ដោយ: គង់ លាងហួរ
អន្តរជាតិ: តម្លៃហាងឆេងមាសបានងើបឡើងថ្លៃ នៅថ្ងៃព្រហ ស្បតិ៍នេះ ខណៈដែលជម្លោះនៅតំបន់មជ្ឈិមបូព៌ា បានធ្វើឱ្យអ្នកវិនិយោគមានការព្រួយបារម្ភ ទោះបីជាប្រាក់ដុល្លារ និងផលប័ត្ររតនាគារអាមេរិកបន្តហក់ឡើងថ្លៃយ៉ាងណាក្តី។
តម្លៃមាស Spot Gold បានងើបឡើង០,៣% ដល់១៩៨៥,៨៩ដុល្លារក្នុងមួយអោន គិតត្រឹមម៉ោងសកល 0137 GMT ខណៈតម្លៃមាសរបស់សហរដ្ឋអាមេរិកU.S. gold futures បានងើបឡើង០,១% ដល់១៩៩៦,៣០ដុល្លារក្នុងមួយអោន។
ជាមួយគ្នានេះ អ្នកវិនិយោគកំពុងរង់ចាំអ៊ុតមើលតួលេខ GDP របស់សហរដ្ឋអាមេរិកសម្រាប់ត្រីមាសទី៣ ដែលគ្រោងចេញផ្សាយនៅថ្ងៃនេះ និងសន្ទស្សន៍តម្លៃPCE ដែលគ្រោងចេញផ្សាយនៅថ្ងៃសុក្រស្អែក មុនពេលធនាគារកណ្តាលអាមេរិក(Fed) ធ្វើការសម្រេចចិត្តលើអត្រាការប្រាក់នៅសប្តាហ៍ក្រោយ។
ប្រាក់ដុល្លារ និងផលប័ត្ររតនាគាររយៈពេល១០ឆ្នាំ របស់សហរដ្ឋអាមេរិកបានហក់ឡើងថ្លៃ បន្ទាប់ពីទិន្នន័យបានបង្ហាញថា ការលក់ផ្ទះថ្មីនៅសហរដ្ឋអាមេរិក បានកើនឡើងដល់កម្រិតខ្ពស់បំផុត ក្នុង រយៈពេល១៩ខែកាលពីខែកញ្ញា។
សមាគមមាសចិនបានរាយការណ៍ កាលពីថ្ងៃពុធម្សិលមិញនេះថា ការប្រើប្រាស់មាសរបស់ប្រទេសចិន នៅក្នុងត្រីមាសទី៣ ឆ្នាំ២០២៣នេះ បានកើនឡើង៧,៣% បើធៀបនឹងឆ្នាំមុន។
ចំណែក ក្រុមហ៊ុន SPDR Gold Trust ដែលជាមូលនិធិជួញដូរមាសដ៏ធំបំផុតរបស់ពិភពលោក បានរាយការណ៍ថា ការកាន់កាប់មាសរបស់ក្រុមហ៊ុនខ្លួន បានកើនឡើង០,២% កាលពីថ្ងៃពុធ។
ទន្ទឹមគ្នានេះ តម្លៃលោហៈធាតុប្រាក់ Spot silver បានងើបឡើង០,១% ដល់២២,៩២ដុល្លារក្នុងមួយអោន តម្លៃផ្លាទីនបានធ្លាក់ចុះ០,៤% មកត្រឹម៨៩៨,៨៨ដុល្លារក្នុងមួយអោន ហើយតម្លៃប៉ាឡាដ្យូម (palladium) ធ្លាក់ចុះ០,៦% មកត្រឹម១១១៩,១៤ដុល្លារ ក្នុងមួយអោន៕
