ដោយៈ គង់ ហ្វីអូណា
ភ្នំពេញៈ ក្រុមហ៊ុន RMA Automotive គ្រោងពង្រីកផលិតកម្មរបស់ខ្លួន ដើម្បីឆ្លើយតបនឹងតម្រូវការថយន្តម៉ាកFord សហរដ្ឋអាមេរិកនៅក្នុងប្រទេសកម្ពុជា។ក្រុមហ៊ុនបានប្រារព្ឋពិធីគម្រប់ខួប១ឆ្នាំ នៃក្រុមហ៊ុន RMA Automotive Cambodia(RMAC) Ford Assembly Plant នៅថ្ងៃទី ១១ ខែកក្កដា ឆ្នាំ ២០២៣ នៅស្រុកក្រគរ ខេត្តពោធិ៍សាត់។
លោក ងន សាំង អគ្គនាយកក្រុមហ៊ុន អ.អិម.អេ អូតូម៉ូធីវ ខេមបូឌាមានប្រសាសន៍ថា បន្ទាប់ពីរយៈពេលមួយឆ្នាំ នៃការដំឡើងរថយន្ត Ford ប្រកបដោយជោគជ័យ និងការរីកចម្រើននៃទីផ្សារកម្ពុជា ក្រុមហ៊ុន គ្រោងនឹងពង្រីកខ្សែសង្វាក់ផលិតកម្មរបស់ខ្លួន ដើម្បីបំពេញតម្រូវការ។លោកមានប្រសាសន៍ថា “ក្រុមហ៊ុនកំពុងសិក្សាលំអិតពីគម្រោងអាជីវកម្ម ដើម្បីពង្រីកបណ្តាញផលិតកម្មរបស់ខ្លួន”។
ក្រុមហ៊ុនបានសម្រចចិត្ត បង្កើតរោងចក្រដំឡើងរថយន្តFORD ដោយទទួលបានសិទ្ធិពេញលេញ ក្នុងការដំឡើងរថយន្ត Ford Ranger Wildtrak និងរថយន្ត Ford Everest ។
បច្ចុប្បន្ននេះ មានរោងចក្រដំឡើងចំនួន១០ ដែលផលិត និងផ្គត់ផ្គង់យានយន្ត ទៅកាន់ទីផ្សារក្នុងស្រុក និងសម្រាប់ការនាំចេញ ។នេះបើយោងតាមទិន្នន័យ របស់ក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍។
ការវិនិយោគលើរោងចក្រដំឡើងរថយន្ត មានចំនួនទឹកប្រាក់ ៧៨,៤ លានដុល្លារ។យោងតាមក្រសួងឧស្សាហកម្មបានឲ្យដឹងថា រោងចក្រដំឡើងរថយន្ត គឺដើម្បីបំពេញតម្រូវការក្នុងស្រុក និងសម្រាប់ការនាំចេញផងដែរ។
លោក កែវ រតនៈ អគ្គនាយកអគ្គិសនីកម្ពុជាមានប្រសាសន៍ថា ស្រុកក្រគរគឺក្លាយជាតំបន់អភិវឌ្ឍន៍ និងកំពុងស្រូបយកសក្តានុពលវិនិយោគឥតឈប់ឈរ ដែលនាំឲ្យប្រជាពលរដ្ឋ ក្នុងស្រុកមានស្ថានភាពរស់នៅល្អ។
លោកបានរីករាយនឹងគម្រោងអាជីវកម្ម របស់ក្រុមហ៊ុន RMA ក្នុងការពង្រីកបណ្តាញផលិតកម្មរោងចក្រ ដំឡើងរថយន្តនៅក្នុងតំបន់សេដ្ឋិច្ចពិសេស ហើយលោកបានស្នើសុំ ក្រុមហ៊ុនទាក់ទាញក្រុមហ៊ុនបុត្រសម្ព័ន្ធ ឱ្យមកបណ្តាក់ទុនបន្ថែម នៅតំបន់អភិវឌ្ឍន៍ស្រុកក្រគរ៕
