ដោយ: គង់ លាងហួរ
ម៉ានីល: ប្រធានាធិបតីហ្វីលីពីនលោក Ferdinand Marcos Jr បានមានប្រសាសន៍កាលពីពេលថ្មីៗនេះថា រដ្ឋាភិបាលហ្វីលីពីននៅតែប្តេជ្ញាចិត្ត ក្នុងការចាប់ផ្តើមប្រតិបត្តិការ មូលនិធិវិនិយោគSovereign Wealth Fund (SWF) របស់ខ្លួននៅចុងឆ្នាំនេះ។
នេះបើយោងតាមសារពត៌មាន Reuter ចុះផ្សាយកាលពីពេលថ្មីៗកន្លងទៅនេះ។ លោក Marcos បានបញ្ជាក់នៅក្នុងសុន្ទរកថាមួយ មុនពេលលោកចាកចេញ ទៅកាន់ទីក្រុងរីយ៉ាដ (Riyadh) ប្រទេសអារ៉ាប៊ីសាអូឌីត ដើម្បីចូលរួមកិច្ចប្រជុំកំពូល ក្រុមប្រឹក្សាសហប្រតិបត្តិការអាស៊ាន-ឈូងសមុទ្រពែក្សថា រដ្ឋាភិបាលហ្វីលីពីន កំពុងស្វែងរកមធ្យោបា យ ដើម្បីធ្វើឱ្យមូលនិធិនេះ ជិតដល់ភាពល្អឥតខ្ចោះ និងល្អបំផុតតាមដែលអាចធ្វើទៅបាន។
លោក Marcos បានបន្តថា ទិដ្ឋភាពដ៏សំខាន់បំផុតមួយនៃការធ្វើដំណើររបស់លោក ទៅកាន់ទីក្រុងរីយ៉ាដ រួមមានការណែនាំមូលនិធិSovereign Wealth Fund (SWF) របស់ខ្លួនទៅកាន់ពិភពលោក ជាពិសេសទៅកាន់បណ្តាប្រទេសនៅតំបន់មជ្ឈិមបូព៌ា។ ទោះជាយ៉ាងនេះក្តី លោក Marcos ក៏ធ្លាប់បានពន្យារពេលលើការអនុវត្តមូលនិធិនេះផងដែរ ដើម្បីធានាបាននូវការការពារសុវត្ថិភាព។
រដ្ឋាភិបាលហ្វីលីពីន បានលើកសរសើរមូលនិធិនេះ ដែលត្រូវបានចុះហត្ថលេខា ឱ្យក្លាយទៅជាច្បាប់ កាលពីខែកក្កដាកន្លងទៅ ដែលជាកត្តាជំរុញដ៏សំខាន់ សម្រាប់កំណើនសេដ្ឋកិច្ចរបស់ប្រទេសហ្វីលីពីន និងផែនការក្នុងការធ្វើឱ្យប្រសើរឡើង នូវវិស័យហេដ្ឋារចនាសម្ព័ន្ធ៕
