ដោយ: គង់ លាងហួរ
តូក្យូ: រដ្ឋាភិបាលជប៉ុន គ្រោងពង្រីកប្រព័ន្ធទិដ្ឋាការអេឡិចត្រូនិករបស់ខ្លួន ដើម្បីសម្រួលនីតិវិធី ក្នុងការដាក់ពាក្យស្នើសុំរបស់ភ្ញៀវទេសចរបរទេស ស្របពេលវិស័យទេសចរណ៍ កំពុងស្ទុះងើបឡើងវិញ។នេះបើយោងតាមក្រុមមន្ត្រីរដ្ឋាភិបាល។
ក្រសួងការបរទេស បានចាប់ផ្តើមសេវាកម្មទិដ្ឋាការ អនឡាញកាលពីខែមីនា នៅក្នុងប្រទេស និងតំបន់ចំនួន១២ ដោយប្រទេសចិនបានបញ្ចូល ទៅក្នុងប្រព័ន្ធនេះនៅក្នុងខែមិថុនា។ ប្រព័ន្ធទិដ្ឋាការអេឡិចត្រូនិកអាចអនុញ្ញាតឱ្យបេក្ខជន ដែលមានសិទ្ធិអាចទទួលបានទិដ្ឋាការស្នាក់នៅរយៈពេលខ្លី ដោយមិនចាំបាច់ទៅស្ថានទូត ឬស្ថានកុងស៊ុលជប៉ុនក្នុងស្រុករបស់ពួកគេឡើយ។
បណ្តាប្រទេស និងតំបន់ចំនួន១២ រួមមាន ប្រេស៊ីល អង់គ្លេស កាណាដា កម្ពុជា ចិន ម៉ុងហ្គោលី អារ៉ាប៊ីសាអូឌីត សិង្ហបុរី អាហ្វ្រិកខាងត្បូង តៃវ៉ាន់ អារ៉ាប់រួម និងសហរដ្ឋអាមេរិក។
មន្ត្រីម្នាក់មកពីនាយកដ្ឋានកិច្ចការបរទេស នៃក្រសួងការបរទេ សជប៉ុនលើកឡើងថា “អត្រាអ្នកដាក់ពាក្យសុំទិដ្ឋាការតាមអ៊ីនធឺណិតកំពុងកើនឡើង ដោយសារប្រព័ន្ធនេះអនុញ្ញាត ឱ្យមានការចេញឯកសារដោយរលូន ហើយវាអាចរួមចំណែក ដល់ការស្ទុះងើបឡើងវិញនៃវិស័យទេសចរណ៍ក្នុងស្រុក”។
បច្ចុប្បន្ន ក្រសួងការបរទេសកំពុងវាយតម្លៃថា តើត្រូវធ្វើឱ្យគម្រោងនេះ មាននៅក្នុងបណ្តាប្រទេសជាច្រើនផ្សេងទៀតដែរឬទេ។ កុំព្យូទ័រភាវូបនីយកម្ម សម្រាប់ប្រព័ន្ធទិដ្ឋាការបានបង្កើនល្បឿននៃដំណើរការ និងកាត់បន្ថយបន្ទុកការងាររបស់បុគ្គលិក។ នេះបើយោងតាមមន្ត្រីរដ្ឋាភិបាលម្នាក់ផ្សេងទៀត។
មន្ត្រីរដ្ឋាភិបាលរូបនោះបន្តថា “ចំនួនភ្ញៀវទេសចរក្នុងប្រទេសកំពុងមាននិន្នាការកើនឡើង ដែលមានន័យថា ពេលខ្លះយើងអាចមិនអាចឆ្លើយតបជាមួយកម្លាំង ពលកម្មបច្ចុប្បន្នបានទេ។ ខ្ញុំសង្ឃឹមថា យើងអាចឈានទៅមុខបន្ថែមទៀត ជាមួយនឹងការនាំមកនូវប្រព័ន្ធតាមអ៊ីនធឺណិត”។
នៅក្រោមគ្រោងការណ៍នេះ អ្នកដាក់ពាក្យមកពីបណ្តាប្រទេស និងតំបន់ ដែលទទួលបានសិទ្ធិអនុញ្ញាតទាំងអស់ លើកលែងតែប្រទេសចិនអាចបង់ថ្លៃទិដ្ឋាការដោយប្រើកាតឥណទាន៕
