ដោយ: គង់ លាងហួរ
ប៉េកាំង: យោងតាមប្រព័ន្ធផ្សព្វផ្សាយរដ្ឋចិន CCTV បានឱ្យដឹងថា ការប្រើប្រាស់មាសរបស់ប្រទេសចិន បានហក់ឡើងជាង១៦ភាគរយពីមួយឆ្នាំ ទៅមួយឆ្នាំដល់៥៥៤,៨៨តោន នៅក្នុងឆមាសទីមួយនៃឆ្នាំនេះ។
ប្រព័ន្ឋផ្សព្វផ្សាយរដ្ឋចិន(CCTV) បានដកស្រង់របាយការណ៍ថា ការប្រើប្រាស់គ្រឿងអលង្ការមាស នៅប្រទេសចិនបានហក់ឡើងជិត១៥ភាគរយ រហូតដល់៣៦៨,២៦តោន នៅក្នុងឆមាសទី១ ដើមឆ្នាំ២០២៣នេះ។
យោងតាមការចុះផ្សាយ ដោយសារពត៌មានដ៏ធំរបស់អង់គ្លេស Reuters បានបង្ហាញឱ្យដឹងថា តួលេខនៃការប្រើប្រាស់មាស គឺមិនរាប់បញ្ចូលការទិញបម្រុង ដោយធនាគារកណ្តាលចិននោះទេ។
ទន្ទឹមគ្នានេះដែរ សមាគមមាសចិនបានរាយការណ៍ថា ផលិតកម្មរបស់បណ្តាសហគ្រាសមាស ក៏បានវិលត្រឡប់មករកភាពប្រក្រតីឡើងវិញ នៅក្នុងឆមាសទីមួយនៃឆ្នាំនេះផងដែរ។
សមាគមនេះបានអះអាងទៀតថា បណ្តាសហគ្រាសមាសធំៗកំពុងជំរុញយ៉ាងសកម្ម នូវការរួមបញ្ចូលគ្នា និងការទិញយក ដែលនឹងប្រមូលផ្តុំបន្ថែមទៀត នូវធនធានមាសដែលមានគុណភាពខ្ពស់។
មាសត្រូវបានគេប្រើប្រាស់ក្នុងគោលដៅធំៗចំនួន៣ ដូចជា ការយកមកធ្វើជាគ្រឿងអលង្ការ ដែលប្រទេសចិនបានក្លាយជាអ្នកប្រើប្រាស់មាសដ៏ធំនៅលើពិភពលោក និងយកមកធ្វើជារបស់ការពាររូបិយប័ណ្ណ នៅពេលដែលប្រព័ន្ធហិរញ្ញវត្ថុពិភពលោក មានភាពតានតឹង ដូចករណីនាពេលបច្ចុប្បន្ននេះ៕
