ចំណេះដឹង! តើ​អ្នក​បាន​យល់​ពី​ផ្សា​រមូល​ប​ត្រ​ហើយ​ឬ​នៅ?

ដោយៈ សាវុធ

ភ្នំពេញៈ និយាយ​ដោយ​សាមញ្ញ ផ្សា​រមូល​ប​ត្រ​គឺជា​ផ្សារ​សម្រាប់​ជួញដូរ​មូល​ប​ត្រ។ ហើយ​ចុះ​មូល​ប​ត្រ​គឺជា​អ្វី? មូល​ប​ត្រ​គឺជា​កិច្ចសន្យា​ហិរញ្ញវត្ថុ ដែល​អាច​ជួញដូរ​បាន។

កិច្ចសន្យា​នេះ​បញ្ជាក់​ពី​កម្មសិទ្ធិ បំណុល​ឬ​សិទ្ធិ/កាតព្វកិច្ច​ក្នុង​ការទិញ/លក់ ជាដើម។ បច្ចុប្បន្ន នៅលើ​ផ្សា​រមូល​ប​ត្រ​កម្ពុជា មានតែ​មូល​ប​ត្រ​ភាគហ៊ុន​មួយ​មុខ​ប៉ុណ្ណោះ ដែល​ត្រូវបាន​ជួញដូរ។

មូល​ប​ត្រ​ភាគហ៊ុន គឺជា​កិច្ចសន្យា​ដែល​បញ្ជាក់​ពី​ភាព ជា​ម្ចាស់​កម្មសិទ្ធិ​មួយផ្នែក​លើ​ក្រុមហ៊ុន​មួយ។ ដូច្នេះ​សរុបមក​វិញ ផ្សា​រមូល​ប​ត្រ​ភាគហ៊ុន (ឬ​និយាយ​ដោយ​ខ្លី​ថា “ផ្សារ​ហ៊ុន”) គឺជា​ផ្សារ​ដែល​ជួញដូរ​កម្មសិទ្ធិ​លើ​ក្រុមហ៊ុន​មួយ។

ចុចទីនេះដើម្បី Subscribe Telegram Channel «Cambodia Financial Times» សម្រាប់ទទួលបានព័ត៌មានថ្មីៗ

បើ​និយាយ​ឱ្យ​ស៊ីជម្រៅ​ជាង​នេះ​បន្តិច ផ្សារភាគហ៊ុន​ចែកជា​ពីរ​ដំណាក់​គឺ៖ ទីផ្សារ​ដំបូង និង​ទីផ្សារ​បន្ទាប់។

ទីផ្សារ​ដំបូង (Primary Market)

ទីផ្សារ​ដំបូង​គឺជា​ទីផ្សារ​ដែល​ភាគហ៊ុន(ទើប​បោះផ្សាយ​ជា​សាធារណៈ​លើកដំបូង​ដោយ​ក្រុមហ៊ុន​មួយ) ត្រូវបាន​ដាក់ឱ្យ​ជួញដូរ​ជា​លើកដំបូង។ បានសេចក្តីថា ជាទី​ផ្សារ​ដែល​វិនិយោគិន​សាធារណៈ​ទិញ​ភាគហ៊ុន ដោយផ្ទាល់​ពី​ក្រុមហ៊ុន​បោះផ្សាយ។ គឺ​ប្រៀបបាន​នឹង ការទិញ​ទំនិញ​មួយ​ដោយ​អ្នកប្រើប្រាស់ ដោយផ្ទាល់​ពី​ក្រុមហ៊ុន​ផលិត ដូច្នោះ​ដែរ។

ទីផ្សារ​បន្ទាប់ (Secondary Market)

វិនិយោគិន​ដែល​ទិញ​ភាគហ៊ុន​នៅ​ទីផ្សារ​ដំបូង ហើយ​ចង់​លក់​ភាគហ៊ុន​នោះ​ចេញ​ដើម្បី​យក​សាច់ប្រាក់​មកវិញ ត្រូវ​លក់​ភាគហ៊ុន​នោះ​ទៅឱ្យ​វិនិយោគិន​ដទៃទៀត ដែល​ចង់​ទិញ​ភាគហ៊ុន​របស់ខ្លួន គឺ​មិនមែន​លក់​ទៅឱ្យ​ក្រុមហ៊ុន​បោះផ្សាយ​វិញ​ទេ។ ការទិញ​លក់​តទៅ​នេះ រវាង​វិនិយោគិន(អ្នកទិញ) និង​វិនិយោគិន(អ្នកលក់) ត្រូវបាន​គេ​ហៅថា ជាការ​ទិញ​លក់​នៅ​ទីផ្សារ​បន្ទាប់ គឺ​ប្រៀបបាន​នឹង​ការជួញដូរ​វត្ថុ “ជជុះ” រវាង​អ្នកប្រើប្រាស់​ដូចគ្នា​ដូច្នោះ​ដែរ គ្រាន់តែ​ភាគហ៊ុន​មិនចេះ​សិ​ករិច​រិល​ប៉ុណ្ណោះ។

ការជួញដូរ​នៅ​ទីផ្សារ​បន្ទាប់ គឺធ្វើឡើង​នៅ​ក្រុមហ៊ុន​ផ្សារ​មូល​ប​ត្រ​កម្ពុជា(ផ.ម.ក.)។ ផ.ម.ក. មាន​តួនាទី​ចម្បង​ក្នុង​ការផ្តល់សេវា​ទីកន្លែង និង​ប្រព័ន្ធ​ជួញដូរ សម្រាប់​វិនិយោគិន​ងាយស្រួល​រកគ្នា​ឃើញ(អ្នកលក់​និង​អ្នកទិញ) ដើម្បី​ជួញដូរ​ជាមួយគ្នា។

សូមបញ្ជាក់​ជូន​ថា ទោះបី​ទិញ/លក់​ភាគហ៊ុន​នៅ​ទីផ្សារ​ដំបូង​ក្តី នៅ​ទីផ្សារ​បន្ទាប់​ក្តី វិនិយោគិន ត្រូវ​ទៅរក​ក្រុមហ៊ុន​មូល​ប​ត្រ​ដូចគ្នា មិនមែន​ទៅរក​ក្រុមហ៊ុន​បោះផ្សាយ​លក់​មូល​ប​ត្រ ឬ​ទៅរក​ក្រុមហ៊ុន​ផ្សារ​មូល​ប​ត្រ​កម្ពុជា(ផ.ម.ក.)ឡើយ។ ក្រុមហ៊ុន​មូល​ប​ត្រ​គឺជា​ជំនួយការ​របស់​វិនិយោគិន ទាក់ទង​នឹង​វិស័យ​មូល​ប​ត្រ។ ពួកគេ​នឹង​ជួយ​ពន្យល់ និង​ទិញ/លក់​ភាគហ៊ុន​ឱ្យ​វិនិយោគិន ដែលជា​អតិថិជន ឬ​អតិថិជន​សក្តានុពលរ​បស់​ខ្លួន៕

LEAVE A REPLY

Please enter your comment!
Please enter your name here