ដោយៈ និស្ស័យ
ភ្នំពេញៈ ដំណើរការនៃប្រតិបត្តិការមីក្រូហិរញ្ញវត្ថុ និងស្ថាប័នហិរញ្ញវត្ថុនានានៅកម្ពុជា នៅបន្តភាពធន់នឹងវិបត្តិ ដោយនៅតែបង្ហាញនូវភាពរីកចម្រើនគួរឱ្យកត់សម្គាល់ ក្នុងការចាក់បញ្ចូលនូវប្រភពហិរញ្ញវត្ថុ ដើម្បីជំរុញចរន្តសកម្មភាពម៉ាក្រូសេដ្ឋកិច្ច ក្នុងអំឡុងពេលវិបត្តិរយៈពេល៤ឆ្នាំមកនេះ។
លោក សុខ វឿន ប្រធានក្រុមប្រឹក្សាភិបាលសមាគមមីក្រូហិរញ្ញវត្ថុកម្ពុជា (CMA) ថ្លែងក្នុងសន្និសីទមីក្រូហិរញ្ញវត្ថុប្រចាំឆ្នាំ ២០២៣ ស្តីពី “បរិយាបន្នហិរញ្ញវត្ថុ ប្រកបដោយការទទួលខុសត្រូវ ភាពធន់ និងនិរន្តរភាពរបស់វិស័យហិរញ្ញវត្ថុនៅកម្ពុជា” នៅខេត្តសៀមរាប កាលពីពេលថ្មីៗនេះ។
បើគិតត្រឹមត្រីមាសទី៣ ឆ្នាំ ២០២៣ វិស័យមីក្រូហិរញ្ញវត្ថុមានសមតុល្យឥណទានសរុបជាង៥ពាន់លានដុល្លារ និងមានអតិថិជនឥណទានសរុបជាង១,៥លាននាក់ ខណៈសមតុល្យប្រាក់បញ្ញើនៅតាមគ្រឹះស្ថានមីក្រូហិរញ្ញវត្ថុ ទទួលប្រាក់បញ្ញើ មានជាង២ពាន់លានដុល្លារ និងមានអតិថិជនដាក់ប្រាក់បញ្ញើសរុបជិត២លាននាក់។
លោកសុខ វឿនបានថ្លែងថា “វិស័យមីក្រូហិរញ្ញវត្ថុនៅកម្ពុជា នៅតែបន្តរក្សាបាននូវស្ថិរភាព តាមរយៈការផ្តល់សេវាកម្មជាមួយស្មារតីទទួលខុសត្រូវខ្ពស់ និងកិច្ចការពារអតិថិជន”។
លោកបន្ថែមថា សមាគមក៏កំពុងអនុវត្តន៍យន្តការ នៃការដោះស្រាយបណ្តឹង និងសំណូមពរអតិថិជន តាមប្រព័ន្ធហតឡាញប្រកបដោយប្រសិទ្ធភាពខ្ពស់ ព្រមទាំងអនុវត្តតាមគោលការណ៍គាំពារអតិថិជន ដែលក្នុងនោះរួមមាន ការដាក់លេខបណ្តឹងតវ៉ា របស់គ្រឹះស្ថាន លេខបណ្តឹងតវ៉ារបស់សមាគមទាំង២ នៅទីតាំងតែមួយនៅលើសៀវភៅឥណទានកិច្ចសន្យាឥណទាន ព្រមទាំងសម្ភារផ្សព្វផ្សាយផ្សេងៗ។
ជាមួយគ្នានេះ លោក ឡាយ សុខហេង ប្រធាននាយកដ្ឋានស្រាវជ្រាវសេដ្ឋកិច្ច និងសហប្រតិបត្តិការអន្តរជាតិ នៃធនាគារជាតិនៃកម្ពុជា (NBC) បានថ្លែងក្នុងសន្និសីទថា វិស័យហិរញ្ញវត្ថុកម្ពុជា នៅតែរក្សាបានភាពល្អប្រសើរ ទោះបីមានឧបសគ្គពីខាងក្រៅបណ្តាលមកពីភាពមិនច្បាស់លាស់ នៃសេដ្ឋកិច្ចពិភពលោក នៅពេលបច្ចុប្បន្នក៏ដោយ។
លោកថ្លែងថា កំណើនឥណទាន ក្នុងវិស័យមីក្រូហិរញ្ញវត្ថុបានបន្តកើនឡើងក្នុងល្បឿនដ៏ល្អ ធៀបនឹងរយៈពេលដូចគ្នាកាលពីឆ្នាំមុន ដែលភាគច្រើន ដោយសារការរួមចំណែកពីគ្រួសារ វិស័យជួញដូរ និងពាណិជ្ជកម្ម កសិកម្ម និងវិស័យសេវាកម្ម។
លោកលើកឡើងថា “មូលនិធិកម្ចីក្នុងវិស័យធនាគារ និងមីក្រូហិរញ្ញវត្ថុបានកើនជាលំដាប់ ហើយភាគច្រើនជារយៈពេលវែង ដែលជួយឱ្យពួកគេ គ្រប់គ្រងហានិភ័យសន្ទនីយភាពរបស់ពួកគេ កាន់តែប្រសើរ”។ លោកបន្តថា “ប្រាក់ចំណេញរបស់គ្រឹះស្ថានមីក្រូហិរញ្ញវត្ថុបានធ្លាក់ចុះតិចតួច ដោយសារការចំណាយកាន់តែខ្ពស់។ ដើមទុនរបស់ធនាគារ និងគ្រឹះស្ថានមីក្រូហិរញ្ញវត្ថុ នៅតែមានភាពល្អប្រសើរ និងខ្ពស់ជាងតម្រូវការបទប្បញ្ញត្តិចំនួន១៥ភាគរយ”។
ចំណែកលោកឧកញ៉ាហួត អៀងតុងប្រធានអគ្គនាយកធនាគាហត្ថាបានមានប្រសាសន៍ថា មានបញ្ហាប្រឈមក្នុងវិស័យនេះ ប៉ុន្តែស្ថានភាពនៅតែអាចគ្រប់គ្រងបាន ពិសេសធនាគារហត្ថានៅតែមានសុខភាពល្អប្រសើរ និងដំណើរការទៅមុខសន្សឹមៗ មិនមានសញ្ញានៃហានិភ័យនោះទេ ទោះបីជាអត្រាចំណេញធ្លាក់ចុះ និងការកើនឡើងនូវការសងត្រលប់យឺតតិចតួចក្តី។
លោក លី សូដេត សេដ្ឋវិទូជាន់ខ្ពស់នៃធនាគារពិភពលោកប្រចាំកម្ពុជាបានថ្លែងក្នុងសន្និសីទថា ការព្យាករកំណើនកម្ពុជា មានចំនួន ៥,៤ ភាគរយក្នុងឆ្នាំ២០២៣ ហើយនឹងកើនដល់៥,៨ ភាគរយនៅឆ្នាំ ២០២៤ និង៦,១ ភាគរយឆ្នាំ ២០២៥។ លោកបន្តថា “បញ្ហាប្រឈមផ្នែករចនាសម្ព័ន្ធ និងឧបសគ្គសេដ្ឋកិច្ចសកលនៅតែបន្ត”។
លោកបញ្ជាក់ថា ការប្រើប្រាស់ផ្នែកឯកជនបានធ្លាក់ចុះ ខណៈតម្រូវការក្នុងស្រុកក៏កំពុងធ្លាក់ចុះផងដែរ ខណៈការនាំចូលទំនិញប្រើប្រាស់ និងទំនិញដែលប្រើប្រាស់រយៈពេលយូរបានធ្លាក់ចុះ។ ជាមួយគ្នានេះដែរ កម្រិតស្ថានភាពរបស់ប្រជាពលរដ្ឋ ក៏ប្រឈមនឹងការធ្លាក់ចុះនៃប្រាក់ឈ្នួល និងកំណើនយឺតក្នុងទីផ្សារការងារ កាត់បន្ថយការប្រើប្រាស់ជាដើម៕
