ដោយ: គង់ លាងហួរ
ស៊ីដនី: ផ្សារហ៊ុននៅតំបន់អាស៊ី បានធ្លាក់ថ្លៃចុះនៅថ្ងៃចន្ទនេះ បន្ទាប់ពីធនាគារកណ្តាលនានា កាលពីសប្តាហ៍មុន បានជំរុញការរំពឹងទុកដែលថា អត្រាការប្រាក់នឹងបន្តកើនឡើងខ្ពស់ ក្នុងរយៈពេលយូរតទៅមុខ។
សន្ទស្សន៍ភាគហ៊ុនអាស៊ីប៉ាស៊ីហ្វិក ដ៏ធំបំផុតរបស់ក្រុមហ៊ុន MSCI នៅខាងក្រៅប្រទេសជប៉ុន បានធ្លាក់ថ្លៃ០,១% នៅថ្ងៃចន្ទនេះ បន្ទាប់ពីបានធ្លាក់ថ្លៃ២,៣ភាគរយ ដល់កម្រិតទាបបំផុត ក្នុងរយៈពេល១០ខែកាលពីសប្តាហ៍មុន។
ចំណែកផ្សារហ៊ុន Nikkei របស់ប្រទេសជប៉ុន បានងើបឡើងថ្លៃ០,២ភាគរយ។ ចំណែក ផ្សារហ៊ុន S&P 500futures និង Nasdaq futures បានងើបឡើង០,១ភាគរយ។
ផ្សារហ៊ុនរបស់ប្រទេសចិន បានងើបឡើងថ្លៃ១,៨ភាគរយ កាលពីថ្ងៃសុក្រសប្តាហ៍មុន ស្របពេលមានក្តីសង្ឃឹម ក្នុងការធ្វើឱ្យប្រសើរឡើងនូវកំណើនសេដ្ឋកិច្ចរបស់ប្រទេសនេះ។
ទន្ទឹមគ្នានោះ លោក Bruce Kasman ប្រធានសេដ្ឋវិទូប្រចាំនៅធនាគារ JPMorgan បានរំពឹងថា នឹងមានដំណឹងល្អពីលទ្ធផលអតិផរណារបស់សហរដ្ឋអាមេរិក និងអឺរ៉ុប ដែលគ្រោងចេញផ្សាយនៅសប្តាហ៍នេះ។
នៅក្នុងទីផ្សាររូបិយប័ណ្ណវិញ គេសង្កេតឃើញថា សន្ទស្សន៍ប្រាក់ដុល្លារអាមេរិក បានហក់ឡើងជិតដល់កម្រិតខ្ពស់បំផុត ក្នុងរយៈពេល៦ខែ ពោលគឺ១០៥,៥៨ពិន្ទុ បើធៀបនឹងកញ្ចប់រូបិយប័ណ្ណសំខាន់ៗ។
ចំណែក តម្លៃប្រេងក៏បានកើនឡើងផងដែរ នៅថ្ងៃចន្ទនេះ។ ជាក់ស្តែង តម្លៃប្រេងឆៅ Brent futures បានកើនឡើង០,៥ភាគរយដល់៩៣,៧៣ដុល្លារក្នុងមួយបារ៉ែល ហើយតម្លៃប្រេងឆៅអាមេរិក West Texas Intermediate futures បានកើនឡើង០,៥ភាគរយដល់៩០,៤៧ដុល្លារក្នុងមួយបារ៉ែល៕
