តម្លៃហាងឆេងមាសធ្លាក់ថ្លៃ ស្របពេលប្រាក់ដុល្លារអាមេរិក ហក់ឡើងថ្លៃនៅថ្ងៃចន្ទនេះ

ដោយ: គង់ លាងហួរ

អន្តរជាតិ: តម្លៃមាសបានធ្លាក់ចុះ នៅក្នុងការជួញដូរនៅតំបន់អាស៊ីនៅព្រឹកថ្ងៃចន្ទនេះ ខណៈតម្លៃប្រាក់ដុល្លារបានរក្សាយ៉ាងរឹងមាំ ហើយអ្នកវិនិយោគរង់ចាំលទ្ធផល កិច្ចប្រជុំគោលនយោបាយធនាគារកណ្តាលសំខាន់ៗ ជាបន្តបន្ទាប់ក្នុងសប្តាហ៍នេះ ដោយអាចមានការផ្អាកការដំឡើងអត្រាការប្រាក់ របស់ធនាគារកណ្តាលសហរដ្ឋអាមេរិក។

តម្លៃមាស Spot Gold បានធ្លាក់ចុះ០,១% ដល់១៩៥៧,៩២ដុល្លារក្នុងមួយអោន គិតត្រឹមម៉ោង 0033 GMT។ តម្លៃមាសរបស់សហរដ្ឋអាមេរិក U.S. gold futures បានធ្លាក់ចុះ០,២% មកនៅត្រឹម១៩៧២,៦០ដុល្លារក្នុងមួយអោន។

តម្លៃមាសបានហក់ឡើង០,៧% សម្រាប់សប្តាហ៍មុន ដែលបានបញ្ចប់កាលពីថ្ងៃសុក្រ ដែលត្រូវបានជួយជំរុញ មកពីការហក់ឡើងថ្លៃជាង១% កាលពីថ្ងៃព្រហស្បតិ៍ បន្ទាប់ពីការកើនឡើងនៃការទាមទាររបស់អ្នកគ្មានការងារធ្វើ ប្រចាំសប្តាហ៍នៅសហរដ្ឋអាមេរិក។

ឥឡូវនេះការផ្តោតអារម្មណ៍ ងាកទៅរកការចេញផ្សាយសន្ទស្សន៍តម្លៃទំនិញ ប្រើប្រាស់របស់សហរដ្ឋអាមេរិក (CPI) និងទិន្នន័យសន្ទស្សន៍តម្លៃអ្នកផលិត (PPI) នៅថ្ងៃអង្គារ និងថ្ងៃពុធ រៀងៗគ្នា។

តម្រូវការមាសរូបវន្តបានធ្លាក់ចុះ នៅក្នុងប្រទេសចិន និងឥណ្ឌាកាលពីសប្តាហ៍មុន ដោយបង្ខំឱ្យឈ្មួញផ្តល់ការបញ្ចុះតម្លៃ ជាមួយនឹងតម្លៃប្រែប្រួលនៅក្នុងប្រទេសឥណ្ឌា បានជំរុញឱ្យអ្នកទិញពន្យារពេលក្នុងការទិញ។

ក្រុមហ៊ុន SPDR Gold Trust GLD ដែលជាមូលនិធិជួញដូរមាសដ៏ធំបំផុតរបស់ពិភពលោក បាននិយាយថាការកាន់កាប់របស់ខ្លួនបានធ្លាក់ចុះ០,៣១% មកនៅត្រឹម៩៣១,៧៦តោន កាលពីថ្ងៃសុក្រពី៩៣៤,៦៥តោន កាលពីថ្ងៃព្រហស្បតិ៍សប្តាហ៍មុន៕