ដោយៈ គង់ ហ្វីអូណា
ភ្នំពេញៈ ក្រុមនិយោជកស្នើឲ្យរដ្ឋាភិបាល ជួយបញ្ចុះតម្លៃភស្តុភារកម្ម៣៥ភាគរយ ដើម្បីសម្រួលដល់ការធ្វើអាជីវកម្ម ក៏ដូចជាសម្រួលការចរចាប្រាក់ឈ្នួលកម្មករ និយោជិតកាន់តែរលូន និងងាយស្រួលបន្ថែមទៀត។
ថ្លែងក្រោយកិច្ចប្រជុំក្រុមប្រឹក្សាជាតិ ប្រាក់ឈ្នួលអប្បបរមាលើកទី៥ នៅថ្ងៃទី១៨ កញ្ញានេះ ឧកញ៉ា ណាង សុធី អនុប្រធានក្រុមប្រឹក្សាជាតិប្រាក់ឈ្នួលអប្បបរមាអាណត្តិទី៣ តំណាងភាគីនិយោជក បានមានប្រសាសន៍ថា នៅក្នុងកិច្ចប្រជុំភាគីនិយោជក បានដាក់សំណើតែមួយគត់ ដល់រាជរដ្ឋាភិបាលជួយដោះស្រាយ គឺ ភស្តុភារកម្ម ក្នុងនោះស្នើឲ្យរដ្ឋាភិបាល ជួយសម្រួលបញ្ចុះតម្លៃ៣៥ភាគរយ នៃកញ្ចប់បង់ប្រចាំថ្ងៃ។
ឧកញ៉ាណាង សុធី បានបន្តថា ការស្នើឲ្យរដ្ឋាភិបាលបញ្ចុះភស្តុភារកម្ម៣៥ភាគរយនេះ ព្រោះថាបច្ចុប្បន្ននេះភស្តុភារកម្ម ជាចំណុចដែលអ្នកវិនិយោគកំពុងប្រឈម និងជួបការលំបាក ដោយសារមានការចំណាយច្រើន លើសតាមបណ្ដាប្រទេសនានា នៅទ្វីបអាស៊ីអាគ្នេយ៍។
លោកឧកញ៉ា ណាង សុធី បានបន្តថា ការបញ្ចុះភស្តុភារកម្មនេះវាជាអំណោយផលល្អ នៃកិច្ចពិភាក្សាប្រាក់ឈ្នួលឆ្នាំ២០២៥ ខាងមុខ ដែលនៅសល់ពេលវេលា៩ខែទៀតប៉ុណ្ណោះ ហើយប្រសិនបើរដ្ឋាភិបាលជួយសម្រួលបញ្ហានេះ បានការពិភាក្សាប្រាក់ឈ្នួល នឹងមានលទ្ធភាពច្រើនជាង និងងាយស្រួលជាង។
លោកឧកញ៉ា ណាង សុធី សំណូមពររបស់ភាគីនិយោជកនេះ រដ្ឋាភិបាល នឹងពិចារណា ហើយសង្ឃឹមថានៅថ្ងៃទី១៣ ខែវិច្ឆិកា ក្នុងកម្មវិធីជំនួបរាជរដ្ឋាភិបាល ជាមួយវិស័យឯកជនខាងមុខ នឹងទទួលបានលទ្ធផលពិតប្រាកដជាមិនខានឡើយ។
លោកគឹម ចាន់សំណាង អនុប្រធានក្រុមប្រឹក្សាជាតិប្រាក់ឈ្នួលអប្បបរមាអាណត្តិទី៣ បានមានប្រសាសន៍ថា ភាគីសហជីព នឹងដាក់សំណើទៅរដ្ឋាភិបាល ជួយដោះស្រាយពីទុក្ខកង្វល់របស់កម្មករ ដែលគ្រោងនឹងប្រជុំពិភាក្សាគ្នា សម្រេចចុងក្រោយ នៅមុនថ្ងៃទី ២៨ កញ្ញា ដែលជាប្រជុំប្រាក់ឈ្នួលលើកចុងក្រោយ។
លោកបានបន្តថា សំណើរបស់សហជីពផ្តោត ទៅលើការជួយបញ្ចុះថ្លៃទឹកភ្លើង តបណ្ដាញទឹករដ្ឋតាមផ្ទះ ជួលកម្មករសាងសង់ថ្មី បន្ថែមអត្ថប្រយោជន៍ លើរបបសន្តិសុខសង្គម (ប.ស.ស) ពិសេសលើការថែទាំសុខភាពកម្មករ ដោយឲ្យមន្ទីរពេទ្យដែលជាដៃគូរបស់ ប.ស.ស ផ្តល់សេវាបានល្អប្រសើរជាងមុនជាដើម៕
