ដោយ: គង់ លាងហួរ
អន្តរជាតិ: ផ្សារហ៊ុននៅតំបន់អាស៊ី បានធ្លាក់ថ្លៃចុះនៅថ្ងៃពុធនេះ ដោយសារការបំផ្ទុះនៅមន្ទីរពេទ្យហ្គាហ្សា បានបង្កក្តីបារម្ភខ្ពស់ ខណៈមូលបត្របំណុល បានខាតបង់យ៉ាងធ្ងន់ធ្ងរ ស្របពេលដែលទិន្នន័យលក់រាយដ៏រឹងមាំរបស់សហរដ្ឋអាមេរិក បានជំរុញឱ្យមានការរំពឹងទុកនៃការដំឡើងអត្រាការប្រាក់។
អាជ្ញាធរអ៊ីស្រាអែល និងប៉ាឡេស្ទីនបានធ្វើការស្តីបន្ទោសគ្នាទៅវិញទៅមកចំពោះការបំផ្ទុះនេះ ដែលបានសម្លាប់មនុស្សរាប់រយនាក់នៅឯមន្ទីរពេទ្យ និងបានធ្វើឱ្យស្មុគស្មាញ ដល់គម្រោងបំពេញដំណើរទស្សនកិច្ចរបស់ប្រធានាធិបតីអាមេរិកលោកចូ បៃដិន មកកាន់តំបន់នេះ។
ដំណឹងនេះបានរួមចំណែក ដល់ការហក់ឡើងថ្លៃប្រេង ខណៈពេលដែលអ្នកវិនិយោគព្រួយបារម្ភថា ប្រទេសអ៊ីរ៉ង់ ឬប្រទេសផ្សេងទៀតអាចទាញចូលទៅក្នុងជម្លោះនេះ។
សន្ទស្សន៍ភាគហ៊ុនអាស៊ីប៉ាស៊ីហ្វិក ដ៏ធំបំផុតរបស់ក្រុមហ៊ុនអាមេរិក MSCI នៅខាងក្រៅប្រទេសជប៉ុនបានធ្លាក់ថ្លៃចុះ ខណៈពេលដែលផ្សារហ៊ុន Nikkei របស់ជប៉ុនបានធ្លាក់ថ្លៃ០,១ភាគរយ។
ចំណែកឯ ផ្សារហ៊ុន S&P 500 futures និងផ្សារហ៊ុន Nasdaq futures បានធ្លាក់ថ្លៃចុះ០,២ភាគរយ នៅក្នុងការជួញដូរដំបូង។
ផ្សារហ៊ុនទាំង២នេះ ត្រូវបានអូសទាញមួយផ្នែក ដោយសារការធ្លាក់ថ្លៃនៃភាគហ៊ុននៅក្នុងក្រុមហ៊ុន Nvidia បន្ទាប់ពីមានព័ត៌មានថា រដ្ឋបាលលោកចូ បៃដិន គ្រោងនឹងផ្អាកការនាំចេញ បន្ទះឈីបឆ្លាតវៃសិប្បនិម្មិតកម្រិតខ្ពស់បន្ថែមទៀតទៅកាន់ប្រទេសចិន។
តម្លៃប្រេងបានហក់ឡើងខ្ពស់ ម្តងទៀតនៅថ្ងៃពុធនេះ ដែលជំរុញដោយទិន្នន័យបង្ហាញ ពីការធ្លាក់ចុះនៃស្តុកប្រេងឆៅ និងស្របពេលដែលមានក្តីបារម្ភ ជុំវិញជម្លោះនៅតំបន់មជ្ឈិមបូព៌ា។
តម្លៃប្រេងឆៅ Brent បានកើនឡើង១,៣៥ដុល្លារ ដល់៩១,២៥ដុល្លារក្នុងមួយបារ៉ែល ខណៈដែលតម្លៃប្រេងឆៅអាមេរិក បានកើនឡើង១,៦២ដុល្លារ ដល់៨៨,២៨ដុល្លារក្នុងមួយបារ៉ែល៕
