ដោយ: គង់ លាងហួរ
អន្តរជាតិ: ផ្សារហ៊ុននៅតំបន់អាស៊ីបានស្ថិតនៅទ្រឹង នៅថ្ងៃច័ន្ទនេះ មុនពេលចេញផ្សាយនូវទិន្នន័យអតិផរណារបស់សហរដ្ឋអាមេរិក និងអឺរ៉ុប ក្នុងសប្តាហ៍នេះ ខណៈអ្នកវិនិយោគក៏កំពុងរង់ចាំមើលកិច្ចប្រជុំរបស់អង្គការបណ្តាប្រទេសនាំចេញប្រេង OPEC+ផងដែរ។
សន្ទស្សន៍ភាគហ៊ុនអាស៊ីប៉ាស៊ីហ្វិករបស់ក្រុមហ៊ុនអាមេរិក MSCI នៅខាងក្រៅប្រទេសជប៉ុនបានស្ថិតនៅទ្រឹងនៅថ្ងៃច័ន្ទនេះ ខណៈផ្សារហ៊ុន S&P 500 futures បានធ្លាក់ថ្លៃចុះ០,១ភាគរយ ហើយផ្សារហ៊ុន Nasdaq futures បានធ្លាក់ថ្លៃចុះ០,២ភាគរយ។
ផ្សារហ៊ុន Nikkei របស់ប្រទេសជប៉ុនបានធ្លាក់ថ្លៃ០,៣៩ភាគរយ ខណៈសន្ទស្សន៍ផ្សារហ៊ុន Hang Seng របស់ទីក្រុងហុងកុងបានធ្លាក់ថ្លៃចុះ០,៨៨ភាគរយ។
សន្ទស្សន៍ផ្សារហ៊ុនបន្ទះឈីបពណ៌ខៀវ CSI 300 របស់ប្រទេសចិនបានធ្លាក់ថ្លៃចុះ១,០ភាគរយ ខណៈសន្ទស្សន៍ផ្សារហ៊ុន Shanghai Composite បានធ្លាក់ថ្លៃចុះ០,៦៩ភាគរយ។
ផ្សារហ៊ុនរបស់ប្រទេសអូស្ត្រាលី S&P/ASX 200 បានធ្លាក់ថ្លៃចុះ០,៤១ភាគរយ ខណៈដែលសន្ទស្សន៍ផ្សារហ៊ុនKOSPI របស់ប្រទេសកូរ៉េខាងត្បូងបានងើបឡើងថ្លៃ០,១៨ភាគរយ។
ចំណែកឯ តម្លៃប្រេងមានការប្រែប្រួលតិចតួចនៅថ្ងៃច័ន្ទនេះ ដោយប្រេងឆៅ Brent ជួញដូរក្នុងតម្លៃលើសពី៨០ដុល្លារក្នុងមួយបារ៉ែល ខណៈដែលអ្នកវិនិយោគកំពុងរង់ចាំលទ្ធផលពីកិច្ចប្រជុំរបស់អង្គការ OPEC + នៅចុងសប្តាហ៍នេះ។
តម្លៃប្រេងឆៅ Brent futures បានកើនឡើង១២សេន ដល់៨០,៧០ដុល្លារក្នុងមួយបារ៉ែលគិតត្រឹមម៉ោងសកល 0028 GMT ខណៈតម្លៃប្រេងឆៅរបស់អាមេរិក West Texas Intermediate futures បានកើនឡើង១០សេន ដល់៧៥,៦៤ដុល្លារក្នុងមួយបារ៉ែល៕
