ដោយៈ ហ្វីអូណា
ភ្នំពេញៈ ក្រសួងសាធារណការ និងដឹកជញ្ជូននឹងសាកល្បងប្រើប្រាស់មុខងារ ត្រួតពិនិត្យគុណភាពផ្លូវថ្នល់ (ROAD CARE Supervision) រយៈពេល៦ខែចាប់ពីខែសីហានេះតទៅ។
យន្តការនេះធ្វើឡើង ដើម្បីជួយពង្រឹងបន្ថែមលើយន្តការ ដែលមានស្រាប់ និងធានាដល់ការគ្រប់គ្រងការអនុវត្ត ការងារត្រួតពិនិត្យ គុណភាពបច្ចេកទេសជួសជុល ថែទាំ និងសាងសង់ផ្លូវថ្នល់ឱ្យកាន់តែមានប្រសិទ្ធភាព និងតម្លាភាព ស្របតាមគោលនយោបាយរដ្ឋាភិបាលឌីជីថល។
លោក ហ៊ាង សុទ្ធាយុត្តិ អ្នកនាំពាក្យក្រសួងសាធារណការនិងដឹកជញ្ជូន បានមានប្រសាសន៍ឲ្យដឹងកាលពីចុងសប្តាហ៍មុនថា ពីមុនការត្រួតពិនិត្យគុណភាពផ្លូវថ្នល់ ត្រូវបានកត់ត្រានៅលើក្រដាស ដែលធ្វើឱ្យទិន្នន័យនៅបែកខ្ញែកពីគ្នា ប៉ុន្តែប្រសិនបើការសាកល្បងប្រើប្រាស់មុខងារ ត្រួតពិនិត្យគុណភាពផ្លូវថ្នល់ រយៈពេល៦ខែទទួលជោគជ័យ នោះការកត់ត្រាគុណភាពផ្លូវថ្នល់ តាមប្រព័ន្ធបច្ចេកវិទ្យានឹងអនុវត្តជាផ្លូវការនៅទូទាំងប្រទេស។
លោកបញ្ជាក់ថា ទស្សនវិស័យរបស់ក្រសួងសាធារណការ និងដឹកជញ្ជូន ធ្វើយ៉ាងណាសម្រេចឱ្យបានការកត់ត្រា ទិន្នន័យផ្លូវថ្នល់ ជាពិសេសការត្រួតពិនិត្យគុណភាព នៅក្នុងប្រព័ន្ធតែមួយ ដើម្បីងាយស្រួលតាមដាននិងវាយតម្លៃ លើគុណភាពផ្លូវបានឆាប់រហ័សនិងចំគោលដៅ។
លោកហ៊ាង សុទ្ឋាយុត្តិបានបន្តថា ការងារនេះ គឺអគ្គនាយកដ្ឋានបច្ចេកទេសរបស់ក្រសួងសាធារណការ និងដឹកជញ្ជូន ជាអ្នកដឹកនាំក្រុមវិស្វករផ្លូវថ្នល់ ដើម្បីរចនាគំរូផ្លូវថ្នល់ ព្រមទាំងចុះត្រួតពិនិត្យ និងផ្ទៀងផ្ទាត់គុណភាពការសាងផ្លូវថ្នល់។ ក្រុមការងារនេះនឹងត្រូវចុះអនុវត្តគម្រោងមួយចំនួនសិន។
លោកបន្ថែមថា មានផ្លូវចំនួន៦នៅជាយក្រុងភ្នំពេញ សម្រាប់ការអនុវត្តការសាកល្បង ប្រើប្រាស់មុខងារត្រួតពិនិត្យគុណភាពផ្លូវថ្នល់រយៈពេល៦ខែ ហើយផ្លូវទាំង៦នេះ ស្ថិតក្នុងការត្រួតពិនិត្យដោយសម្ងាត់ ដែលមិនអាចបញ្ជាក់ប្រាប់ពីឈ្មោះ និងទីតាំងជាក់លាស់របស់ផ្លូវទាំងនោះបានឡើយ។
លោកបាននិយាយថា “សាកល្បងប្រើប្រាស់មុខងារត្រួតពិនិត្យគុណភាពផ្លូវថ្នល់ អាចវាយតម្លៃបានភ្លាមៗ ទាំងវឌ្ឍនភាព និងគុណភាពរបស់វាស្ថិតក្នុងកម្រិតណា ព្រោះមុនពេលការចុះធ្វើតេស្ដ គឺយើងបានកំណត់ស្ដង់ដារួចរាល់ហើយ។លោកបន្ថែមថា “ស្ដង់ដារបស់វា គឺមានជាប់ ហើយនិងធ្លាក់”។
លោកហ៊ាង សុទ្ឋាយុត្តបានបញ្ជាក់ថា ប្រសិនបើយើងតេស្ដវាធ្លាក់ គឺទាមទារឱ្យមានការជួសជុល ទាមទារឱ្យមានការកែតម្រូវ រហូតទាល់តែយើងតេស្ដវាជាប់ ទើបយើងឈានទៅរកការវាយតម្លៃគម្រោងសាងសាងផ្លូវនេះត្រូវបានបញ្ចប់។
គណៈកម្មការគ្រប់គ្រង ការអនុវត្តកម្មវិធីថែទាំផ្លូវថ្នល់របស់អគ្គនាយដ្ឋានបច្ចេកវិទ្យា និងទំនាក់ទំនងសាធារណៈ កាលពីថ្ងៃសុក្របានបើកវគ្គបណ្តុះបណ្តាល អំពីការប្រើប្រាស់មុខងារត្រួតពិនិត្យគុណភាពផ្លូវថ្នល់ ដល់មន្ត្រីជំនាញបច្ចេកទេសផ្លូវថ្នល់របស់ខ្លួន ដើម្បីបង្ហាញអំពីរបៀបប្រើប្រាស់មុខងារ មុនពេលចាប់ផ្តើមអនុវត្តន៍ការប្រើប្រាស់សាកល្បង ក្នុងរយៈពេល៦ខែ លើគម្រោងជួសជុលនិងសាងសង់ផ្លូវថ្នល់ជាក់ស្ដែង។
គណៈកម្មការគ្រប់គ្រងការអនុវត្តកម្មវិធីថែទាំផ្លូវថ្នល់ បានអះអាងថា គម្រោងជួសជុល និងសាងសង់ផ្លូវថ្នល់កាន់តែមានប្រសិទ្ធភាពនិងតម្លាភាព តាមរយៈការប្រើប្រាស់មុខងារ ត្រួតពិនិត្យគុណភាពផ្លូវថ្នល់។
មុខងារត្រួតពិនិត្យគុណភាពផ្លូវថ្នល់នេះ សម្រាប់បម្រើក្នុងវិស័ យការងារសាធារណការ របស់ក្រសួងសាធារណការ និងដឹកជញ្ជូន ក្រោមកិច្ចសហការរបស់អគ្គនាយកដ្ឋានទាំង៣ គឺអគ្គនាយកដ្ឋានបច្ចេកទេស អគ្គនាយកដ្ឋានសាធារណការ និងអគ្គនាយដ្ឋានបច្ចេកវិទ្យានិងទំនាក់ទំនងសាធារណៈ ព្រមទាំងជាសមាជិករបស់គណៈកម្មការគ្រប់គ្រងការអនុវត្តកម្មវិធីថែទាំផ្លូវថ្នល់៕
