានបន្តថា ដូច្នេះការជំរុញការអភិវឌ្ឍវិស័យ ថាមពលអគ្គិសនីឱ្យបានត្រឹមត្រូវ រីកចម្រើនឱ្យបានឆាប់រហ័ស ដើម្បីឈានទៅសម្រេចបាន ការផ្គត់ផ្គង់ថាមពលមួយគ្រប់គ្រាន់ ប្រកបដោយចីរភាព ស្ថិរភាព គុណភាព មានតម្លៃកាន់តែសមរម្យ នៅគ្រប់ទីកន្លែងទូទាំងកម្ពុជា គឺជាគន្លឹះដ៏សំខាន់ ក្នុងការជួយជំរុញឱ្យមានកំណើនសេដ្ឋកិច្ច ប្រកបដោយចីរភាពរបស់ប្រទេស និងជួយបង្កើតសុខុដុមនីយភាព នៃការរស់នៅរបស់ប្រជាពលរដ្ឋ។
ក្រុមប្រឹក្សាអភិវឌ្ឍន៍កម្ពុជា (CDC) លើគម្រោងវិនិយោគថាមពលអគ្គិសនីពីប្រភពស្អាត ឬកកើតឡើងវិញ បានក្លាយជាផ្នែកមួយដ៏សំខាន់ នៃគោលនយោបាយរបស់រាជរដ្ឋាភិបាល ក្នុងការកាត់បន្ថយការបំភាយឧស្ម័នចេញពីចំហេះហ្វូស៊ីល ដូចជា ធ្យូងថ្ម និងប្រេងខ្មៅ ទៅក្នុងបរិយាកាស និងក៏អាចជួយឱ្យអគ្គិសនីនៅកម្ពុជា ឲ្យមានតម្លៃកាន់តែទាប និងអាចទាក់ទាញអ្នកវិនិយោគ ឱ្យចូលមកបណ្តាក់ទុនផ្ទាល់ ព្រមទាំងជួយលើកកម្ពស់សមត្ថភាព នាំចេញទៅនំនិញរបស់កម្ពុជាទៅកាន់ទីផ្សារអន្តរជាតិផងដែរ។
CDC កាលពីចុងសប្តាហ៍មុនឱ្យដឹងថា តាមសំណើសុំវិនិយោគរបស់ក្រុមហ៊ុន CDC បានសម្រេចចេញវិញ្ញាបនបត្រចុះបញ្ជី ឱ្យគម្រោងវិនិយោគស្ថានីយផលិតអគ្គិសនី ដើរដោយថាមពលពន្លឺព្រះអាទិត្យ អានុភាព៦០មេហ្គាវ៉ាត់ ជាមួយប្រព័ន្ធផ្ទុកថាមពលអគ្គិសនី របស់ក្រុមហ៊ុន Schneitec Vibrant Co., Ltd ស្ថិតនៅឃុំស្វាយចេក ស្រុករំដួល ខេត្តស្វាយរៀង ក្រោមទុនវិនិយោគ៦៥,៥ លានដុល្លារ និងបង្កើតការងារបាន៣៥កន្លែង។
រដ្ឋមន្ត្រីក្រសួងរ៉ែ និងថាមពល លោក កែវ រតនៈ នៅក្នុងវេទិកាពិភាក្សាស្តីពី “គោលនយោបាយរ៉ែ និងថាមពលនៅកម្ពុជា” កាលពីថ្ងៃទី២១ ខែវិច្ឆិកា បាននិយាយថា វិស័យថាមពលអគ្គិសនីនៅកម្ពុជា បានឆ្លងដំណាក់កាលដ៏លំបាកជាច្រើន ក្នុងរយៈពេលជាងទសវត្សរ៍កន្លងមក ដោយចាប់ផ្តើមពីគ្មានអគ្គិសនីប្រើប្រាស់ រហូតដល់មានអគ្គិសនីប្រើប្រាស់គ្រប់គ្រាន់ នឹងកំពុងឈានទៅនាំចេញទៅលក់ឱ្យប្រទេសជិតខាងក្នុងតំបន់ទៀតផង។
លោកបន្តថា ទន្ទឹមនឹងការកើនឡើង នៃសមត្ថភាពផលិតនេះ កម្ពុជា ក៏ត្រូវបានពិភពលោកទទួលស្គាល់ថា ជាប្រទេសដែលមានថាមពលពីប្រភពស្អាតដ៏ច្រើនផងដែរ ដោយថាមពលអគ្គិសនី ដែលកំពុងប្រើប្រាស់ នៅក្នុងប្រទេសបច្ចុប្បន្ន គឺមានលើសពី៦០ភាគរយ បានមកពីថាមពលស្អាត ឬកកើតឡើងវិញ (ថាមពលពីពន្លឺព្រះអាទិត្យ ខ្យល់ ទឹក និងរលកទឹកជាដើម)៕
