ដោយ: គង់ លាងហួរ
ប៉េកាំង: ប្រធានាធិបតីចិនលោក ស៊ី ជីនពីង បានសន្យាថា ក្រុមហ៊ុនបរទេស កាន់តែអាចចូលទៅកាន់ទីផ្សារ ដ៏ធំរបស់ប្រទេសចិន និងផ្តល់ហិរញ្ញប្បទានថ្មីជាង១០០ពាន់លានដុល្លារ សម្រាប់ប្រទេសកំពុងអភិវឌ្ឍផ្សេងទៀត ខណៈដែលលោកបានបើកវេទិកាមួយកាលពីថ្ងៃពុធស្តីពីគំនិតផ្តួចផ្តើម ហេដ្ឋារចនាសម្ព័ន្ធខ្សែក្រវ៉ាត់ និងផ្លូវ។
នៅក្នុងពិធីបើកវេទិកាខ្សែក្រវ៉ាត់ និងផ្លូវនៅសាលប្រជុំប្រជាជន លោក ស៊ីបានសន្យាថា ធនាគារអភិវឌ្ឍន៍ ដែលគាំទ្រដោយរដ្ឋចិនចំនួន២គឺ ធនាគារអភិវឌ្ឍន៍ចិន និងធនាគារនាំចេញ-នាំចូលរបស់ចិន នឹងរៀបចំថវិកាផ្តល់ហិរញ្ញប្បទាន ចំនួន៣៥០ពាន់លានយ័ន (៤៧,៩ពាន់លានដុល្លារអាមេរិក។
ចំណែក ទឹកប្រាក់បន្ថែម៨០ពាន់លានយ័ន CNY (ប្រហែល១១ពាន់លានដុល្លារ) នឹងត្រូវបានវិនិយោគ នៅក្នុងមូលនិធិផ្លូវសូត្ររបស់ទីក្រុងប៉េកាំង ដើម្បីគាំទ្រគម្រោង BRI។
លោកស៊ី ជីនពីង បានថ្លែងថា “យើងនឹងដកចេញទាំងស្រុងនូវការរឹតត្បិត លើការចូលទៅវិនិយោគ របស់ក្រុមហ៊ុនបរទេសនៅក្នុងវិស័យផលិតកម្ម”។
លោកបានបន្តថា ប្រទេសចិននឹងបើកចំហបន្ថែមទៀត នូវពាណិជ្ជកម្មឆ្លងព្រំដែន ការវិនិយោគលើសេវាកម្ម ពង្រីកទីផ្សារសម្រាប់ផលិតផលឌីជីថល និងអនុវត្តកំណែទម្រង់សហគ្រាសរដ្ឋ និងកំណែទម្រង់ក្នុងវិស័យនានា ដូចជា សេដ្ឋកិច្ចឌីជីថល សិទ្ធិកម្មសិទ្ធិបញ្ញា និងលទ្ធកម្មរបស់រដ្ឋាភិបាល។
ការប្តេជ្ញាចិត្តគាំទ្រយ៉ាងខ្លាំងក្លាបែបនេះ របស់ទីក្រុងប៉េកាំងបានធ្វើឡើង ស្របពេលដែលសេដ្ឋកិច្ចរបស់ប្រទេសចិន បានធ្លាក់ចុះ ហើយការវិនិយោគបរទេសក៏បានធ្លាក់ចុះផងដែរ។
លោកស៊ី ជីនពីង ក៏បានថ្លែងបញ្ឆិតបញ្ឆៀង អំពីកិច្ចខិតខំប្រឹងប្រែងរបស់សហរដ្ឋអាមេរិក និងសម្ព័ន្ធមិត្តរបស់ខ្លួន ដើម្បីកាត់បន្ថយការពឹងផ្អែករបស់ពួកគេ មកលើខ្សែសង្វាក់ផលិតកម្ម និងការផ្គត់ផ្គង់របស់ចិនផងដែរ ស្របពេលមានការប្រកួតប្រជែងកាន់តែខ្លាំង និងភាពតានតឹងផ្នែកការទូត ព្រមទាំងបានអះអាងឡើងវិញនូវការប្តេជ្ញាចិត្តថា ទីក្រុងប៉េកាំងនឹងបង្កើតបរិយាកាស កាន់តែយុត្តិធម៌សម្រាប់ក្រុមហ៊ុនបរទេស។
លោកស៊ី ជីនពីងបានបញ្ជាក់អះអាងថា “យើងមិនចូលរួមក្នុងការប្រឈមមុខដាក់គ្នាខាងមនោគមវិជ្ជា ល្បែងភូមិសាស្ត្រនយោបាយ ឬការប្រឈមមុខដាក់គ្នាផ្នែកនយោបាយឡើយ”។ លោកបន្ថែមថា “យើងប្រឆាំងនឹងការដាក់ទណ្ឌកម្ម ដោយឯកតោភាគី ការបង្ខិតបង្ខំផ្នែកសេដ្ឋកិច្ច ព្រមទាំងការកាត់ផ្តាច់ និងការបំបែកខ្សែសង្វាក់”៕
