ដោយៈ តែម សុខុម
សិង្ហបុរី: ប្រាក់ដុល្លារ កាលពីថ្ងៃច័ន្ទ ទី២៨ ខែសីហា បានធ្លាក់ថ្លៃ ក្រោយឡើងថ្លៃខ្ពស់បំផុតមិនធ្លាប់មាន ក្នុងពេល១២សប្ដាហ៍ បន្ទាប់ពីប្រធានធនាគារកណ្ដាលអាមេរិក លោកJerome Powell បានបង្ហើបពីលទ្ធភាព ដែលអាចដំឡើងអត្រាការប្រាក់បន្ថែមទៀត ខណៈប្រាក់យ៉េន របស់ជប៉ុន បានធ្លាក់ចុះដល់កម្រិតទាបបំផុត មិនធ្លាប់មានក្នុងរយៈពេលជាង៩ខែ។
អំឡុងសុន្ទរកថា ដែលគេទន្ទឹងរង់ចាំយ៉ាងអន្ទះសារ នៅឯសន្និសីទគោលនយោបាយសេដ្ឋកិច្ចប្រចាំឆ្នាំ លោក Jerome Powell បានធ្វើការត់សម្គាល់ពីវឌ្ឍនភាព លើការបន្ធូរសម្ពាធតម្លៃព្រមទាំងហានិភ័យនានា ពីភាពរឹងមាំដ៏គួរឱ្យភ្ញាក់ផ្អើល នៃសេដ្ឋកិច្ចសហរដ្ឋអាមេរិក។
លោក Jerome Powell បានលើកឡើងកាលពីថ្ងៃសុក្រ សប្ដាហ៍កន្លងទៅថា “យើងនឹងដំណើរការដោយប្រុងប្រយ័ត្ន នៅពេលយើងសម្រេចថា តើត្រូវរឹតបន្តឹងបន្ថែមទៀត ឬក៏រក្សាអត្រាគោលនយោបាយឱ្យថេរ និងសរង់ចាំទិន្នន័យបន្ថែមទៀត”។
លោកបានបន្ថែមថា “វាជាកិច្ចការរបស់ធនាគារកណ្ដាលអាមេរិក ដែលត្រូវធ្វើឱ្យអតិផរណាធ្លាក់ចុះ ដល់កម្រិតគោលដៅ២%របស់យើង ហើយយើងនឹងធ្វើដូច្នេះ”។
សន្ទស្សន៍ប្រាក់ដុល្លារ ដែលវាស់ស្ទង់រូបិយប័ណ្ណដុល្លារអាមេរិក ធៀបនឹងរូបិយប័ណ្ណគូប្រជែងចំនួន៦ បានធ្លាក់ចុះ០,១០៦%មកនៅត្រឹម១០៤,០៥ពិន្ទុ បើធៀបនឹង១០៤,៤៤ពិន្ទុកាលពីថ្ងៃសុក្រ សប្ដាហ៍កន្លងទៅ៕ Reuters៕
