ប្រេងហក់ឡើងថ្លៃស្រឺតៗ ខណៈសហរដ្ឋអាមេរិកសម្រុកទិញ ប្រេងស្តុកទុក

ដោយៈ តែម សុខុម

ក្រុងឡុងដ៍: ប្រេងបានហក់ឡើងថ្លៃស្រឺតៗ កាលពីថ្ងៃពុធ ទី២ សីហា ដែលជាការហក់ឡើងខ្ពស់បំផុតមិនធ្លាប់មាន ចាប់តាំងពីខែមេសា ខណៈទិន្នន័យបង្ហាញថា សហរដ្ឋអាមេរិក បានសម្រុកទិញប្រេងស្តុកទុកយ៉ាងច្រើន។

ការជួញដូរប្រេងឆៅនៅទីផ្សារអង់គ្លេស សម្រាប់ខែតុលា បានឡើងថ្លៃ៤៤សេន ឬ ០,៥%ឈានដល់៨៥,៣៥ដុល្លារ ក្នុងមួយបារ៉ែល ខណៈប្រេងឆៅនៅទីផ្សារសហរដ្ឋអាមេរិក សម្រាប់ខែកញ្ញា បានឡើងថ្លៃ៤៨សេន ឬ ០,៦%ឈានដល់៨១,៨៥ដុល្លារ ក្នុងមួយបារ៉ែល។

យោងតាមប្រភពទីផ្សារ ដែលដកស្រង់តួលេខរបស់វិទ្យាស្ថានប្រេងអាមេរិក (API) បង្ហាញថា ស្តុកប្រេងឆៅរបស់សហរដ្ឋអាមេរិក បានធ្លាក់ចុះ១៥,៤លានបារ៉ែល ក្នុងសប្តាហ៍គិតត្រឹមថ្ងៃទី២៨ ខែកក្កដា បើធៀបនឹងការប៉ាន់ប្រមាណរបស់ក្រុមអ្នកវិភាគថា អាចធ្លាក់ចុះ១,៣៧លានបារ៉ែល។

ប្រសិនបើតួលេខរបស់រដ្ឋាភិបាលសហរដ្ឋអាមេរិក ត្រូវគ្នានឹងតួលេខរបស់វិទ្យាស្ថានប្រេងអាមេរិក (API) វានឹងបង្ហាញពីការធ្លាក់ចុះស្តុកប្រេងឆៅ ដ៏ធំបំផុតរបស់សហរដ្ឋអាមេរិក បើយោងតាមកំណត់ត្រាតាំងពីឆ្នាំ១៩៨២។

ទិន្នន័យរបស់វិទ្យាស្ថានប្រេងអាមេរិក(API) បានបង្ហាញថា ស្តុកប្រេងសាំង បានធ្លាក់ចុះ១,៧លានបារ៉ែល បើធៀបនឹងការប៉ាន់ប្រមា​ណថា អាចធ្លាក់ចុះ១,៣លានបារ៉ែល៕ Reuters៕