ដោយ: គង់ លាងហួរ
ភ្នំពេញ: រដ្ឋាភិបាលកម្ពុជា បានដាក់ចេញនូវគោលនយោបាយអភិវឌ្ឍបច្ចេកវិទ្យាហិរញ្ញវត្ថុ (Fintech) ឆ្នាំ២០២៣-២០២៨ កាលពីថ្ងៃពុធ ក្នុងគោលបំណងលើកកម្ពស់ ការរួមបញ្ចូលផ្នែកហិរញ្ញវត្ថុ ក៏ដូចជាការរក្សាស្ថិរភាពហិរញ្ញវត្ថុ និងលើកកម្ពស់ការច្នៃប្រឌិត។
លោកឧបនាយករដ្ឋមន្ត្រី អូន ព័ន្ធមុនីរ័ត្ន រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ បានអញ្ជើញជាអធិបតី ក្នុងសិក្ខាសាលាផ្សព្វផ្សាយស្តីពីគោលនយោបាយអភិវឌ្ឍន៍ បច្ចេកវិទ្យាហិរញ្ញវត្ថុឆ្នាំ២០២៣-២០២៨ ដោយមានការចូលរួមពីមន្ត្រីជាន់ខ្ពស់ មកពីក្រសួងពាក់ព័ន្ធ និងស្ថាប័នសាធារណៈ និងតំណាងគ្រឹះស្ថានធនាគារ និងហិរញ្ញវត្ថុ។
ថ្លែងក្នុងពិធីនោះ លោក អូន ព័ន្ធមុនីរ័ត្ន បានមានប្រសាសន៍ថា ប្រទេសកម្ពុជា បានឆ្លងកាត់បទពិសោធន៍ នៃការអភិវឌ្ឍន៍យ៉ាងឆាប់រហ័សក្នុងវិស័យ Fintech ដែលជាកាតាលីករក្នុងការគាំទ្រ និងជំរុញការអភិវឌ្ឍន៍សេដ្ឋកិច្ចសង្គម។
លោកបានបន្តថា ការប្រើប្រាស់បច្ចេកវិទ្យាឌីជីថល បានធ្វើឱ្យអាជីវកម្មក្នុងស្រុក និងអ្នកវិនិយោគអាចតភ្ជាប់ ទៅកាន់សង្វាក់ផលិតកម្មក្នុងតំបន់ និងពិភពលោក ក៏ដូចជាការច្នៃប្រឌិត ក្នុងការផលិតទំនិញ និងសេវាកម្ម។
លោកបញ្ជាក់ថា “គោលនយោបាយនេះ គឺជាផែនទីបង្ហាញផ្លូវដ៏សំខាន់មួយ ដើម្បីជំរុញការប្រើប្រាស់បច្ចេកវិទ្យា ក្នុងឧស្សាហកម្មហិរញ្ញវត្ថុ”។
លោកបានបន្ថែមថា “ខ្ញុំជឿជាក់យ៉ាងមុតមាំថា ការអនុវត្តប្រកបដោយប្រសិទ្ធភាព នៃគោលនយោបាយនេះ នឹងអនុញ្ញាតឱ្យកម្ពុជាប្រើប្រាស់ Fintech ជាអតិបរមា ដើម្បីជំរុញការអភិវឌ្ឍសេដ្ឋកិច្ច និងសង្គមឌីជីថលរបស់ខ្លួន”។
ការកើនឡើងនៃបច្ចេកវិទ្យាហិរញ្ញវត្ថុ Fintech បានផ្តល់នូវការជំរុញដ៏ធំមួយ ដល់ការអភិវឌ្ឍនៃការទូទាត់តាមទូរស័ព្ទនៅកម្ពុជា។
យោងតាមធនាគារជាតិនៃកម្ពុជា (NBC) បានឱ្យដឹងថា នៅកម្ពុជា មានគណនីe-wallet សរុបចំនួន១៩,៥លានគណនី ក្នុងឆ្នាំ២០២២ កើនឡើងពី១៣,៦លានគណនីកាលពីឆ្នាំ២០២១។
លើសពីនេះ ប្រទេសកម្ពុជាបានកត់ត្រាប្រតិបត្តិការ ទូទាត់តាមអ៊ីនធឺណិត ចំនួន១ពាន់លានប្រតិបត្តិការ ជាមួយនឹងទំហំទឹកប្រាក់សរុបចំនួន២៧២,៨ពាន់លានដុល្លារអាមេរិកកាលពីឆ្នាំមុន៕Xinhua៕
