តែម សុខុម
អន្តរជាតិៈ យោធាអុីស្រាអែល បានវាយលុកចូលទៅក្នុងតំបន់ Gaza នៃទឹកដីប៉ាឡេស្ទីន កាន់តែជ្រៅដើម្បីជីករំលើងឫសគល់របស់ក្រុម Hamas ក្រោយពីក្រុមនេះបានបើកការវាយប្រហារទៅលើអុីស្រាអែល នៅថ្ងៃទី៧ ខែតុលា ឆ្នាំនេះ។
ហើយចាប់តាំងពីពេលនោះ អគ្គនាយកដ្ឋានគណនេយ្យនៃក្រសួងហិរញ្ញវត្ថុអុីស្រាអែល បានធ្វើការកត់ត្រាលម្អិតប្រចាំថ្ងៃនូវរាល់ការចំណាយលើសង្គ្រាមនេះ។
ការចំណាយទាំងនោះបានកើនឡើងយ៉ាងឆាប់រហ័សពីមួយថ្ងៃទៅមួយថ្ងៃ ទោះបីជាពេលនេះកិច្ចព្រមព្រៀងដោះលែងចំណាប់ខ្មាំងមួយអាចផ្អាកការបាញ់គ្នាបានរយៈពេល៤ថ្ងៃក្ដី។ នេះបើយើងតាមសារព័ត៌មាន The Edge Markets ចុះផ្សាយកាលពីថ្ងៃព្រហស្បតិ៍ ទី២៣ ខែវិច្ឆិកា។
ស្ថាប័នប្រឹក្សាហិរញ្ញវត្ថុ Leader Capital Markets ក្នុងប្រទេសអុីស្រាអែល បានឱ្យដឹងថា សង្គ្រាមដែលក្រសួងហិរញ្ញវត្ថុប៉ាន់ប្រមាណថាចំណាយក្នុងមួយថ្ងៃអស់ប្រមាណ២៧០លានដុល្លារអាមេរិក នេះនឹងធ្វើឱ្យការចំណាយសរុបឈានរហូតដល់ប្រមាណ៤៨ពាន់លានដុល្លារអាមេរិក ក្នុងឆ្នាំសារពើពន្ធ២០២៣-២០២៤។
ស្ថាប័នប្រឹក្សាហិរញ្ញវត្ថុ Leader Capital Markets ឱ្យដឹងថា ប្រទេសអុីស្រាអែល ទំនងជាត្រូវរ៉ាប់រង២ភាគ៣លើការចំណាយសរុបសម្រាប់សង្គ្រាមនេះ ហើយសល់ប៉ុន្មានសហរដ្ឋអាមេរិក ជាអ្នករ៉ាប់រងចំណាយ។
នេះមានន័យថា រដ្ឋាភិបាលអុីស្រាអែល នឹងត្រូវខ្ចីបំណុលយ៉ាងច្រើនសន្ធឹកសន្ធាប់ដើម្បីចំណាយលើសង្គ្រាមនេះ ដែលជាជម្លោះប្រដាប់អាវុធដ៏អាក្រក់បំផុតរបស់ខ្លួនក្នុងរយៈពេលកន្លះសតវត្សរ៍មកនេះ។
លោក Yali Rothenberg អគ្គនាយកនៃអគ្គនាយកដ្ឋានគណនេយ្យនៃក្រសួងហិរញ្ញវត្ថុ បានលើកឡើងក្នុងបទសម្ភាសន៍មួយថា ការចំណាយយ៉ាងច្រើនសន្ធឹកសន្ធាប់របស់អុីស្រាអែល លើសង្គ្រាមប្រឆាំងប៉ាឡេស្ទីន បានធ្វើឱ្យទីផ្សារសញ្ញាប័ណ្ណទំហំ៣០០ពាន់លានដុល្លារអាមេរិក របស់ប្រទេសអុីស្រាអែល ប្រឈមហានិភ័យ៕ The Edge Markets៕