ដោយៈ និស្ស័យ
ភ្នំពេញៈ យោងតាមរបាយការណ៍បានបង្ហាញថា ទំហំពាណិជ្ជកម្មកម្ពុជា ចិនសម្រេចបានទឹកប្រាក់ជាង៧០០០លានដុល្លារអាមេរិក កើនឡើង១,៨ភាគរយ បើធៀបរយៈពេលដូចគ្នាកាលពីឆ្នាំមុន។
យោងតាមទិន្នន័យរបស់អគ្គនាយកដ្ឋានគយ និងរដ្ឋាករកម្ពុជា (GDCE) ឱ្យដឹងថា ចាប់ពីខែមករា ដល់ខែកក្កដា ឆ្នាំ២០២៣ ទំហំពាណិជ្ជកម្មរវាងកម្ពុជា-ចិន មានទឹកប្រាក់សរុប៧០៩៣,៥៩ លានដុល្លារ កើនឡើង១,៨ភាគរយ បើធៀបរយៈពេលដូចគ្នាឆ្នាំ ២០២២ ។
ផ្អែកលើតារាងស្ថិតិខាងលើ បានបង្ហាញថា ជញ្ជីងពាណិជ្ជកម្មរបស់កម្ពុជាមានឱនភាព៥ ៤៦៤,១១ លានដុល្លារ ខណៈរយៈពេលដូចគ្នាឆ្នាំ២០២២ មានចំនួន៥៥៦៩,០៩លានដុល្លារ។
ប្រទេសចិន គឺជាដៃគូពាណិជ្ជកម្មអន្តរជាតិធំជាងគេរបស់កម្ពុជា ដោយមានចំណែក២៥,៦១ភាគរយ នៃទំហំពាណិជ្ជកម្មអន្តរជាតិរបស់កម្ពុជារយៈពេល៧ខែ ឆ្នាំ២០២៣ ដែលមានចំនួន២៧ ៧០០,៣៦ លានដុល្លារ។
ពាណិជ្ជកម្មទ្វេភាគីកម្ពុជា-ចិន ត្រូវរំពឹងថានឹងកើនឡើងបន្ថែមទៀត ខណៈទីប្រឹក្សាសេដ្ឋកិច្ច និងពាណិជ្ជកម្មអមស្ថានទូតចិនប្រចាំកម្ពុជាសន្យា នឹងខិតខំណែនាំឱ្យវិនិយោគិនរបស់ខ្លួន ឲ្យមកបណ្តាក់ទុននៅកម្ពុជាថែមទៀត។ ការសន្យានេះ ត្រូវបានលោកស្រី ចុង ជី លើកឡើងក្នុងជំនួបជាមួយនឹងលោក ជា វុទ្ធី អគ្គលេខាធិការគណៈកម្មាធិការវិនិយោគកម្ពុជា នៅទីស្តីការក្រុមប្រឹក្សាអភិវឌ្ឍន៍កម្ពុជា (CDC) កាលពីថ្ងៃទី ៦ ខែកញ្ញា។
លោកជា វិទ្ធីបានសម្តែងសុទិដ្និនិយមថា កិច្ចសហប្រតិបត្តិការវិនិយោគកម្ពុជា-ចិន នឹងសម្រេចបានផ្លែផ្កាល្អថែមទៀត ខណៈកន្លងមកក្រុមប្រឹក្សាអភិវឌ្ឍន៍កម្ពុជា និងក្រសួងពាណិជ្ជកម្មចិន ក៏មានអនុស្សរណៈនៃការយោគយល់គ្នាលើការបង្កើតយន្តការពង្រឹងកិច្ចសហប្រតិបត្តិការវិនិយោគ និងសេដ្ឋកិច្ច៕
