ដោយ: គង់ លាងហួរ
អន្តរជាតិ: ជាង១/៥ នៃបណ្តាអ្នកជួលការិយាល័យ នៅក្នុងទីក្រុងហុងកុង គ្រោងនឹងកាត់បន្ថយ ទំហំការិយាល័យរបស់ពួកគេ ដោយអ្នកខ្លះ ថែមទាំងចង់ផ្លាស់ប្តូរទីតាំង ទៅកាន់តំបន់ចិនដីគោក សិង្ហបុរី និងប្រទេសផ្សេងទៀតលើពិភពលោក។
យោងតាមការស្ទង់មតិមួយ ទៅលើក្រុមហ៊ុនចំនួន៣២១ បង្ហាញថា អ្នកឆ្លើយតបចំនួន២១ភាគរយ ឬស្មើនឹង៦៩ក្រុមហ៊ុន និយាយថា ពួកគេទំនងជាកាត់បន្ថយប្រតិបត្តិការ ដោយលើកឡើងពីការចំណាយ ការថយចុះតម្រូវការអាជីវកម្ម និងការអនុវត្តគោលនយោបាយធ្វើការងារពីផ្ទះបន្ថែមទៀត។
យោងតាមការសិក្សា ដោយក្រុមហ៊ុនប្រឹក្សាអចលនទ្រព្យ Colliers បង្ហាញថា “អ្នកជួលមួយចំនួនបានលើកឡើងថា សមត្ថភាពរបស់ក្រុមហ៊ុន ក្នុងការផ្លាស់ប្តូរទីតាំង ក៏បានរួមចំណែកដល់ការសម្រេចចិត្តរបស់ពួកគេផងដែរ”។
ក្នុងចំណោមអ្នកជួលទាំងអស់ ដែលគ្រោងកាត់បន្ថយទំហំការិយាល័យ ក្នុងនោះ១៤ភាគរយ បានលើកឡើងពីការផ្លាស់ទីតាំងទៅកាន់ប្រទេសចិនដីគោក។ ១៣ភាគរយផ្លាស់ទៅកាន់ ប្រទេសសិង្ហបុរី និង៩ភាគរយ ផ្លាស់ទៅកាន់ប្រទេសផ្សេងទៀត។
ការស្ទង់មតិនេះ ត្រូវបានធ្វើឡើងចាប់ពីចុងខែមិថុនា ដល់ដើមខែសីហា ហើយជាងពាក់កណ្តាល នៃអ្នកឆ្លើយសំណួរគឺជាក្រុមហ៊ុនដែលមានមូលដ្ឋាននៅហុងកុង។ ១៨ភាគរយមកពីអឺរ៉ុប និង១១ភាគរយ មកពីបណ្តាទីក្រុងនៅតំបន់អាស៊ីផ្សេងទៀត។
យោងតាមក្រុមហ៊ុន Colliers បានឱ្យដឹងថា អត្រាការិយាល័យទំនេរសំខាន់ៗរបស់ទីក្រុងហុងកុង បានហក់ឡើងដល់កម្រិតខ្ពស់បំផុត ក្នុងរង្វង់១៥,១ភាគរយ នៅដំណាច់ខែសីហា ពោលគឺខ្ពស់ជាងកម្រិតកំពូល១៣,១ភាគរយ នៅក្នុងខែកញ្ញា ឆ្នាំ២០០៣ទៅទៀត។
តម្លៃជួលការិយាល័យប្រចាំខែ បានដាំក្បាលចុះ៣០,៣ភាគរយ មកនៅត្រឹម៥៤,៧០ដុល្លារហុងកុង (៦,៩៨ដុល្លារអាមេរិក) ក្នុង១ហ្វីតការ៉េ(ប្រហែល០,០៩៣ម៉ែត្រការ៉េ) បើធៀបនឹងកម្រិតខ្ពស់ កាលពីខែមករា ឆ្នាំ២០១៩ ដោយនៅពេលនោះ អត្រាការិយាល័យទំនេរស្ថិតនៅកម្រិតទាបបំផុត មកនៅត្រឹមតែ៣,៥ភាគរយប៉ុណ្ណោះ៕
