ដោយ: គង់ លាងហួរ
ភ្នំពេញ: ធនាគារវិនិយោគហេដ្ឋារចនាសម្ព័ន្ធអាស៊ី (AIIB) បានចុះហត្ថលេខា លើកិច្ចព្រមព្រៀងផ្តល់ហិរញ្ញប្បទាន ចំនួន៤៣លានដុល្លារអាមេរិក ដើម្បីលើកកម្ពស់សុខភាពបសុសត្វឆ្លងដែន និងគម្រោងកែលម្អហេដ្ឋារចនាសម្ព័ន្ធ ខ្សែសង្វាក់តម្លៃនៅកម្ពុជា។
នេះបើយោងតាមសារពត៌មាន Xinhua ចុះផ្សាយកាលពីថ្ងៃព្រហស្បត៍ ទី២៨ ខែកញ្ញា ឆ្នាំ២០២៣។
លោក ប៉ែន ធីរ៉ុង អនុរដ្ឋលេខាធិការក្រសួងសេដ្ឋកិច្ច និងហិរញ្ញវត្ថុកម្ពុជា បានចុះហត្ថលេខាលើកិច្ចព្រមព្រៀង ទទួលជំនួយហិរញ្ញប្បទានកិច្ចសហប្រតិបត្តិការ ជាមួយតំណាង AIIB កាលពីថ្ងៃអង្គារនៅខាងក្រៅកិច្ចប្រជុំប្រចាំឆ្នាំលើកទី៨ នៃក្រុមប្រឹក្សាភិបាលរបស់ធនាគារ AIIB នៅទីក្រុង Sharm El-Sheikh ប្រទេសអេហ្ស៊ីប។
កញ្ចប់ហិរញ្ញប្បទាន រួមមានទឹកប្រាក់៣៣លានដុល្លារជាហិរញ្ញប្បទានសម្បទាន ពីធនាគារAIIB និង១០លានដុល្លារជាជំនួយឥតសំណងពីមូលនិធិបង្ការ ការត្រៀមខ្លួន និងការឆ្លើយតបជំងឺរាតត្បាត(Pandemic Prevention, Preparedness and Response Facility Trust Fund)។
គម្រោងនេះ មានគោលបំណងលើកកម្ពស់ការផលិត និងការចិញ្ចឹមសត្វប្រកបដោយគុណភាព និងអនាម័យ ពង្រឹងសុវត្ថិភាព សុខភាពសត្វ និងមនុស្ស ព្រមទាំងបង្ការ និងគ្រប់គ្រងជំងឺឆ្លង។
ក្រសួងសេដ្ឋកិច្ច និងហិរញ្ញវត្ថុកម្ពុជាបញ្ជាក់ថា វាក៏នឹងជំរុញពាណិជ្ជកម្មសត្វឆ្លងព្រំដែន ក្នុងចំណោមបណ្តាប្រទេស នៃមហាអនុតំបន់ទន្លេមេគង្គផងដែរ ដោយបន្ថែមថា គម្រោងនេះនឹងត្រូវបានអនុវត្តនៅក្នុងរាជធានីភ្នំពេញ ខេត្តកំពង់ចាម ឧត្តរមានជ័យ ព្រៃវែង សៀមរាប និងតាកែវ។
លោក ប៉ែន ធីរ៉ុង បានអះអាងថា “គម្រោងកែលម្អហេដ្ឋារចនាសម្ព័ន្ធខ្សែសង្វាក់តម្លៃ និងសុខភាពសត្វឆ្លងព្រំដែន គឺជាគម្រោងហិរញ្ញប្បទានទី៣ ដែលផ្តល់ដោយធនាគារAIIB ដល់ប្រទេសកម្ពុជាគិតចាប់តាំងពីឆ្នាំ២០២០មក”៕
