ដោយ: គង់ លាងហួរ
អន្តរជាតិ: យោងតាមទិន្នន័យរបស់រដ្ឋាភិបាលជប៉ុនបានបង្ហាញឱ្យដឹងកាលពីពេលថ្មីៗនេះថា ចំនួនភ្ញៀវទេសចរបរទេសចូលទៅកាន់ប្រទេសជប៉ុនក្នុងខែតុលា ឆ្នាំ២០២៣នេះ មានរហូតដល់ទៅ២.៥១៦.៥០០នាក់។
តួលេខខាងលើនេះបានបង្ហាញសញ្ញានៃការកើនឡើង០,៨ភាគរយ បើធៀបនឹងខែតុលាដូចគ្នា ក្នុងឆ្នាំ២០១៩ ដោយនេះជាលើកទីមួយហើយ ដែលតួលេខប្រចាំខែបានកើនឡើងលើសពីកម្រិតមុនផ្ទុះជំងឺរាតត្បាតកូវីដ-១៩ កាលពីឆ្នាំ២០១៩។
យោងតាមអង្គការទេសចរណ៍ជាតិជប៉ុនបានឱ្យដឹងថា តួលេខភ្ញៀវទេសចរបរទេសក្នុងខែតុលា ឆ្នាំ២០២៣នេះ បានកើនឡើងប្រហែល៥ដង បើធៀបនឹងខែតុលាដូចគ្នា កាលពីឆ្នាំ២០២២ ដោយសារការធ្លាក់ថ្លៃនៃប្រាក់យ៉េន និងការបើកដំណើរការសេវាកម្មអាកាសចរណ៍ឡើងវិញ ដែលបានរួមចំណែកដល់ការវិលត្រឡប់របស់ជនបរទេស។
ការមកដល់នៃភ្ញៀវទេសចរបរទេស គិតចាប់ពីខែមករារហូតដល់ខែតុលា មានចំនួនសរុប១៩.៨៩១.១០០នាក់ ដែលងើបឡើងវិញដល់៧៣,៩ភាគរយនៃកម្រិតមុនជំងឺរាតត្បាត ហើយតួលេខ នេះ ស្ថិត ក្នុង ល្បឿន ឆ្ពោះទៅដល់២៥ លាន សម្រាប់ ឆ្នាំ ២០២៣នេះ។
ទន្ទឹមនឹងនេះ ជនជាតិជប៉ុន ដែលបានធ្វើដំណើរកំសាន្តទៅក្រៅប្រទេសក្នុងខែតុលា មានចំនួន៩៣៧.៧០០នាក់ ដែលធ្លាក់ចុះ៤៣,៦ភាគរយ បើធៀបនឹងខែដូចគ្នាក្នុងឆ្នាំ២០១៩កន្លងទៅ៕
