ដោយ: គង់ លាងហួរ
អន្តរជាតិ: តម្លៃហាងឆេងមាសបានធ្លាក់ថ្លៃចុះនៅថ្ងៃអង្គារនេះ បន្ទាប់ពីបានហក់ឡើងដល់កម្រិតខ្ពស់បំផុតកាលពីថ្ងៃច័ន្ទ ខណៈក្រុមពាណិជ្ជករបានកាត់បន្ថយការភ្នាល់គ្នាជុំវិញការបញ្ចុះអត្រាការប្រាក់លើកដំបូងរបស់ធនាគារ Federal Reserve នៅដើមឆ្នាំ២០២៤។
តួយ៉ាង តម្លៃមាស Spot Gold បានធ្លាក់ចុះ២,១% ដល់២០២៦,៦៩ដុល្លារក្នុងមួយអោន គិតនៅត្រឹមម៉ោងសកល1931 GMT ខណៈតម្លៃមាសរបស់សហរដ្ឋអាមេរិកU.S. gold futuresបានធ្លាក់ចុះ២,៣%ដល់២០៤២,២០ដុល្លារក្នុងមួយអោន។
ប្រាក់ ដុល្លារ អាមេរិកបាន ងើបឡើង ថ្លៃ វិញ នៅថ្ងៃ អង្គារនេះ ដោយបាន ងើបឡើង ជិត ដល់កម្រិតខ្ពស់បំផុតក្នុង រយៈ ពេល មួយ សប្តាហ៍ ធៀប នឹង កញ្ចប់រូបិយប័ណ្ណសំខាន់ៗ។
ប្រាក់ដុល្លារ អាមេរិកបានងើបឡើងថ្លៃតិចតួច បើធៀបទៅនឹងប្រាក់យ៉េនរបស់ប្រទេសជប៉ុន ដោយជួញដូរក្នុងតម្លៃ១៤៧,២៣យ៉េនក្នុងមួយដុល្លារ នៅព្រឹកថ្ងៃអង្គារនេះ។
នៅពេលនេះ ក្រុមពាណិជ្ជករបានមើលឃើញឱកាសចំនួន៥៧ភាគរយ ដែលធនាគារកណ្តាលអាមេរិក(Fed) អាចនឹងបញ្ចុះអត្រាការប្រាក់នៅខែមីនា ឆ្នាំ២០២៤ ពោលគឺធ្លាក់ចុះពី៦៣% កាលពីថ្ងៃសុក្រ សប្តាហ៍មុន។
ទន្ទឹមគ្នានេះ ក្រុមពាណិជ្ជករកំពុងរង់ចាំអ៊ុតមើលទិន្នន័យអត្រាអ្នកមានការងារធ្វើក្រៅពីវិស័យកសិកម្ម នៅសហរដ្ឋអាមេរិក ដែលអាចជួយវាស់ស្ទង់បន្ថែមទៀតនូវទស្សនវិស័យអត្រាការប្រាក់របស់ធនាគារ Fed។
តម្លៃលោហៈធាតុប្រាក់ Spot silver បានធ្លាក់ចុះ៣,៦% ដល់២៤,៥០ដុល្លារ ក្នុងមួយអោន ហើយតម្លៃផ្លាទីនបានធ្លាក់ចុះ២,៨%ដល់៩៧២,៦៧ដុល្លារក្នុងមួយអោន ខណៈតម្លៃ Palladium បានធ្លាក់ចុះ១,៧% ដល់៩១៧,៣១ដុល្លារ ក្នុងមួយអោន៕