អ្នកស្រី Angelina Jolie ជាតារាសម្តែងដ៏ល្បីដែលធ្លាប់ឈ្នះពានរង្វាន់ Academy និងជារឿយៗត្រូវបានគេកោតសរសើរចំពោះការងាររបស់គាត់នៅក្នុងហូលីវូដ។ ប៉ុន្តែភាពល្បីល្បាញនៃការសម្តែងរបស់អ្នកស្រី មិនមែនជាសមិទ្ធផលដ៏ធំបំផុតដែលអ្នកស្រីបានរួមចំណែកជួយពិភពលោកនោះទេ។ អ្នកស្រីគឺជាគំរូដ៏អស្ចារ្យមួយដែលបង្ហាញថា អ្នកមានអំណាច និងឥទ្ធិពលអាចក្លាយទៅជាសប្បុរសជនដ៏អស្ចារ្យ ដោយបានគាំទ្រការប្រយុទ្ធប្រឆាំងនឹងភាពក្រីក្រជាសកល។
កិច្ចខិតខំប្រឹងប្រែងមនុស្សធម៌របស់អ្នកស្រីAngelina Jolie
ជាង២០ឆ្នាំមកនេះ អ្នកស្រីបានបម្រើការអោយឧត្តមស្នងការអង្គការសហប្រជាជាតិសម្រាប់ជនភៀសខ្លួន (UNHCR) និងមានតួនាទីជាឯកអគ្គរដ្ឋទូតសុច្ឆន្ទៈអស់រយៈពេលជាច្រើនឆ្នាំ។ ក្នុងអំឡុងពេលនោះ អ្នកស្រីបានធ្វើដំណើរជុំវិញពិភពលោក ដើម្បីជួបជាមួយសហគមន៍ជនភៀសខ្លួន មកពីប្រទេសយេម៉ែន និងប៊ូគីណាហ្វាសូ ហើយបានតស៊ូមតិជាបន្តបន្ទាប់ដើម្បីសុំការគាំទ្រពីអន្តរជាតិក្នុងការជួយដល់ជនភៀសខ្លួន និងអ្នកស្វែងរកសិទ្ធិជ្រកកោន។
ទោះបីជាអ្នកស្រីលែងបម្រើការជាមួយអង្គការសហប្រជាជាតិក៏ដោយអ្នកស្រីនៅតែបន្តការងារមនុស្សធម៌អស់រយៈពេលពីរទសវត្សរ៍នៅប្រទេសកម្ពុជា តាមរយៈមូលនិធិ Maddox Jolie-Pitt។
អ្នកស្រីបានមកប្រទេសកម្ពុជាលើកដំបូងនៅពេលមកថតរឿង Lara Croft: Tomb Raider ក្នុងឆ្នាំ២០០០ ហើយអ្នកស្រីមានអារម្មណ៍ជាប់ចិត្តនឹងប្រទេសនេះយ៉ាងខ្លាំង។ អ្នកស្រីពេញចិត្តនូវភាពស្រស់ស្អាតភាពធន់ ភាពទន់ភ្លន់ និងភាពកក់ក្តៅរបស់ប្រជាជនកម្ពុជា”។ ក្នុងអំឡុងពេលថតខ្សែភាពយន្តនោះ អ្នកស្រីបានស្មុំកូនខ្មែរដំបូងដែលមានឈ្មោះ ថា Maddox។ ក្រោយមកអ្នកស្រីបានបង្កើតអង្គការ ហើយដាក់ឈ្មោះថាមូលនិធិ Maddox Jolie-Pitt ដែលផ្តោតលើ “ការអភិរក្សបរិស្ថាន និងគាំទ្រសហគមន៍ជនបទ” នៅកម្ពុជា។
មូលនិធិ Maddox Jolie-Pitt
ភារកិច្ចដំបូងរបស់អង្គការគឺបង្កើតបរិយាកាសសុវត្ថិភាពសម្រាប់សហគមន៍ជនបទ និងកំណត់ដំណាក់កាលសម្រាប់ការការពារបរិស្ថានតាមរយៈការបោសសម្អាតមីន។ កម្ពុជាជាប្រទេសមួយក្នុងចំណោមប្រទេសដែលមានមីនច្រើនជាងគេក្នុងពិភពលោក។ ជាក់ស្តែង គ្រាប់មីនមិនទាន់ផ្ទុះប្រមាណ ៤លានគ្រាប់ត្រូវបានដោះចេញចន្លោះពីឆ្នាំ ១៩៩២ ដល់ឆ្នាំ ២០១៨។ គ្រាប់មីនដែលបានបង្កប់ដោយខ្មែរក្រហមក្នុងទសវត្សរ៍ឆ្នាំ ១៩៨០ និង ១៩៩០ បានជះឥទ្ធិពលយ៉ាងធ្ងន់ធ្ងរដល់ជនស៊ីវិលនៅកម្ពុជា។ ខណៈដែលគ្រាប់មីននៅតែមានរហូតដល់សព្វថ្ងៃនេះ ការខិតខំរបស់មូលនិធិ Maddox Jolie-Pitt បានធ្វើឱ្យមានភាពខុសគ្នាយ៉ាងខ្លាំងក្នុងការធ្វើឱ្យប្រជាជនកម្ពុជាមានសុវត្ថិភាព។
ធាតុសំខាន់នៃការគាំទ្រសហគមន៍នៅកម្ពុជារបស់មូលនិធិ គឺក្រុមការងារទាំងអស់ជាជនជាតិខ្មែរ ពីព្រោះពួកគេយល់ដឹងអំពីបញ្ហាក្នុងតំបន់ និងរស់នៅដោយផ្ទាល់ជាមួយសហគមន៍ដែលជាចំណុចសំខាន់នៃបេសកកម្មរបស់ពួកគេ។ ដោយសារក្រុមការងាររស់នៅក្នុងភូមិក្នុងស្រុក ពួកគេនឹងមិនមានបញ្ហាជុំវិញខ្វះការយល់ដឹងអំពីវប្បធម៌ ដែលបង្កភាពងាយស្រូលក្នុងការធ្វើការរវាងមូលនិធិ និងសហគមន៍ជនបទ។
ដោយស្ថានភាពមីននៅប្រទេសកម្ពុជាមានភាពធូស្រាល ក្រុមការងារបានផ្តោតលើគំនិតផ្តួចផ្តើមសំខាន់ៗចំនួន៦ផ្សេងទៀតរួមមាន ការអភិរក្ស កសិកម្ម ការអប់រំ ការពង្រឹងអំណាចរបស់ស្ត្រី កំណើនសេដ្ឋកិច្ច និងសុខភាព។ វិស័យទាំងអស់នេះគឺជាបញ្ហាប្រឈមដែលសហគមន៍ជនបទក្នុងប្រទេសកម្ពុជាត្រូវជម្នះចាប់តាំងពីការបញ្ចប់ជម្លោះនៅក្នុងប្រទេស។
បច្ចុប្បន្ន ប្រហែល ១៧.៨% នៃប្រជាជនរស់នៅក្រោមបន្ទាត់នៃភាពក្រីក្រ។ លទ្ធភាពទទួលបានតម្រូវការមូលដ្ឋាន អនាម័យ និងការអប់រំបានប្រសើរឡើងក្នុងទសវត្សរ៍កន្លងមក ប៉ុន្តែត្រូវការវឌ្ឍនភាពបន្ថែមទៀត ហើយអង្គការមិនមែនរដ្ឋាភិបាលបានដើរតួនាទីយ៉ាងសំខាន់នៅក្នុងដំណើរការនេះ។
គំនិតផ្តួចផ្តើមដោយមូលនិធិMaddox Jolie-Pitt កំពុងគាំទ្រដល់វិស័យសុខាភិបាល និងវិបុលភាពយូរអង្វែងនៃសហគមន៍កម្ពុជា។ មូលនិធិបានបើកគ្លីនិកថែទាំសុខភាពចំនួនពីរ និងបន្ទប់សម្ភព រួមទាំងផ្តល់ការបណ្តុះបណ្តាលគ្រូពេទ្យ និងម្តាយវ័យក្មេងលើការថែទាំសុខភាពកុមារ។ គំនិតផ្តួចផ្តើមថ្មីៗបានបង្កើតកម្មវិធីបណ្តុះបណ្តាលកសិករ ដើម្បីជួយសហគមន៍ជនបទរក្សាលទ្ធភាពទទួលបានអាហារដែលមានសុវត្ថិភាព និងជីវជាតិ ក៏ដូចជាការប្រើប្រាស់ដី និងធនធានឱ្យបានល្អបំផុត។
លើសពីនេះ មូលនិធិបានបង្កើតបណ្ណាល័យចល័តចំនួនពីរ ដែលធ្វើដំណើរជុំវិញប្រទេសកម្ពុជា ជាមួយនឹងធនធានចាំបាច់ ដើម្បីប្រយុទ្ធប្រឆាំងនឹងអនក្ខរកម្ម។ ការទទួលបានធនធានអប់រំអោយស្មើភាពគ្នានៅតែជាបញ្ហា ជាពិសេសនៅតាមតំបន់ជនបទ ឬតំបន់ក្រីក្រខ្លាំង។ ដើម្បីដោះស្រាយបញ្ហានេះ មូលនិធិ Maddox Jolie-Pitt បានផ្គត់ផ្គង់សម្ភារៈក្នុងថ្នាក់ និង “ធ្វើការជាមួយគ្រូបង្រៀននៅតាមជនបទចំនួន៨២ នាក់នៅតាមសាលាបឋមសិក្សា និងមធ្យមសិក្សាចំនួន១០ដើម្បីកែលម្អការបង្រៀន និងអគារសិក្សា”។
មូលនិធិ Maddox-Jolie Pitt ទទួលស្គាល់សារៈសំខាន់នៃទំនាក់ទំនងរវាងការអភិរក្សបរិស្ថាន និងការអប់រំ ហើយកំពុងបន្តកិច្ចខិតខំប្រឹងប្រែងដើម្បីកែលម្អកត្តាទាំងពីរនេះ។ អ្នកសម្របសម្រួលផ្នែកអប់រំ និងក្រុមអភិរក្សរបស់មូលនិធិបានបង្កើតក្លឹប Eco-Ranger នៅក្នុងសាលារៀន ដើម្បីបង្រៀនសិស្សអំពីតម្លៃព្រៃឈើ ការកាប់ព្រៃឈើ ជីវចម្រុះ និងកាកសំណល់។ កម្មវិធីទាំងនេះបង្ហាញពីការប្តេជ្ញាចិត្តរបស់មូលនិធិMaddox Jolie-Pitt ក្នុងការគាំទ្រសហគមន៍ជនបទរបស់ប្រទេសកម្ពុជា តាមរយៈកម្មវិធីប្រកបដោយចីរភាព។ ។ Borgen Magazine
