ដោយៈ គង់ ហ្វីអូណា
ភ្នំពេញៈ ធនាគារជាតិនៃកម្ពុជា ត្រៀមបញ្ចេញលុយ៣០លានដុល្លារទៀត ដើម្បីរក្សាតម្លៃប្រាក់រៀល តាមរយៈការដាក់ដេញថ្លៃជាមួយគ្រឹះស្ថានធនាគារ មីក្រូហិរញ្ញវត្ថុ និងអាជីករប្តូរប្រាក់នៅកម្ពុជាទាំងអស់។
លុយ៣០លានដុល្លារនេះ នឹងត្រូវដាក់ដេញថ្លៃជាដំណាក់កាល។ ពោលគឺថ្ងៃទី២៧កញ្ញា ធនាគារជាតិ នឹងបញ្ចេញ១៥លានដុល្លារ រីឯ១៥លានទៀត ត្រូវបញ្ចេញ នៅថ្ងៃទី២៩កញ្ញា។ នេះបើយោងតាមសេចក្តីជូនដំណឹងរបស់ធនាគារជាតិ។
ការត្រៀមបញ្ចេញលុយ៣០លានដុល្លារទៀតនេះ គឺធ្វើឡើងបន្ទាប់ពីធនាគារជាតិ បានបញ្ចេញលុយអស់៨០លានដុល្លារហើយ ក្នុងការអន្តាគមន៍ លើទីផ្សារអត្រាប្តូរប្រាក់ ដើម្បីរក្សាតម្លៃប្រាក់រៀល ចាប់ថ្ងៃពីទី៦កញ្ញា ឆ្នាំ២០២៣ មក។ ធនាគារជាតិប្រើយន្តការស្រូបយកប្រាក់រៀលពីទីផ្សារវិញបែបនេះ ក្នុងគោលដៅជួយពង្រឹងអំណាចទិញប្រាក់រៀល និងរួមចំណែកគាំទ្រការងើបឡើងវិញ នៃសេដ្ឋកិច្ចជាតិ ក្រោយវិបត្តិកូវីដ-១៩ ខណៈកម្ពុជារងសម្ពាធនៃការកើនឡើងថ្លៃនៃប្រាក់ដុល្លារអាមេរិកក្នុងទីផ្សារអន្តរជាតិ៕
