ដោយ: គង់ លាងហួរ
ហុងកុង: ភោជនីយដ្ឋានជប៉ុនមួយចំនួន ក្នុងទីក្រុងហុងកុងរំពឹងថា អាជីវកម្មពួកគេនឹងដាំក្បាលចុះ៣០% បន្ទាប់ពីទីក្រុងនេះហាមឃាត់ការនាំចូលអាហារសមុទ្រ ពីខេត្តចំនួន១០របស់ប្រទេសជប៉ុន ដោយបានចាប់ផ្តើមកាលពីថ្ងៃព្រហស្បតិ៍ ទី២៤ ខែសីហា។
ការហាមឃាត់នេះបានធ្វើឡើង ស្របពេលដែលប្រទេសជប៉ុនបានចាប់ផ្តើមបញ្ចេញទឹក កាកសំណល់វិទ្យុសកម្មចេញពីរោងចក្រនុយក្លេអ៊ែរ Fukushima ចូលទៅក្នុងសមុទ្រ។
ហុងកុងគឺជាទីផ្សារធំបំផុតទីពីរ របស់ប្រទេសជប៉ុនសម្រាប់ការនាំចេញអាហារសមុទ្រ បន្ទាប់ពីប្រទេសចិនដីគោក ដោយការហាមឃាត់លើការនាំចូលនេះ បានធ្វើឱ្យភោជនីយដ្ឋានជប៉ុន មួយចំនួនជួបផលលំបាក។
លោក Simon Wong ប្រធានសហព័ន្ធភោជនីយដ្ឋាន និងពាណិជ្ជកម្មពាក់ព័ន្ធរបស់ទីក្រុងហុងកុង បានលើកឡើងថា “យើងរំពឹងថា អាជីវកម្ម នឹងដាំក្បាលចុះបន្ថែមទៀតពី២០ ទៅ៣០ភាគរយ ឬច្រើនជាងនេះទៀត សម្រាប់ភោជនីយដ្ឋានជប៉ុនលំដាប់ខ្ពស់មួយចំនួន” ។
លោកបន្តថា “ចំពោះភោជនីយដ្ឋានលំដាប់ខ្ពស់ ផលិតផលរបស់ពួកគេភាគច្រើន ត្រូវបានដឹកជញ្ជូនដោយផ្ទាល់ ពីប្រទេសជប៉ុនទៅកាន់ហុងកុង ហើយប្រសិនបើពួកគេមិនមានបរិមាណ ផលិតផលនេសាទគ្រប់គ្រាន់ សម្រាប់ភោជនីយដ្ឋាន នោះអាជីវកម្មនឹងរងផលប៉ះពាល់”។
ទោះជាយ៉ាងនេះក្តី លោក Wong ជឿជាក់ថា កង្វះការផ្គត់ផ្គង់នឹងមិននាំឱ្យមានការកើនឡើងនៃតម្លៃនោះទេ ដោយសារអាទិភាពរបស់ពាណិជ្ជករ គឺរក្សាឱ្យបាននូវអតិថិជនរបស់ពួកគេ។
ការហាមឃាត់ការនាំចូលនេះ អនុវត្តន៍ចំពោះខេត្តចំនួន១០របស់ប្រទេសជប៉ុន រួមទាំងទីក្រុងតូក្យូ ហ្វូគូស៊ីម៉ា និងណាហ្គាណូផងដែរ។ វាគ្របដណ្តប់លើអាហារសមុទ្រស្រស់ កក ត្រជាក់ ស្ងួត និងកែច្នៃ ក៏ដូចជាអំបិលសមុទ្រ និងសារ៉ាយសមុទ្រផងដែរ។
ចំណែក ទីក្រុងម៉ាកាវក៏បានអនុវត្តបម្រាមនេះ កាលពីថ្ងៃព្រហស្បតិ៍សប្តាហ៍មុនផងដែរ ដោយគ្របដណ្តប់លើទំនិញ មកពីតំបន់ដូចគ្នារបស់ប្រទេសជប៉ុន៕
