មធ្យោបាយទទួលបានព័ត៌មានទាំងនេះ មានដូចជា៖
គេហទំព័រ៖ កន្លែងទទួលព័ត៌មាន ដែលវិនិយោគិនគួរទៅមើលមុនគេ គឺគេហទំព័ររបស់ក្រុមហ៊ុនផ្សារមូលបត្រកម្ពុជា (www.csx.com.kh)។ រាល់ទិន្នន័យជួញដូរដែលកើតមាន នឹងត្រូវផ្សាយភ្លាមៗនៅគេហទំព័រនោះ។ ហើយព័ត៌មានស្តីពីក្រុមហ៊ុនចុះបញ្ជីដែលត្រូវផ្សព្វផ្សាយជូនសាធារណជន ក៏នឹងត្រូវផ្សព្វផ្សាយលើគេហទំព័ររបស់ ផ.ម.ក. មុនគេដែរ។ ចំពោះឯកសារផ្តល់ព័ត៌មានដែលបោះផ្សាយតាំងពីដំបូងនៅពេលបោះផ្សាយលក់មូលបត្រជាលើកដំបូង ក៏មាននៅលើគេហទំព័រ ផ.ម.ក. ផងដែរ។ វិនិយោគិនក៏អាចទទួលបានព័ត៌មានទាំងនេះ និងព័ត៌មានផ្សេងៗទៀត នៅលើគេហទំព័ររបស់ គ.ម.ក. ក្រុមហ៊ុនមូលបត្រ និងគេហទំព័ររបស់ក្រុមហ៊ុនចុះបញ្ជីផ្ទាល់តែម្តង។
សេវាព័ត៌មានទីផ្សារតាមអ៊ីនធឺណេត៖ វិនិយោគិនក៏អាចទទួលបានព័ត៌មានទីផ្សារទាំងនេះផងដែរ តាមរយៈទូរសព្ទដៃទំនើប ថាបប្លីត ឬក៏កុំព្យូទ័រ ដរាបណាមានភ្ជាប់អ៊ីនធឺណេត។ វិនិយោគិនអាចទាក់ទងរកសេវានេះបាននៅក្រុមហ៊ុនមូលបត្រដែលខ្លួនមានគណនីនៅទីនោះ។
អេក្រង់ព័ត៌មានទីផ្សារនៅតាមបណ្តាក្រុមហ៊ុនមូលបត្រ៖ នៅពេលចូលទៅក្រុមហ៊ុនមូលបត្រ វិនិយោគិននឹងអាចឃើញទិន្នន័យជួញដូរនេះនៅលើអេក្រង់ទូរទស្សន៍របស់ក្រុមហ៊ុនមូលបត្រ។
ផ្ទាំងអេក្រង់អិលអ៊ីឌី៖ នៅផ្ទាំងអេក្រង់អិលអ៊ីឌីដែលនៅចំហៀងវិមានកាណាឌីយ៉ា សាធារណជនអាចមើលឃើញទិន្នន័យជួញដូរ និងព័ត៌មានផ្សេងៗទៀតទាក់ទងនឹងផ្សារមូលបត្រ។
មធ្យោបាយទូទៅ៖ កាសែត ទូរទស្សន៍ វិទ្យុ និងគេហទំព័រដទៃទៀត៕
