ប្រទេសថៃមិនពន្យាពេលបង្កើតរដ្ឋាភិបាលថ្មី ធ្វើឲ្យការនាំចេញ ដាំក្បាលចុះ

ដោយៈ តែម សុខុម

បាងកក: ប្រទេសថៃ មិនត្រឹមតែចាំបាច់ត្រូវបង្កើតរដ្ឋាភិបាលថ្មីឱ្យបានឆាប់ប៉ុណ្ណោះទេ ថែមទាំងត្រូវបង្កើតគោលនយោបាយថ្មីៗដើម្បីដោះស្រាយការនាំចេញ ដែលកំពុងដាំក្បាលចុះផងដែរ។

សហព័ន្ធឧស្សាហកម្មថៃ (FTI) និយាយថា ទំហំនៃការនាំចេញរបស់ប្រទេសថៃ មកកាន់តំបន់អាស៊ាន ដែលជាទីផ្សារចេញធំបំផុតរបស់ខ្លួនបានធ្លាក់ចុះ៧,៤% មកនៅត្រឹម២៨ពាន់លានដុល្លារអាមេរិក។ នេះបើយោងតាមកាសែត Bangkok Post ចុះផ្សាយនៅថ្ងៃព្រហស្បត៍ ទី៣ សីហា នេះ។ទិន្នន័យនៃការធ្លាក់ចុះនេះ គឺផ្អែកលើកំណត់ត្រានាំចេញ ចន្លោះពីខែមករា ដល់ខែឧសភា ដើមឆ្នាំនេះ។

លោក Montri Mahaplerkpong អនុប្រធានសហព័ន្ធឧស្សាហកម្មថៃ (FTI) បានទម្លាយឱ្យដឹងថា វិស័យធុរកិច្ចថៃ កំពុងព្រួយបារម្ភចំពោះស្ថានភាពនេះ ហើយចង់ឱ្យរដ្ឋាភិបាលថ្មី ស្វែងរកទីផ្សារថ្មីៗដែលមានសក្ដានុពលខ្លាំង ដើម្បីទិញផលិតផលរបស់ថៃ។លោកបានបន្ថែមថា “ស្ថានភាពនេះ បាននិងកំពុងបង្កផលប៉ះពាល់ខ្លាំងដល់វិស័យផលិតកម្ម និងកំណើនសេដ្ឋកិច្ច”។

ការនាំចេញរបស់ប្រទេសថៃ មកកាន់តំបន់អាស៊ាន គ្របដណ្ដប់២៤%នៃការនាំចេញសរុប បន្ទាប់មកសហរដ្ឋអាមេរិក១០% អឺរ៉ុប ១០% និងជប៉ុន ១០%៕ Bangkok Post៕